સરકારે કહ્યું- યુક્રેનથી 13 હજારથી વધુ ભારતીયોને વતન લાવવામાં આવ્યા, એરપોર્ટ પર જોવા મળ્યો ભાવુક નજારો

એરપોર્ટ પર ભાવુક નજારો

યુદ્ધગ્રસ્ત યુક્રેનના પડોશી દેશોમાંથી 11 ફ્લાઈટમાં 2,200થી વધુ ભારતીયો રવિવારે સ્વદેશ પરત ફરશે. નાગરિક ઉડ્ડયન મંત્રાલયે આ માહિતી આપી. સરકારના જણાવ્યા અનુસાર, અત્યાર સુધીમાં 63 ફ્લાઈટમાં 13,300થી વધુ લોકોને પરત લાવવામાં આવ્યા છે.

મંત્રાલયે એક નિવેદનમાં જણાવ્યું હતું કે શનિવારે લગભગ 3,000 ભારતીયોને 15 ફ્લાઇટ્સ દ્વારા 'એરલિફ્ટ' કરવામાં આવ્યા હતા. આમાં 12 સ્પેશિયલ સિવિલિયન અને ત્રણ એરફોર્સ ફ્લાઈટ્સ સામેલ છે, એમ નિવેદનમાં જણાવાયું છે.

રશિયન હુમલા બાદ યુક્રેનની એરસ્પેસ 24 ફેબ્રુઆરીથી બંધ છે. યુક્રેનમાં ફસાયેલા ભારતીય નાગરિકોને તેના પડોશી દેશો મારફતે સ્વદેશ લાવવામાં આવી રહ્યા છે. IAF ખાલી કરાવવાની કામગીરીમાં C-17 મિલિટરી ટ્રાન્સપોર્ટ એરક્રાફ્ટનો ઉપયોગ કરી રહ્યું છે. તે જ સમયે, ઈન્ડિગો, વિસ્તારા અને સ્પાઈસ જેટ જેવી ભારતીય એરલાઈન્સ ખાસ નાગરિક ફ્લાઈટ્સ ચલાવી રહી છે.

યુક્રેનથી સુરક્ષિત રીતે બહાર કાઢવામાં આવેલા 170 ભારતીયોને લઈને એર એશિયા ઈન્ડિયા ઈવેક્યુએશન ફ્લાઈટ શનિવારે વહેલી સવારે રોમાનિયાના સોસેવાથી દિલ્હી પહોંચી હતી. એરલાઇનના એક અધિકારીએ આ જાણકારી આપી.

યુદ્ધગ્રસ્ત યુક્રેનમાં ફસાયેલા ભારતીય નાગરિકોને પરત લાવવા કેન્દ્ર સરકાર દ્વારા ચલાવવામાં આવી રહેલા 'ઓપરેશન ગંગા'ના ભાગરૂપે એર એશિયા ઈન્ડિયા દ્વારા સંચાલિત આ પ્રથમ ઈવેક્યુએશન ફ્લાઈટ હતી.

રોમાનિયાના સોસેવાથી દુબઈ થઈને એર એશિયા ઈન્ડિયાની ફ્લાઈટ શનિવારે સવારે 4 વાગ્યે 170 ભારતીયોને લઈને દિલ્હી એરપોર્ટ પર ઉતરી હતી, એમ અધિકારીએ જણાવ્યું હતું. અધિકારીના જણાવ્યા અનુસાર, વિદેશ રાજ્ય મંત્રી વી મુરલીધરને એરપોર્ટ પર મુસાફરોનું સ્વાગત કર્યું.

અધિકારીના જણાવ્યા અનુસાર, એરએશિયા ઇન્ડિયાના એરબસ A320 નિયો એરક્રાફ્ટે શુક્રવારે સવારે 8.30 વાગ્યે દિલ્હીથી દુબઈ થઈને તેના ગંતવ્ય સ્થાન માટે ઉડાન ભરી હતી અને સ્થાનિક સમય અનુસાર સાંજે 6.45 વાગ્યે રોમાનિયાના સોસેવાથી ઉડાન ભરી હતી.

એરલાઈને કહ્યું કે તે કેટલીક વધુ ઈવેક્યુએશન ફ્લાઈટ્સ ઓપરેટ કરવા પર વિચાર કરી રહી છે. 24 ફેબ્રુઆરીએ રશિયાની સૈન્ય કાર્યવાહી શરૂ થઈ ત્યારથી યુક્રેનિયન એરસ્પેસ બંધ છે. આવી સ્થિતિમાં, ભારત યુક્રેનના પડોશી દેશો - રોમાનિયા, હંગેરી, સ્લોવાકિયા અને પોલેન્ડમાંથી તેના નાગરિકોને વિશેષ ફ્લાઇટ્સ દ્વારા બહાર કાઢી રહ્યું છે.

એર ઈન્ડિયા, એર ઈન્ડિયા એક્સપ્રેસ, ઈન્ડિગો, ગોફર્સ્ટ, સ્પાઈસજેટ અને એર એશિયા ઈન્ડિયા દ્વારા સંચાલિત ઈવેક્યુએશન ફ્લાઈટ્સ ઉપરાંત, ભારતીય વાયુસેના યુક્રેનથી ફસાયેલા ભારતીયોને પરત લાવવામાં સરકારને મદદ કરી રહી છે.