Heavy Rain Alert: આગામી 7 દિવસ દેશભરમાં ભારે તોફાન સાથે મેઘરાજા ધબધબાટી બોલાવશે! હવામાન વિભાગની મોટી આગાહી

Rain Alert: ઉત્તરપૂર્વ, પૂર્વ, મધ્ય અને દક્ષિણ ભારતમાં વરસાદ અને કરાનો અનુમાન, ૪૦ થી ૬૦ કિમી પ્રતિ કલાકની ઝડપે પવન ફૂંકાશે.

Weather Alert: ભારતીય હવામાન વિભાગ (IMD) દ્વારા આગામી ૭ દિવસ માટે દેશના વિવિધ ભાગોમાં ભારે વરસાદ અને તોફાની પવન સાથે વીજળી પડવાની સંભાવના અંગે એક મોટી ચેતવણી જારી કરવામાં આવી છે. IMD દ્વારા જારી કરાયેલા પ્રેસ રિલીઝમાં જણાવવામાં આવ્યું છે કે આગામી એક સપ્તાહ દરમિયાન દેશના ઘણા રાજ્યોમાં હવામાનમાં મોટો પલટો જોવા મળશે અને અતિવૃષ્ટિને લઈને પણ એલર્ટ આપવામાં આવ્યું છે.

ઉત્તરપૂર્વ ભારત: આગામી ૭ દિવસ દરમિયાન ઉત્તરપૂર્વ ભારતના રાજ્યો આસામ, મેઘાલય, અરુણાચલ પ્રદેશ, નાગાલેન્ડ, મણિપુર, મિઝોરમ અને ત્રિપુરામાં ૪૦ થી ૬૦ કિમી પ્રતિ કલાકની ઝડપે વાવાઝોડા અને ભારે પવન સાથે વરસાદ પડી શકે છે. આસામ અને મેઘાલયમાં ૨૮ એપ્રિલ સુધી ભારે વરસાદની ચેતવણી છે. ૨૬ અને ૨૭ એપ્રિલે અરુણાચલ પ્રદેશમાં, ૨૭ અને ૨૮ એપ્રિલે નાગાલેન્ડ, મણિપુર, મિઝોરમ અને ત્રિપુરામાં, તેમજ ૨૬ અને ૨૭ એપ્રિલે આસામ અને મેઘાલયમાં ભારે વરસાદની શક્યતા છે.

પૂર્વ ભારત, મધ્ય પ્રદેશ અને છત્તીસગઢ: ૨૬ થી ૩૦ એપ્રિલ દરમિયાન પૂર્વ ભારત, પૂર્વ મધ્ય પ્રદેશ, વિદર્ભ, છત્તીસગઢ અને પૂર્વ ઉત્તર પ્રદેશમાં ૪૦ થી ૬૦ કિમી પ્રતિ કલાકની ઝડપે ભારે પવન સાથે વીજળીના ચમકારાનો અનુભવ થઈ શકે છે. ૨૭ એપ્રિલે સબ-હિમાલયન પશ્ચિમ બંગાળ અને સિક્કિમમાં વાવાઝોડું (૫૦-૬૦ કિમી પ્રતિ કલાકની ઝડપે પવન) આવવાની શક્યતા છે. પશ્ચિમ બંગાળના ગંગાના મેદાનો, વિદર્ભ અને છત્તીસગઢમાં ૨૭ અને ૨૮ એપ્રિલે, બિહારમાં ૨૮ એપ્રિલ સુધી, ઓડિશામાં ૨૭ થી ૨૯ એપ્રિલ દરમિયાન અને ઝારખંડમાં ૨૮ અને ૨૯ એપ્રિલના રોજ ભારે વાવાઝોડાની ચેતવણી છે.