ST નિગમના કર્મચારીઓના હિતમાં સરકારે શું લીધો મોટો નિર્ણય?

રાજ્ય સરકાર તરફથી તેમના પરિવારજનોને 14 લાખની સહાય આપવાનો નિર્ણય કર્યો છે.

પ્રતિકાત્મક તસવીર

એસટી નિગમના કર્મચારીઓ માટે રાજ્ય સરકારે મહત્વનો અને મોટો નિર્ણય લીધો હતો. એસ.ટીના કર્મચારીનું ચાલુ ફરજ દરમિયાન કોઈપણ પ્રકારે અવસાન થાય તો રાજ્ય સરકાર મૃતકના પરિવારજનને 14 લાખની સહાય ચૂકવશે. આ નિર્ણયથી નિયમિત ધોરણે  ભરતી પ્રક્રિયાથી નિમણુંક પામેલા વર્ગ ત્રણ અને ચારના કર્મચારીઓનું 24 સપ્ટેમ્બર 2022 કે ત્યારબાદ ચાલુ નોકરીમાં અવસાન થાય તો સ્વર્ગસ્થ કર્મચારીના પરિવારને 14 લાખની નાણાકીય સહાય ચૂકવવામાં આવશે. ઉપરાંત વિવિધ કચેરીમાં નિયુક્ત કરાયેલ પાંચ વર્ષીય ફિક્સ પગારની કરાર આધારિત સેવાના વર્ગ ત્રણ અને ચારના અવસાન પામેલા કર્મચારીઓના પરિવારજનોને 14 લાખની નાણાકીય સહાય ચૂકવાશે.

મુખ્યમંત્રી ભૂપેન્દ્ર પટેલ અને વાહન વ્યવહાર મંત્રી હર્ષ સંઘવીએ એસ.ટી નિગમના કર્મયોગીઓ માટે સંવેદનશીલ નિર્ણય લીધો છે.  જે અંતર્ગત એસ.ટીના કર્મચારીનું ચાલુ નોકરી દરમિયાન અવસાન થાય તો તેના પરિવારને 14 લાખ રૂપિયાની સહાય આપવામાં આવશે, એમ ગુજરાત રાજ્ય વાહન વ્યવહાર નિગમની યાદીમાં જણાવવામાં આવ્યું હતું.

વધુમાં કહેવામાં આવ્યું હતું કે  મુસાફરોને પોતાના ગંતવ્ય સ્થાનથી બીજા સ્થાને પહોચાડવા માટે એસ.ટી નિગમના કર્મચારીઓ કોઈ પણ તહેવારની રજા લીધા વિના ફરજ પર હર હંમેશા નિષ્ઠાથી કાર્યરત રહે છે. ગુજરાત રાજ્ય માર્ગ વાહન વ્યવહાર નિગમના કર્મયોગીને કોઈ પણ પ્રકારે અવસાન થાય થાય ત્યારે રાજ્ય સરકાર તરફથી તેમના પરિવારજનોને 14 લાખની સહાય આપવાનો નિર્ણય કર્યો છે.

આ સહાય પહેલા એસ.ટી નિગમમાં વિવિધ સેવાઓમાં ફરજ બજાવતા કર્મચારીઓ પૈકી ચાલુ નોકરીએ અવસાન પામનાર વર્ગ-3 અને વર્ગ - 4ના નિયમિત કર્મચારીઓના આશ્રિત કુટુંબને કર્મચારીની બાકી રહેલ નોકરીના સમયગાળાને ધ્યાનમાં લઈને 4 લાખ, 5 લાખ, 6 લાખની  નાણાકીય સહાય ચૂકવવામાં આવતી હતી. આ સિવાય એસ.ટી નિગમના નિયુકત કરાયેલા પાંચ વર્ષીય ફિકસ પગારની કરારીય સેવાના વર્ગ-3 અને વર્ગ-4 ના અવસાન પામેલ કર્મચારીઓના આશ્રિત કુટુંબને 4 લાખ રૂપિયાની ણાકીય સહાય ચૂકવવામાં આવતી હતી. જૂની યોજના પ્રમાણે 124 કર્મચારીઓના આશ્રિત કુટુંબોને રાજ્ય સરકાર દ્વારા 5 કરોડ 32 લાખની સહાય કરવામાં આવી છે અને બાકીની સહાય પણ ટૂંક સમયમાં આપવામાં આવશે.