Al Qaeda : અલ-ઝવાહિરીને લઈને અલ-કાયદાએ કર્યો ચોંકાવનારો દાવો, અમેરિકા સામે ઉભા થયા સવાલ
મીડિયા રિપોર્ટ્સ અનુસાર, અલ-કાયદાએ શુક્રવારે (23 ડિસેમ્બર)ના રોજ આ 35 મિનિટનો વીડિયો જાહેર કર્યો હતો.
Al Qaeda Released New Video: દુનિયાના સૌથી ખુંખાર આતંકી સંગઠન અલ કાયદાએ ફરી એકવાર ચોંકાવનારો દાવો કર્યો છે. અલ કાયદાના આ દાવાએ અમેરિકાના આતંકી ઓપરેશન પર જ સવાલ ખડા કર્યાં છે. અલ કાયદાએ તેના ચીફ આતંકી આયમાન-અલ-ઝવાહિરી જીવતો હોવાનો દાવો કર્યો છે. એટલું જ નહીં પણ તેના પુરાવા પણ આપ્યા છે.
અલ કાયદાએ એક નવો વીડિયો જાહેર કર્યો છે જેમાં ખતરનાક આતંકવાદી અલ-ઝવાહિરીનો અવાજ સંભળાય છે. આ વીડિયો દ્વારા આતંકી સંગઠને દાવો કર્યો છે કે તેનો નેતા જીવિત છે. મીડિયા રિપોર્ટ્સ અનુસાર, અલ-કાયદાએ શુક્રવારે (23 ડિસેમ્બર)ના રોજ આ 35 મિનિટનો વીડિયો જાહેર કર્યો હતો.
આતંકવાદી સંગઠને દાવો કર્યો છે કે આ રેકોર્ડિંગ અલ-ઝવાહિરીનું છે. જોકે, રેકોર્ડિંગ ક્યારે કરવામાં આવ્યું છે તેની માહિતી આપવામાં આવી નથી. તે તેની સામગ્રીથી પણ સ્પષ્ટ નથી. આ વિડિયો જાહેર કરીને અલ કાયદા અમેરિકાને સંદેશ આપવા માંગે છે કે તેનો નેતા હજુ પણ જીવિત છે અને તેનો બદલો લેશે.
અમેરિકા ડ્રોન હુમલામાં માર્યો ગયો
ઉલ્લેખનીય છે કે, અલ કાયદાનો સંસ્થાપક એવા ઓસામા બિન લાદેનની સાથે અલ-ઝવાહિરી પણ અમેરિકામાં 9/11ના આતંકવાદી હુમલાના મુખ્ય કાવતરાખોરોમાં સામેલ હતો. લાદેનને માર્યા બાદ અમેરિકાની ગુપ્તચર એજન્સીઓ આખી દુનિયામાં અલ-ઝવાહિરીને શોધી રહી હતી. આ વર્ષે 31 જુલાઈએ અફઘાનિસ્તાનની રાજધાની કાબુલમાં ડ્રોન હુમલામાં અલ-ઝવાહિરીને અમેરિકાએ માર્યો હતો. એવું માનવામાં આવે છે કે તાલિબાન અને પાકિસ્તાન બંને તેને મદદ કરી રહ્યા હતા.
અલ-ઝવાહિરીનો મૃતદેહ મળ્યો નથી
જોકે અમેરિકી ડ્રોન હુમલામાં માર્યા ગયેલા અલ-ઝવાહિરીનો મૃતદેહ મળ્યો નથી. અમેરિકાનો દાવો છે કે ડ્રોન હુમલો એટલો ચોક્કસ અને શક્તિશાળી હતો કે મૃતદેહ ઉડી ગયો. પરંતુ હવે અલ કાયદાનું કહેવું છે કે તેનો નેતા મર્યો નથી અને હજી જીવિત છે. તાલિબાનનું પણ કહેવું છે કે, અમેરિકાએ જે ઘર પર ડ્રોન હુમલો કર્યો હતો તે ઘર ખાલી હતું. ત્યાં કોઈ રહેતું ન હતું. ઉલ્લેખનીય છે કે, આતંકવાદી સંગઠન સતત પોતાના લીડરને જીવતો સાબિત કરવાની કોશિશ કરી રહ્યું છે અને અમેરિકાને ધમકી આપી રહ્યું છે.
'માર્યો આતંકવાદી જવાહિરી હતો'
ન્યૂયોર્ક ટાઈમ્સના રિપોર્ટ અનુસાર, આ ડ્રોન સ્ટ્રાઈક અમેરિકન ઈન્ટેલિજન્સ એજન્સી CIAની વિશેષ ટીમ દ્વારા કરવામાં આવી હતી. ઓગસ્ટ 2021માં અફઘાનિસ્તાનમાં તાલિબાન સરકાર સત્તામાં આવી ત્યારથી જ ઝવાહિરી કાબુલમાં રહેતો હતો. કાબુલમાં અમેરિકન એજન્સીઓ સાથે જોડાયેલા લોકો છેલ્લા 6 મહિનાથી સતત તેને ફોલો કરી રહ્યા હતા. તેના પરિવાર અને નજીકના મિત્રો પર પણ ઝીણવટભરી નજર રાખવામાં આવી હતી.
જોકે અલ કાયદાના આ દાવાથી અમેરિકાએ અલ ઝવાહિરીને માર્યો હોવાની વાત અને અહેવાલો પર ફરી એકવાર સવાલ ઉભા થયા છે.
ટ્રેન્ડિંગ સમાચાર
ટોપ સ્ટોરી
