મમતા ઉપરાંત આ મુખ્યમંત્રીએ પણ પોતાના રાજ્યમાં ભાજપને આપી કારમી પછડાટ, જાણો કઈ બેઠક પર આગળ ?

ભબાનીપુર સહિતની ત્રણેય બેઠક પર મમતા બેનરજીની તૃણમૂલ કોંગ્રેસની જીત પાકી થઈ ગઈ છે. મમતાએ ફરી ભાજપને પછડાટ આપી છે ત્યારે ઓડિશામાં પણ નવિન પટનાઈકે ભાજપને ફરી પછડાટ આપી છે.

વોટિંગ

નવી દિલ્લીઃ પશ્ચિમ બંગાળ અને ઓડિશામાં 30 સપ્ટેમ્બરે થયેલી બે બેઠકોની પેટાચૂંટણી અને બંગાળમાં ઉમેદવારોના નિધનના કારણે મોકૂફ રખાયેલી બે બેઠકો પર આજે મતગણતરી શરૂ થઈ છે. આ પૈકી પશ્ચિમ બંગાળની ભબાનીપુર સહિતની ત્રણેય બેઠક પર મમતા બેનરજીની તૃણમૂલ કોંગ્રેસની જીત પાકી થઈ ગઈ છે. મમતાએ ફરી ભાજપને પછડાટ આપી છે ત્યારે ઓડિશામાં પણ નવિન પટનાઈકે ભાજપને ફરી પછડાટ આપી છે.

ઓડિશામાં પીપલી વિધાનસભા બેઠકની પેટાચૂંટણીમાં બીજુ જનતા દળના ઉમેદવાર રુદ્ર પ્રતાપ મહારથી ભાજપના આશ્રિત પટનાયકથી 11 હજાર કરતાં વધારે મતે આગળ છે. ઓડિશામાં નવિન પટનાઈક 2000થી સત્તામાં છે અને તેમને પછાડવાના ભાજપના પ્રયત્નો સફળ થયા નથી. આ વખતે ફરી એક વાર પટનાઈકે ભાજપને પછાડીને ઓડિશામાં પોતાની સર્વોપરિતા સ્થાપિત કરી દીધી છે. પીપલી વિધાનસભા બેઠક પરની મતગણતરી 25 રાઉન્ડ ચાલશે અને તેમાંથી 11 રાઉન્ડની મતગણતરી સમાપ્ત થઈ ચૂકી છે. કુલ અગિયાર રાઉન્ડના અંતે બીજુ જનતા દળના ઉમેદવાર રુદ્ર પ્રતાપ મહારથી ભાજપના આશ્રિત પટનાયકથી 11 હજાર કરતાં વધારે મતે આગળ છે.

પશ્ચિમ બંગાળમાં શમશેરગંજ અને જંગીપુર બેઠક પર પણ મમતા બેનરજીની તૃણમૂલ કોંગ્રેસ આગળ છે. શમશેરગંજ બેઠક પર અગિયારમા રાઉન્ડના અંતે તૃણમૂલ કોંગ્રેસનાં અમીરૂલ ઈસ્લામ કોંગ્રેસના ઝૈદુર રહેમાન કરતાં લગભગ છ હજાર મતે આગળ હતા જ્યારે ભાજપ છેક ત્રીજા સ્થાને હતો. ભાજપના મિલન દાસને માત્ર 4817 મત મળ્યા હતા. જંગીપુર બેઠક પર બારમા રાઉન્ડના અંતે તૃણમૂલ કોંગ્રેસનાં ઝાકિર હુસૈન ભાજપના સુજિત દાસ કરતાં 33 હજાર કરતાં વધારે મતે આગળ હતાં. હાલની સ્થિતી જોતાં તૃણમૂલ કોંગ્રેસ ત્રણેય બેઠક પર જીત મેળવશે એ નક્કી છે.

આ વરસના એપ્રિલ-મેમાં યોજાયેલી પશ્ચિમ બંગાળ વિધાનસભાની ચૂંટણીમાં મમતા બેનરજીની તૃણમૂલ કોંગ્રેસે ભાજપને કારમી હાર આપી હતી. મમતા બેનરજીની તૃણમૂલ કોંગ્રેસ અત્યારે તમામ ત્રણેય બેઠક પર પણ એ જ ઈતિહાસ દોહરાવશે અને ભાજપનો સફાયો કરશે એવું લાગે છે. ભાજપ ત્રણમાંથી એક પણ બેઠક પર ચિત્રમાં નથી. શમશેરગંજ બેઠક પર તૃણમૂલ કોંગ્રેસનાં અમીરૂલ ઈસ્લામને કોંગ્રેસના ઝૈદુર રહેમાન ટક્કર આપી રહ્યા છે જ્યારે બાકીની બે બેઠકો પર તો તૃણમૂલની જીતની ઔપચારિકતા જ બાકી રહી છે. બંગાળમાં તૃણમૂલ કોંગ્રેસના કાર્યકરોએ જીતનો જશ્ન શરૂ કરી દીધો છે.

મમતા બેનરજી જ્યાંથી લડી રહ્યાં છે એ ભવાનીપુરમાં 21 રાઉન્ડની મતગણતરી થશે. આ સિવાય  જંગીપુરમાં 24 અને શમશેરગંજમાં 26 રાઉન્ડની મતગણતરી થશે. મત ગણતરી દરમિયાન અધિકારીઓને માત્ર પેન અને કાગળનો ઉપયોગ કરવાની છૂટ છે પણ રિટર્નિંગ અધિકારીઓ અને નિરીક્ષકો ફોનનો ઉપયોગ કરી શકે છે.