ગુજરાતના આ શહેરમાં માત્ર 3 કલાકમાં 15 મૃતદેહ બહાર લવાયા, મૃત્યુ કોરોનાથી કે અન્ય બીમારીથી ?

રાજ્યમાં કોરોના ઘાતક બન્યો છે. ગઈકાલે રાજ્યમાં રેકોર્ડબ્રેક 3 હજાર 160 કેસ નોંધાયા હતા.

પ્રતિકાત્મક તસવીર

રાજ્યમાં કોરોનાના કેસની સાથોસાથ મૃત્યુઆંક પણ ચિંતાજનક રીતે વધી રહ્યો છે. સરકારી ચોપડે રાજ્યમાં સોમવારના કોરોનાથી 15 દર્દીના મૃત્યુ નિપજ્યા છે. જોકે એબીપી અસ્મિતાએ સુરતમાં કોરોના વાસ્તવમાં કેટલી જિંદગીને ભરખી ગયો તે અંગે તપાસ કરી તો ચોંકાવનારી હક્કીત સામે આવી છે.

સુરતની નવી સિવિલ કોવિડ હોસ્પિટલે ચેકિંગ કરતા સવારના 11 વાગ્યાથી બપોરે 2 વાગ્યા સુધીમાં એક-એક કરી કુલ 15 મૃતદેહને બહાર લવાયા હતા. બાદમાં શબવાહિનીમાં અશ્વિની સ્મશાન ગૃહમાં અંતિમ સંસ્કાર માટે લઈ જવાયા હતા. જો કે, મૃત્યુ કોરોનાથી થયું કે અન્ય બીમારીથી તે કહેવું મુશ્કેલ છે. કેમ કે, કોવિડ હોસ્પિટલમાં દાખલ દર્દીનું જ્યારે મૃત્યુ થાય છે. ત્યારે તેમના અંતિમ સંસ્કાર કોવિડના પ્રોટોકોલ પ્રમાણે જ કરવામાં આવે છે.

રાજ્યમાં કોરોના ઘાતક બન્યો છે. ગઈકાલે રાજ્યમાં રેકોર્ડબ્રેક 3 હજાર 160 કેસ નોંધાયા હતા. જ્યારે 15નાં મૃત્યુ થયા હતા અને નવ ઓક્ટોબર 2020 એટલે 178 દિવસમાં પ્રથમ વખત એક્ટિવ કેસનો આંક 16 હજારને પાર થયો છે. હાલ 16 હજાર 252 એક્ટિવ કેસ છે અને 167 દર્દી વેન્ટીલેટર પર છે.

કુલ કેસનો આંક 3 લાખ 21 હજાર 598 અને કુલ મૃત્યુઆંક 4 હજાર 581 થયો છે. એપ્રિલના પાંચ દિવસમાં જ 13 હજાર 900 કેસ અને 66 દર્દીઓના મૃત્યુ થયા છે. હાલની સ્થિતિએ પ્રતિ કલાકે 132 વ્યક્તિ કોરોનાની ઝપેટમાં આવી રહી છે.

સોમવારે સુરત શહેરમાં 603 અને ગ્રામ્યમાં 185 સાથે સૌથી વધુ 788 કેસ નોંધાયા છે. અમદાવાદ શહેરમાં ૭૭૩ અને ગ્રામ્યમાં ૧૪ સાથે ૭૮૭ કેસ નોંધાયા છે. વડોદરા અને રાજકોટમાં પણ ચિંતાજનક સ્થિતિ છે. છેલ્લા ૨૪ કલાકમાં ૩૦૦થી વધુ કેસ સામે આવ્યા છે. જેમાં વડોદરા શહેરમાં ૨૧૬-ગ્રામ્યમાં ૧૧૪ સાથે કુલ ૩૩૦, રાજકોટ શહેરમાં ૨૮૩, ગ્રામ્યમાં ૨૮ સાથે ૩૧૧ કેસનો સમાવેશ થાય છે. આમ, ચાર મહાનગરમાં જ ૨ હજાર ૨૧૬ નવા કેસ નોંધાયા છે. તો જામનગરમાં 124, મહેસાણામાં 88, ભાવનગરમાં 79, ગાંધીનગરમાં 66, પાટણમાં 65, પંચમહાલમાં 39 કેસ નોંધાયા છે.

અમદાવાદમાં કોરોનાથી મૃત્યુ દર ૩.૧ ટકા છે. કોરોનાથી સૌથી વધુ મૃત્યુ થયા હોય તેવા રાજ્યોમાં ગુજરાત ૧૦માં સ્થાને છે. છેલ્લા ૨૪ કલાકમાં સુરતમાંથી ૬૭૮, અમદાવાદમાંથી ૪૬૮, વડોદરામાંથી ૨૧૦, રાજકોટમાંથી ૧૮૨ એમ રાજ્યભરમાંથી ૨ હજાર ૦૨૮ દર્દીઓ કોરોનાથી સાજા થયા છે. અત્યારસુધી કુલ ૩ લાખ ૭૬૫ દર્દીઓ કોરોનાથી સાજા થયા છે અને રીક્વરી રેટ ૯૩.૫૨ ટકા છે. રાજ્યમાંથી પોરબંદરમાં સૌથી વધુ ૯૮.૮૦ ટકા, જૂનાગઢમાં ૯૭.૩૦ ટકા, બનાસકાંઠામાં ૯૭ ટકા, ગીર સોમનાથમાં ૯૬.૯૦ ટકાનો રીક્વરી રેટ છે. ૮૧.૯ ટકા સાથે ડાંગ સૌથી ઓછો રીક્વરી રેટ ધરાવે છે.