રાજકોટ, અમરેલી સહિત સૌરાષ્ટ્રના અનેક વિસ્તારમાં ધોધમાર વરસાદ

રાજકોટ શહેરમાં પણ સાંજ પડતા જ મુશળધાર વરસાદ વરસવાની શરૂઆત થઈ હતી. રાજકોટમાં ભારે વરસાદના પગલે યાજ્ઞિક રોડ, કોટેચા ચોક, કાલાવડ રોડ, કિસાનપરા ચોક, રેસકૉર્ષ સહિતના વિસ્તારમાં પાણી ભરાઈ ગયા હતાં.

રાજકોટ: અમરેલી જિલ્લામાં સવારથી જ વરસાદી માહોલ જામ્યો છે. અમરેલીના ખાંભા સહિતના પંથકમાં વરસાદ વરસ્યો છે. અમરેલી તથા આસપાસના સણોસરા, થોરડી, બાબાપુર સહિતના ગામમાં ધોધમાર વરસાદ વરસ્યો છે. બીજી તરફ બગસરા, વડીયા અને દામનગરમાં પણ વરસાદ વરસ્યો છે. ધારી તથા સરસીયા સહિતના ગામોમાં ભારે પવન સાથે વરસાદ વરસ્યો છે. વરસાદના પગલે સ્થાનિક નદીમાં ઘોડાપુર આવ્યું હતું. નદીમાં પૂરથી સરસીયા-ફાચરિયા જવાનો કોઝ-વે પાણીમાં ગરકાવ થઈ ગયો હતો. જેના કારણે કોઝ-વે પરથી વાહનવ્યવહાર બંધ કરવાની ફરજ પડી હતી. રાજકોટ શહેરમાં પણ સાંજ પડતા જ મુશળધાર વરસાદ વરસવાની શરૂઆત થઈ હતી. રાજકોટમાં ભારે વરસાદના પગલે યાજ્ઞિક રોડ, કોટેચા ચોક, કાલાવડ રોડ, કિસાનપરા ચોક, રેસકૉર્ષ સહિતના વિસ્તારમાં પાણી ભરાઈ ગયા હતાં. રાજકોટમાં ચાલુ વર્ષે રેકર્ડ બ્રેક 57 ઈંચ વરસાદ પડ્યો છે. ચોમાસાની સિઝનમાં સૌરાષ્ટ્રમાં સૌથી વધુ વરસાદ રાજકોટ અને જૂનાગઢના વિસાવદર પંથકમાં ખાબકયો છે. હવામાન વિભાગની વરસાદની આગાહી વચ્ચે જ જૂનાગઢ જિલ્લામાં બપોર બાદ વરસાદ શરૂ થયો હતો. જૂનાગઢ શહેરમાં ધીમીધારે વરસાદ વરસ્યો હતો. જિલ્લાના કેશોદ, માળિયા હાટિના, ગીરના જંગલ વિસ્તારમાં ભારે પવન અને વિજળીના કડાકા સાથે વરસાદ વરસ્યો હતો. વરસાદના પગલે નીચાણવાળા વિસ્તારમાં પાણી ભરાઈ ગયા હતા. વરસાદથી ખેડૂતોને હવે પાકમાં નુકશાની થવાનો ભય છે. અરબી સમુદ્રમાં સર્જાયેલા લો પ્રેશરથી સૌરાષ્ટ્રના દરિયા કાંઠાના વિસ્તારોમાં હવામાન વિભાગે ભારે વરસાદની આગાહી કરી છે. ગીર ગઢડામાં દોઢ ઈંચ અને ઉનાના ખાપટમાં બે ઈંચ વરસાદ વરસ્યો હતો. વાતાવરણમાં અચાનક પલટો આવતા ગીરસોમનાથના મોટાભાગના તાલુકાઓમાં ગાજવીજ સાથે મેઘરાજાએ એન્ટ્રી કરી હતી. સુત્રાપાડાના ગ્રામ્ય વિસ્તારોમાં ધોધમાર વરસાદ પડતા રસ્તાઓ પાણી પાણી થયા હતા.