મેડિકલ જગતનું કાળું લાંછન: રાજકોટની હોસ્પિટલમાં લેબર રૂમના CCTV વાયરલ થતા હાહાકાર

ગર્ભવતી મહિલાઓની ગરિમા પર લાગ્યો કલંક, હોસ્પિટલના બેજવાબદાર વલણ સામે ફિટકાર.

રાજકોટની હોસ્પિટલમાં લેબર રૂમના CCTV વાયરલ થતા હાહાકાર

Source : abp asmita

Rajkot hospital labor room negligence: રાજકોટની પાયલ મેટરનીટી હોસ્પિટલમાં એક અત્યંત શરમજનક અને સંવેદનહીન ઘટના સામે આવી છે, જેણે સમગ્ર મેડિકલ જગતને કલંકિત કર્યું છે. હોસ્પિટલના લેબર રૂમમાં લગાવવામાં આવેલા CCTV કેમેરાના ફૂટેજ ઓનલાઈન અપલોડ થતાં ખળભળાટ મચી ગયો છે. આ ફૂટેજમાં ગર્ભવતી મહિલાઓની સંવેદનશીલ તબીબી તપાસના દ્રશ્યો કેદ હતા, જે તેમની ગોપનીયતા અને ગરિમાનું ઉલ્લંઘન છે.

આ ઘટના ત્યારે પ્રકાશમાં આવી જ્યારે ABP અસ્મિતાના વીડિયો એડિટર તેજપાલસિંહ રાણાએ આ મામલાનો પર્દાફાશ કર્યો. રાણાએ CCTV ફૂટેજ અને વાયરલ થયેલા રીલ્સની ઝીણવટપૂર્વક તપાસ કરી અને હોસ્પિટલના પાપનો ભાંડો ફોડ્યો. ABP અસ્મિતાએ આ ઘટનાની જાણકારી તાત્કાલિક સાયબર ક્રાઈમ બ્રાન્ચને આપી, જેના પગલે ક્રાઈમ બ્રાન્ચની ટીમ હોસ્પિટલ પહોંચી તપાસ શરૂ કરી છે.

સૌથી મોટો સવાલ એ છે કે પાયલ મેટરનીટી હોસ્પિટલે લેબર રૂમમાં CCTV કેમેરા લગાવવાનું પાપ શા માટે કર્યું? ગર્ભવતી મહિલાઓની સંવેદનશીલ તપાસ દરમિયાન CCTV કેમેરા લગાવવાનો હોસ્પિટલનો હેતુ શું હતો? આ ઘટનામાં કેટલી ગર્ભવતી મહિલાઓની તપાસના CCTV ફૂટેજ ઓનલાઈન અપલોડ થયા છે અને કેટલા વાયરલ થયા છે, તે તપાસનો વિષય છે.

આ ઘટનાના પર્દાફાશ પછી હોસ્પિટલના એડમિન દ્વારા તાત્કાલિક લેબર રૂમમાંથી CCTV કેમેરા હટાવી લેવામાં આવ્યા હોવાનો સ્વીકાર કરવામાં આવ્યો છે. હોસ્પિટલના માલિક ડો. અમિત અકબરીએ દાવો કર્યો છે કે કોઈ પ્રોફેશનલ હેકરે CCTV સિસ્ટમ હેક કરી આ ફૂટેજ ઓનલાઈન અપલોડ કર્યા છે, પરંતુ હોસ્પિટલના એડમિને ABP અસ્મિતાના કેમેરા સામે સ્પષ્ટપણે સ્વીકાર્યું છે કે લેબર રૂમમાં CCTV કેમેરા હોસ્પિટલ દ્વારા જ લગાવવામાં આવ્યા હતા.

આ ઘટનામાં સૌથી વધુ ચોંકાવનારી બાબત એ છે કે હોસ્પિટલના વીડિયો વાયરલ થયા હોવા છતાં ડો. પ્રતિક્ષા દેસાઈ નામના મહિલા ડોક્ટરના ચહેરા પર શરમ કે પસ્તાવો જોવા મળતો નથી. મહિલાઓની ગરિમાનું હનન થયું હોવા છતાં તેઓ નિર્લજ્જ હાસ્ય સાથે જવાબ આપી રહ્યા છે, જે હોસ્પિટલ સંચાલકોની બેદરકારી અને સંવેદનહીનતા દર્શાવે છે. હોસ્પિટલના માલિક પણ ખીલખીલાટ હસતા હસતા આ બાબતે જવાબ આપી રહ્યા છે, જે અત્યંત દુઃખદ અને નિંદનીય છે.

રાજકોટના પોલીસ કમિશ્નર પણ આ ઘટનાને ગંભીરતાથી લઈને તાત્કાલિક એક્શનમાં આવ્યા છે. તેઓએ ક્રાઈમ બ્રાન્ચના અધિકારીઓ સાથે બેઠક બોલાવીને તાત્કાલિક તપાસના આદેશ આપ્યા છે. ABP અસ્મિતાએ પોલીસને વિનંતી કરી છે કે યુટ્યુબ પર અપલોડ થયેલા આ સંવેદનશીલ વીડિયો તાત્કાલિક હટાવવાની કાર્યવાહી કરવામાં આવે, કારણ કે હજુ પણ કેટલાક યુટ્યુબ ચેનલો પર આ CCTV ફૂટેજ ઉપલબ્ધ છે.

પાયલ મેટરનીટી હોસ્પિટલના સંચાલકોના પાપે ગર્ભવતી મહિલાઓની અત્યંત અંગત પળોના CCTV ફૂટેજ ઓનલાઈન અપલોડ થયા છે, જે પીડિત મહિલાઓ અને તેમના પરિવારો માટે આઘાતજનક અને માનસિક ત્રાસદાયક છે. આ ઘટના મેડિકલ જગત માટે એક કાળો ડાઘ છે અને હોસ્પિટલ સંચાલકો સામે કડક કાર્યવાહી થવી જોઈએ, જેથી ભવિષ્યમાં આવી ઘટનાઓનું પુનરાવર્તન ટાળી શકાય.

આ પણ વાંચો...