કોલ અને ડેટા ફ્રીના જમાના ગયા, સરકાર લેવા જઈ રહી છે આ મહત્ત્વનો નિર્ણય

મુકેશ અંબાણીની રિલાયન્સ જિયો દ્વારા ફ્રી વોઈસ કોલ અને સસ્તા ડેટાની રજૂઆતથી ટેલિકોમ સેક્ટરમાં તરખાટ મચી ગયો છે.

નવી દિલ્હી: ભારતીય ટેલિકોમ રેગ્યુલેટર (ટ્રાઇ)એ સંકેત આપ્યો છે કે કોલ અને ડેટા માટે મિનિમમ ટેરિફ નક્કી કરવાની ટેલિકોમ સેક્ટરની માગ પર વિચાર કરી શકે છે. એટલે કે મોબાઇલમાં કોલ અને ડેટા સંપૂર્ણ ફ્રી નહીં હોય. પહેલાં ટ્રાઇ આ અંગે ના પાડતું આવ્યું છે. ટ્રાઇના વલણમાં આ પરિવર્તન ભારતી એરટેલના પ્રમુખ સુનીલ મિત્તલની બુધવારે ટેલિકોમ સેક્રેટરી સાથેની મુલાકાત પછી આવ્યું છે. મિત્તલે ટેલિકોમ સેક્રેટરીને ડેટા માટે લઘુત્તમ મર્યાદા કે ડેટા રેટ નક્કી કરવાની માગ કરી છે. ટ્રાઇના ચેરમેન આર.એસ. શર્માએ એક કાર્યક્રમમાં કહ્યું કે ટેલિકોમ ચાર્જ છેલ્લાં 16 વર્ષથી મુશ્કેલ પરિસ્થિતિઓ છતાં અંકુશમાં રહ્યા છે અને તે સારી રીતે કામ કરે છે, હવે રેગ્યુલેટર ઉદ્યોગની મિનિમમ ટેરિફ નક્કી કરવાની માગ પર વિચાર કરી રહ્યું છે. મુકેશ અંબાણીની રિલાયન્સ જિયો દ્વારા ફ્રી વોઈસ કોલ અને સસ્તા ડેટાની રજૂઆતથી ટેલિકોમ સેક્ટરમાં તરખાટ મચી ગયો છે. ત્યારબાદ અન્ય કંપનીઓને પણ ટેરિફ દર ઘટાડવા પડ્યા છે. શર્માએ કહ્યું છે કે ટેલિકોમ કંપનીઓએ અમને લખ્યું છે કે અમે તેનું રેગ્યુલેશન કરીએ. આ પ્રથમ વખત છે. 2012માં મને યાદ છે કે તેમણે ટેરિફના રેગ્યુલેશનના ટ્રાઈના પ્રસ્તાવનો ભારે વિરોધ કર્યો હતો. તેમણે કહ્યું હતું કે ટેરિફ દરો તેમના માટે છોડી દેવા જોઈએ. સુપ્રીમ કોર્ટે 24 ઓક્ટોબરના નિર્ણયમાં ટેલિકોમ કંપનીઓના એજસ્ટેડ ગ્રોસ રેવન્યુ (એજીઆર)ની બાકીની રકમની ગણનામાં નોન-ટેલિકોમ રેવન્યુને પણ સામેલ કરીને સરકારના પગલાને યોગ્ય ઠેરવ્યા બાદ આ પ્રસ્તાવ ફરીથી આવ્યો છે. આ નિર્ણય બાદ ભારતી એરટેલ, વોડાફોન, આઈડિયા જેવી કંપનીઓએ 1.47 લાખ રૂપિયા ચૂકવવાના થાય છે.