ટી-20 મેચમાં મંધાનાએ ફટકારી સદી, મિતાલી રાજના રેકોર્ડની કરી બરોબરી

નવી દિલ્હીઃ ભારતની મહિલા ખેલાડી સ્મૃતિ મંધાનાએ મહિલા ક્રિકેટ સુપર લીગ Kia Super Leagueમાં પોતાનું શાનદાર પ્રદર્શન ચાલુ રાખ્યું છે. 22 વર્ષની મંધાના ઇગ્લેન્ડની ટી-20 લીગમાં શુક્રવારે 61 બોલમાં 102 રનની શાનદાર ઇનિંગ રમી હતી.

વેસ્ટર્ન સ્ટોર્મે મંધાનાની ઇનિંગની મદદથી 18.2 ઓવરમાં 3 વિકેટના નુકસાન પર 154 રન બનાવી સાત વિકેટે મેચ જીતી લીધી હતી. આ સાથે સ્મૃતિ મંધાના ટી-20 મેચમાં સદી ફટકારનારી બીજી ભારતીય મહિલા ખેલાડી બની ગઇ છે. આ અગાઉ મિતાલી રાજે 2017માં રેલવે તરફથી રમતા અણનમ 100 રન ફટકાર્યા હતા. મંધાનાએ કેએસએલમાં અત્યાર સુધીમાં પાંચ ઇનિંગમાં 282 રન ફટકાર્યા છે.

હાલમાં કેએસએલમાં વેસ્ટર્ન સ્ટોર્મ તરફથી રમતા મંધાનાએ મેનચેસ્ટરના ઓલ્ડ ટ્રૈફર્ડમાં લંકાશાયર થંડર વિરુદ્ધ 60 બોલમાં સદી પુરી કરી હતી. તેણે 12 ચોગ્ગા અને છ સિક્સ લગાવી હતી. લંકાશાયર થંડરે અગાઉ બેટિંગ કરતા 20 ઓવરમાં 153 રન ફટકાર્યા હતા.