Gujarat Heatwave: કચ્છમાં બે દિવસ રેડ એલર્ટ, જાણો હવામાન વિભાગની લેટેસ્ટ આગાહી

Gujarat Heatwave: કચ્છમાં બે દિવસ રેડ એલર્ટ, જાણો હવામાન વિભાગની લેટેસ્ટ આગાહી

પ્રતિકાત્મક તસવીર

અમદાવાદ: રાજ્યમાં કાળઝાળ ગરમીને લઈ હવામાન વિભાગ દ્વારા આગાહી કરવામાં આવી છે. 6 થી 9 એપ્રિલ રાજ્યના કેટલાક જિલ્લાઓમાં હીટવેવની આગાહી કરવામાં આવી છે.આ વખતે ગરમી ભૂક્કા બોલાવશે. એપ્રિલની શરુઆતથી જ કાળઝાળ ગરમી પડી રહી છે.

આજે કચ્છમાં ઓરેન્જ અલર્ટ જયારે રાજકોટમાં યલો અલર્ટ સાથે હીટવેવની આગાહી કરવામાં આવી છે. આવતીકાલથી બે દિવસ કચ્છમાં સિવિયર હીટવેવ સાથે રેડ અલર્ટની આગાહી હવામાન વિભાગ દ્વારા કરવામાં આવી છે.

રાજકોટ અને મોરબીમાં આગામી બે દિવસ ઓરેન્જ એલર્ટ આપવામાં આવ્યું છે. જ્યારે પોરબંદર અને જૂનાગઢમાં આગામી બે દિવસ યલો એલર્ટ આપવામાં આવ્યું છે.

રાજ્યના બનાસકાંઠા, સાબરકાંઠા, પાટણ, મહેસાણામાં પણ બે દિવસ યલો એલર્ટ આપવામાં આવ્યું છે. 7 થી 9 એપ્રિલ ઉત્તર ગુજરાતમાં હીટ વેવની આગાહી કરવામાં આવી છે.

રાજ્યમાં સૌથી વધુ ભુજમાં 44.5 ડિગ્રી જયારે અમદાવાદમાં 41.3 ડિગ્રી તાપમાન નોંધાયું છે. એપ્રિલ મહિનાના શરુઆતના સપ્તાહમાં જ તાપમાનનો પારો ઉંચકાવા લાગ્યો છે. લોકો ગરમી અને તાપથી પરેશાન થઈ રહ્યા છે.

દરિયાકિનારેના વિસ્તારોમાં 7 થી 9 એપ્રિલ સુધી ગરમ અને ભેજવાળું વાતાવરણ રહેવાની શક્યતા હવામાન વિભાગ દ્વારા વ્યક્ત કરવામાં આવી છે.