Gujarat Election Result 2025: હાલોલ પાલિકામાં ભારતીય જનતા પાર્ટીને ઈતિહાસ રચ્યો, જાણો ચૂંટણી પરિણામ

Gujarat Election Result 2025: હાલોલ પાલિકામાં ભારતીય જનતા પાર્ટીને ઈતિહાસ રચ્યો, જાણો ચૂંટણી પરિણામ

હાલોલ નગરપાલિકામાં ભાજપની જીત

Local Body Election Result 2025 : સ્થાનિક સ્વરાજની ચૂંટણીના પરિણામો આજે જાહેર થઈ રહ્યા છે. સવારે 9 વાગ્યાથી મતગણતરી શરૂ કરવામાં આવી હતી. જૂનાગઢ મહાનગરપાલિકા, 68 નગરપાલિકા અને 3 તાલુકા પંચાયતની ચૂંટણી માટે સરેરાશ 57 ટકા મતદાન થયું હતું. સ્થાનિક સ્વરાજની ચૂંટણીમાં ભારતીય જનતા પાર્ટીનો દબદબો જોવા મળી રહ્યો છે.હાલોલમાં ભાજપે નગરપાલિકા કબજે કરી છે.

હાલોલ નગરપાલિકા સામાન્ય ચૂંટણીનું પરિણામ આજે જાહેર થતાં હાલોલ નગરપાલિકા પર ભારતીય જનતા પાર્ટીને પૂર્ણ બહુમતી સાથે સત્તા મેળવવામાં સફળતા મળી છે. હાલોલ નગરપાલિકાના કુલ 9 વોર્ડની 36 બેઠકો ભાજપે કબજે કરી છે. 50 વર્ષ બાદ કોંગ્રેસ મુકત હાલોલ નગરપાલિકા થઈ છે. ભાજપે પૂર્ણ બહુમતી મેળવી રેકોર્ડ બ્રેક કર્યો છે.

પ્રથમ વાર 5 મુસ્લિમ ઉમેદવાર બીજેપીના મેન્ડેડ પર ચૂંટણી લડ્યા જે તમામ મુસ્લિમ ઉમેદવારએ વિજય મેળવ્યો છે. હાલોલ નગરપાલિકાની ચૂંટણી યોજાય તે પહેલા કુલ 21 બેઠકો બિન હરીફ થતા ભાજપના ફાળે ગઈ હતી. જ્યારે બાકી રહેલી 15 બેઠકો પર ચૂંટણી યોજાઈ હતી. જેનું પરિણામ જાહેર થતાં તમામ 15 બેઠકો પર ભાજપના ઉમેદવારો વિજેતા બન્યા છે.

ભાજપ દ્વારા તમામ 36 બેઠકો કબજે કરવામાં આવતા ભાજપના સમર્થકો અને કાર્યકરો દ્વારા હાલોલ નગરમાં વિજયયાત્રા યોજવામાં આવી હતી. જેમાં મોટી સંખ્યામાં ભાજપના કાર્યકરો અને સમર્થકો જોડાયા હતા. ભાજપે તમામ 36 બેઠકો કબજે કરી ઇતિહાસ સર્જ્યો હતો.

રાજ્યના પૂર્વ મંત્રી અને હાલોલના ધારાસભ્ય જયદ્રથસિંહ પરમારે હાલોલ નગરના તમામ મતદારો અને સંગઠનના તમામ હોદ્દેદારોનો આભાર માની જણાવ્યું હતું કે હાલોલના નગરજનો દ્વારા ભાજપના વિકાસના મોડેલને જ આગળ રાખી તેમનો કિંમતી મત ભાજપને આશીર્વાદ રૂપે આપ્યા છે.

ભાજપને મળેલી જીત બાદ હવે હાલોલ નગરમાં બાકી રહેલા વિકાસના તમામ કામો હાથ ધરવામાં આવશે. ભાજપ દ્વારા હાલોલ પાલિકા વિસ્તારમાં અગાઉ પણ તમામ વિકાસના કામો કરવામાં આવ્યા છે અને આગામી સમયમાં કરવામાં આવનાર છે.