Ahmedabad: બસ સ્ટેન્ડમાં ગંદકી કરવી પડી શકે છે ભારે, એસટી વિભાગે લીધો આ મોટો નિર્ણય

Ahmedabad: ગુજરાત વાહન વ્યવહાર વિભાગે બસ સ્ટેન્ડની સ્વચ્છતા લઈને મહત્વનો નિર્ણય લીધો છે

તસવીરનો ઉપયોગ પ્રસ્તૃતિકરણ કરવા માટે કરવામાં આવ્યો છે.

Ahmedabad: ગુજરાત વાહન વ્યવહાર વિભાગે બસ સ્ટેન્ડની સ્વચ્છતા લઈને મહત્વનો નિર્ણય લીધો છે. નિગમ દ્વારા ગંદકી ફેલાવનાર મુસાફરો સામે દંડ વસૂલવાની તૈયારી શરૂ કરી દીધી છે. ગંદકી કરનારા લોકો પાસેથી દંડ વસૂલવાની જોગવાઈ મામલે આવનાર દિવસોમાં નિર્ણય લેવામાં આવશે. જેથી મુસાફરોને બસ સ્ટેન્ડ પર કચરો ફેંકી ગંદકી કરવી ભારે પડી શકે છે.

સ્વચ્છતા બાબતે ખાસ નિગમ દ્વારા પ્રથમવાર એક અધિકારીની પણ કેન્દ્રીય સ્તરે નિયુક્તિ કરવામાં આવી છે. ઓડિટ અને મોનિટરિંગ ચીફ મેનેજરનો કાર્યભાર અધિકારીને સોંપવામાં આવ્યો છે. જે રાજ્ય પરના બસ સ્ટેન્ડ પર સ્વચ્છતા બાબતે કામ કરી રહ્યાં છે. ચીફ મેનેજર રાજ્યના તમામ એસટી બસ ડેપોમાં સ્વચ્છતા બાબતે કરશે કામગીરી કરશે.
સ્વચ્છતા ઝુંબેશને લઈને ગીતામંદિર એસટી બસ સ્ટેન્ડ પર કામગીરી શરૂ કરાઇ હતી.

નિગમ દ્વારા બસ સ્ટેન્ડની સ્વચ્છતા જળવાઈ રહે તેને ધ્યાનમાં રાખીને બસ સ્ટેન્ડની સફાઈ માટે અભિયાન પણ શરૂ કર્યું છે. અમદાવાદના ગીતામંદિર એસટી બસ સ્ટેન્ડ પર સફાઈ બાબતે ભાર આપવામાં આવી રહ્યો છે અને ઝુંબેશ શરૂ કરવામાં આવી છે. અમદાવાદ બસ સ્ટેન્ડ પર વિભાગના અધિકારીઓ પોતે હાજર રહીને કામ લઈ રહ્યા છે. રાજ્યના બસ સ્ટેન્ડ ઉપર દિવસ દરમિયાન હજારોની સંખ્યામાં મુસાફરોની અવરજવર થતી હોય છે. તેમાં અમદાવાદ વડોદરા, સુરત અને રાજકોટ જેવા મહાનગરોના બસ સ્ટેન્ડ પર મુસાફરોની અવરજવર ખૂબ જ મોટા પ્રમાણમાં થતી હોય છે. આ સ્થિતિમાં સ્વચ્છતા અંગે જાગૃતતાના અભાવે ગંદકી ફેલાતી હોય છે. જોકે હવે નિગમ દ્વારા ગંદકી ફેલાવનાર મુસાફરો પાસે દંડ વસૂલવા બાબતે નીતિ ઘડવામાં આવશે.

નોંધનીય છે કે આ મહિનાની શરૂઆતમાં ગુજરાત રાજ્ય માર્ગ વાહન વ્યવહાર નિગમ (એસટી) દ્ધારા 4062 ડ્રાઇવર, 3342 કંડકટરની ભરતી બહાર પાડવામાં આવી હતી.  જેના માટે ઉમેદવારો 7 ઓગસ્ટથી અરજી કરી શકે છે. અરજી કરવાની અંતિમ તારીખ 6 સપ્ટેમ્બર છે. અરજી ઓનલાઈન કરવાની રહેશે.

5 વર્ષ માટે ફિક્સ પગાર

ડ્રાઇવર-કંડક્ટરનો પાંચ વર્ષ માટે મહિનાનો ફિક્સ પગાર રૂપિયા 18,500 રહેશે. કંડકટર માટે વયમર્યાદા 18 થી 34 વર્ષ અને લઘુત્તમ શૈક્ષણિક લાયકાત 12 પાસ છે. ડ્રાઇવર માટે વયમર્યાદા 25 થી 34 વર્ષ અને લઘુત્તમ શૈક્ષણિક લાયકાત ધો. 12 પાસ છે.

 શરુઆતના પાંચ વર્ષ માટે ફિક્સ પગાર ભરતીમાં નોકરીએ લાગનાર ઉમેદવારોને ચુકવવામાં આવશે. ત્યાર બાદ નિયત કરવામાં આવેલ મળવાપાત્ર પગારની ચૂકવણી કરવામાં આવશે. આ માટે ગુજરાત રાજ્ય માર્ગ વાહન વ્યવહાર નિગમની મધ્યસ્થ કચેરીના મહેકમ વિભાગે જાહેરાત બહાર પાડી છે. બહાર પાડવામાં આવેલી ભરતી માટે રાજ્ય સરકારની મંજૂરી લેવાની કાર્યવાહી કરવામાં આવી છે, મંજૂરી મળશે તો દર્શાવેલ કુલ જગ્યાઓ પર ડ્રાઇવર અને કંડકટરની જગ્યાઓ ભરવામાં આવશે.