સિમ્બાએ તોડ્યો ‘ચેન્નઈ એક્સપ્રેસ’નો રેકોર્ડ, કરી છપ્પર ફાડ કમાણી

રોહિત શેટ્ટીની 'ચેન્નાઇ એક્સપ્રેસ'નું લાઇફટાઇમ કલેક્શન 227.13 કરોડ હતું. દરેક ફિલ્મ સાથે રોહિત શેટ્ટીની ફિલ્મનું કલેક્શન વધી રહ્યું છે. ચેન્નાઇ એક્સપ્રેસ (227.13 કરોડ) અને ગોલમાલ અગેન (205.69 કરોડ)ની કમાણીથી આગળ નીકળી સિમ્બા રોહિત શેટ્ટીની સૌથી વધુ કમાણી કરનારી ફિલ્મ બની ગઇ છે.

ટ્રેડ એક્સપર્ટ તરણ આદર્શે ટ્વિટ કરી સિમ્બાના કલેક્શનની જાણકારી આપી છે. સિમ્બા રોહિત શેટ્ટીની ચેન્નાઇ એક્સપ્રેસના લાઇફટાઇમ કલેક્શનને પાર કરી ગઇ છે. ત્રીજા સપ્તાહમાં ફિલ્મે શુક્રવારે 2.60, શનિવારે 4.51, રવિવારે 5.30 અને સોમવારે 2.86 કરોડ રૂપિયાની કમાણી કરી હતી. સિમ્બાએ ભારતમાં કુલ 228 કરોડની કમાણી કરી છે. જે જોતાં ફિલ્મ 250 કરોડ ક્લબમાં સામેલ થાય તેવી સંભાવના છે.