Accident: સૌરાષ્ટ્રમાં ધુમ્મસના કારણે બે અકસ્માત, અમરેલીમાં ST બસ રોડ નીચે ઉતરી ગઈ; મોરબીમાં 4થી વધુ ગાડી અને 3 ટ્રકનો અકસ્માત

ધુમ્મસના કારણે સૌરાષ્ટ્રમાં અકસ્માતની બે ઘટના બની છે. જોકે રાહતની વાત એ છે કે બંનેમાંથી એકપણ ઘટનામાં કોઈ જાનહાની નથી થઈ

ધુમ્મસના કારણે મોરબીના માળિયા હળવદ હાઈવે પર અણીયારી ટોલનાકા નજીક ગાડીઓ અથડાઈ

Accident: ધુમ્મસના કારણે સૌરાષ્ટ્રમાં અકસ્માતની બે ઘટના બની છે. જોકે રાહતની વાત એ છે કે બંનેમાંથી એકપણ ઘટનામાં કોઈ જાનહાની નથી થઈ. અમરેલીમાં બગસરા ડેપોની બગસરા-રાજકોટ એસટી બસને અકસ્માત નડ્યો. વડીયાથી રાજકોટ જતા દેવળા વચ્ચે એસટી બસને અકસ્માત નડ્યો. વહેલી સવારે ધુમ્મસ ભર્યા વાતાવરણમાં સામેથી લોડિંગ વાહન આવતા દુર્ઘટના બની હતી. એસટી ડ્રાઇવરની સમય સુચકતાને લઈ મોટી દુર્ઘટના ટળી હતી અને બસ રોડ નીચે ઉતરી ગઈ હતી. એસટી બસમાં વિદ્યાર્થીઓ સહિત 70 આસપાસ મુસાફરો સવાર હતા. 

ધુમ્મસના કારણે અકસ્માતનો બીજો બનાવ મોરબીના માળિયા હળવદ હાઈવે બન્યો. અણીયારી ટોલનાકા નજીક ૪ થી વધુ ગાડી અને ૩ જેટલા ટ્રકનો અકસ્માત સર્જાયો હતો. વહેલી સવારમાં બનેલી ઘટનામાં કોઈ જાનહાનિ થઈ નહોતી. માળિયા પોલીસે દોડી જઈને ટ્રાફિક કલિયર કરાવ્યો હતો.

અમદાવાદના કાલુપુરમાં ભર બપોરે યુવકને છરીના ઘા ઝિંકી પતાવી દીધો

અમદાવાદમાં કાયદા-કાનૂન વ્યવસ્થા કથળી છે. શહેરના કાલુપુર વિસ્તારમાં સોમવારે ભરબજારમાં યુવકને તલવાર-છરીના ઘા મારી રહેંસી નાંખ્યો હતો.  આ અંગે કાલુપુર પોલીસ સ્ટેશનમાં ફરિયાદ નોંધાઈ છે. રિક્ષામાં ત્રણ શખ્સ જતા હતા ત્યારે પાછળ રિક્ષામાં આવેલા શખ્સોએ પહેલા રિક્ષા પર તીક્ષ્ણ હથિયારો વડે હુમલો કર્યો હતો. જેથી રિક્ષામાં બેઠેલા ત્રણેય શખ્સ ભાગ્યા હતા. તેનો પીછો કરીને આરોપી સાદિક હુસેન અને લીયાકત હુસેને ભેગા મળીને તીક્ષ્ણ હથિયારો વડે પાંચકુવા પાસે જાહેરમાં સબાન અલી મોમીનને ઘા માર્યા હતા. સબાનઅલીને VS હોસ્પિટલ લઈ જવાતા ફરજ પરના ડોક્ટરે મૃત જાહેર કર્યો હતો. ફરિયાદી મોહમ્મદ ફૈઝાન અતરવાલા, મૃતકનો માસિયાઈ ભાઈ છે. ફરિયાદીના ભાઈ કાસીમહુસેનને પણ તલવારના ઘા મરાયા હતા. પ્રાથમિક માહિતી પ્રમાણે લગ્ન પ્રસંગમાં જમવાની બાબતમાં ટોકવા જેવી બાબતમાં મનદુઃખ રાખીને આરોપીઓએ હુમલો કર્યો હતો.

સીટીએમમાં ડબલ ડેકર બ્રિજ પરથી યુવતીએ લગાવી છલાંગ

સીટીએમ પાસેના ડબલ ડેકર ઓવરબ્રિજ ઉપરથી ગઈકાલે બપોરે અજાણી યુવતીએ છલાંગ મારીને આપઘાતનો પ્રયાસ કર્યો હતો. જો કે લોકો બચાવવા જાય તે પહેલા યુવતીએ કૂદકો માર્યો હતો.ગંભીર હાલતમાં યુવતીને સારવાર માટે હોસ્પિટલમાં દાખલ કરવામાં આવી છે. આ બનાવનો વિડિયો સોશિયલ મીડિયામાં વાયરલ થયો હતો. આ કેસની વિગત એવી છે કે પૂર્વ વિસ્તારમાં ખોખરાથી સીટીએમ તરફ જતા ઓવરબ્રિજ ઉપર ગઈકાલે બપોરે એક યુવતીએ અગમ્ય કારણોસર ડબલ ડેકર ઓવર બ્રિજ ઉપરથી કૂદકો  મારતી હોવાની જાણ થતાં લોકોનું ટોળું એકઠું થયું હતું. લોકો બચાવવા જાય તે પહેલા યુવતીએ બ્રિજ ઉપરથી છલાંગ મારી હતી જેથી શરીરે ગંભીર ઇજાઓ થઇ હતી.   આ બનાવની જાણ થતાં એમ્બ્યુલન્સ આવી પહોચી હતી અને સ્થળ પર સારવાર કરીને વધુ સારવાર માટે હોસ્પિટલમાં ખસેડવામાં આવી હતી. પોલીસે હોસ્પિટલમાં પહોચીને યુવતીના નિવેદન લઇને કાયકેસરની કાર્યવાહી હાથ ધરવાની કવાયત શરુ કરવામાં આવી છે. પૂર્વ વિસ્તારમાં છેલ્લા કેટલાક સમયથી ગૃહ કલેશના કારણે મહિલાના આપઘાતના બનાવો વધી રહ્યા છે