Delhi Flood: દિલ્હીમાં યમુના નદીના જળસ્તરે તોડ્યો 45 વર્ષ જૂનો રેકોર્ડ, નીચાણવાળા વિસ્તારોમાં વધ્યો પૂરનો ખતરો

દેશની રાજધાની દિલ્હીમાં યમુનાના જળસ્તરનો 45 વર્ષ જૂનો રેકોર્ડ બુધવારે તૂટી ગયો હતો

ફોટોઃ ટ્વિટર

Delhi News: દેશની રાજધાની દિલ્હીમાં યમુનાના જળસ્તરનો 45 વર્ષ જૂનો રેકોર્ડ બુધવારે તૂટી ગયો હતો. હવે યમુનાનું જળસ્તર 207.55 મીટરે પહોંચી ગયું છે. છેલ્લા કેટલાક દિવસોથી અવિરત વરસાદ અને હરિયાણાના હથિનીકુંડ બેરેજમાંથી 3.5 લાખ ક્યુસેકથી વધુ પાણી છોડવાના કારણે આ સ્થિતિ સર્જાઈ છે. અગાઉ 9 જૂન 1978ના રોજ યમુના નદીનું જળસ્તર 207.49 નોંધાયું હતું.

Yamuna water level reaches its highest-ever mark at 207.55 metres; Kejriwal convenes emergency meeting

Read @ANI Story | https://t.co/4LAW8b8pEp#YamunaWaterLevel #Yamuna #rain #ArvindKejriwal pic.twitter.com/7250a7TpC4

— ANI Digital (@ani_digital) July 12, 2023

આ દરમિયાન યમુનાના જળસ્તરમાં રેકોર્ડ વધારા બાદ દિલ્હીમાં પૂરની ચેતવણી પણ જાહેર કરવામાં આવી છે. ભારતીય હવામાન વિભાગ (IMD ની આગાહી) અનુસાર, વરસાદ ચાલુ રહેવાની આગાહી છે. પૂરના જોખમને ધ્યાનમાં રાખીને દિલ્હી પોલીસે સાવચેતીના પગલા તરીકે યમુનાના પૂર પ્રભાવિત વિસ્તારોમાં CrPCની કલમ 144 લાગુ કરી છે.

દિલ્હીના મુખ્યમંત્રીએ બોલાવી ઈમરજન્સી બેઠક

મુખ્યમંત્રી અરવિંદ કેજરીવાલે દિલ્હીમાં યમુનાના જળસ્તર પર 1978નો જૂનો રેકોર્ડ તોડીને પૂરની ચેતવણી જાહેર થયા બાદ દિલ્હી સચિવાલયમાં ઈમરજન્સી બેઠક બોલાવી છે. આ બેઠકમાં દિલ્હી સરકારના મંત્રી સહિત વિવિધ સરકારી એજન્સીઓના ઉચ્ચ અધિકારીઓ હાજર રહેશે. બેઠકમાં પૂરને કારણે ઉભી થયેલી સ્થિતિની સમીક્ષાની સાથે રાહત કાર્યની અસરકારક રણનીતિ પર ચર્ચા થવાની સંભાવના છે.

18 રાજ્યો, 188 જિલ્લા, 574 લોકોના મોત

દેશના વિવિધ ભાગોમાં અવિરત વરસાદે જનજીવન અસ્તવ્યસ્ત કરી દીધું છે. ઉત્તર ભારતમાં ભારે વરસાદને કારણે પૂર જેવી સ્થિતિ સર્જાઈ છે. દેશની રાજધાની દિલ્હી, પશ્ચિમી ઉત્તર પ્રદેશ, હિમાચલ પ્રદેશ, ઉત્તરાખંડ, પંજાબ અને હરિયાણામાં વરસાદને કારણે ખરાબ હાલત છે. પૂરના કારણે ઘણા વિસ્તારો ડૂબી ગયા છે અને લોકોને તેમના ઘર છોડીને અન્ય સ્થળોએ ખસેડવામાં આવી રહ્યા છે.

માહિતી અનુસાર, મંગળવાર (11 જુલાઈ) સુધી દેશના 18 રાજ્યોના 188 જિલ્લાઓ વરસાદ અને પૂરની ઝપેટમાં છે અને જનજીવનને ભારે નુકસાન થયું છે. વરસાદ સંબંધિત ઘટનાઓમાં 574 લોકોના મોત થયા છે. જ્યારે 16 લોકો ગુમ થયા હોવાનું જાણવા મળ્યું છે. જ્યારે 497 લોકો ઘાયલ થયા છે. વરસાદના કારણે 8644 પશુઓના પણ મોત થયા છે. 8815 ઘરોને નુકસાન થયું છે, જ્યારે 47,225 હેક્ટર પાક નાશ પામ્યો છે.

હિમાચલ પ્રદેશમાં વરસાદે તબાહી મચાવી છે. પહાડી રાજ્યના 12 જિલ્લાઓ વરસાદ અને પૂરથી પ્રભાવિત છે. હિમાચલ પ્રદેશમાં વરસાદના કારણે અત્યાર સુધીમાં કુલ 95 લોકોના મોત થયા છે. 2 લોકો ગુમ છે, જ્યારે 99 લોકો ઘાયલ છે. 76 મકાનો સંપૂર્ણપણે નાશ પામ્યા છે, જ્યારે 319 મકાનોનો ભાગ ક્ષતિગ્રસ્ત થયો છે. 471 પશુઓ પણ મૃત્યુ પામ્યા છે.

પંજાબ-હરિયાણામાં 15ના મોત

પંજાબ અને હરિયાણાના ઘણા વિસ્તારો હજુ પણ પાણી હેઠળ છે. વરસાદ સંબંધિત ઘટનાઓમાં મૃત્યુઆંક વધીને 15 થયો છે. સમાચાર એજન્સી પીટીઆઈના જણાવ્યા અનુસાર, વરસાદ સંબંધિત ઘટનાઓને કારણે મંગળવારે વધુ છ મૃત્યુ નોંધાયા હતા, જેની સાથે છેલ્લા ત્રણ દિવસમાં કુલ મૃત્યુઆંક વધીને 15 થઈ ગયો છે. પંજાબમાં આઠ મૃત્યુ થયા છે, જ્યારે હરિયાણામાં સાત લોકોએ જીવ ગુમાવ્યા છે. બંને રાજ્યોમાં બચાવ કાર્ય ચાલુ છે.