Gujarat Weather Update: આગામી 3 કલાકમાં કચ્છ જિલ્લામાં ભારે વરસાદની સંભાવના, અહીં પણ પડશે વરસાદ
આજે રાજ્યના 225 તાલુકાઓમાં વરસ્યો વરસાદ, વિસાવદરમાં આજે સૌથી વધુ 12 ઈંચ વરસાદ ખાબક્યો.
Gujarat Weather Update: ગુજરાતમાં છેલ્લા બે દિવસથી વરસાદી માહોલ જામ્યો છે. રાજ્યના અનેક જિલ્લાઓમાં મેઘરાજા મન મૂકીને વરસી રહ્યા છે. હવામાન વિભાગની આગાહી વચ્ચે વહેલી સવારથી જ રાજ્યના અનેક તાલુકાઓમાં વરસાદ વરસ્યો છે. હવામાન વિભાગે આગામી આગામી 3 કલાકમાં કચ્છ જિલ્લામાં ભારે વરસાદની સંભાવના વ્યક્ત કરી છે.
આ ઉપરાંત મોરબી, જામનગર, દેવભૂમિ દ્વારકા, બનાસકાંઠા, પાટણ, જિલ્લાઓમાં હળવાથી મધ્યમ વરસાદની સંભાવના છે, તો સુરેન્દ્રનગર, પોરબંદર, ગીર સોમનાથ, જુનાગઢ, દિવ અને રાજકોટમાં પણ હળવાથી મધ્યમ વરસાદની સંભાવના છે. જ્યારે અરવલ્લી, મહિસાગર, પંચમહાલ, આણંદ, વડોદરા, દાહોદ, છોટા ઉદેપુર, નર્મદા, ભરૂચ, સુરત, તાપી, ડાંગ, નવસારી,વલસાડ, દાદર અને નગર હવેલી, દમણમાં હળવા વરસાદની સંભાવના છે.
આજે રાજ્યના 225 તાલુકાઓમાં વરસ્યો વરસાદ
- વિસાવદરમાં આજે સૌથી વધુ 12 ઈંચ વરસાદ ખાબક્યો
- મેંદરડામાં આઠ અને રાધનપુરમાં છ ઈંચ વરસાદ ખાબક્યો
- ભાભર, વંથલી તાલુકામાં આજે છ-છ ઈંચ વરસાદ ખાબક્યો
- બહુચરાજી, મહેસાણા, દીયોદરમાં ચાર-ચાર ઈંચ વરસાદ
- ડીસા, બગસરા, જૂનાગઢ, વડગામમાં ચાર-ચાર ઈંચ વરસાદ
- ધ્રાંગધ્રા, હળવદ, દાંતીવાડામાં 3-3 ઈંચ વરસાદ
- માળિયા હાટીના, થરાદ, વીસનગરમાં 3-3 ઈંચ વરસાદ
- ભેંસાણ, અમીરગઢ, હારીજમાં અઢી-અઢી ઈંચ વરસાદ
- તાલાલા, ઈડર, કાંકરેજમાં અઢી-અઢી ઈંચ વરસાદ
- ધાનેરા, લખતર, પાલનપુરમાં 2-2 ઈંચ વરસાદ
- સાંતલપુર, કાલાવડ, દાંતામાં 2-2 ઈંચ વરસાદ
- વીજાપુર, ચાણસ્મા અને ચોટીલામાં 2-2 ઈંચ વરસાદ
અંબાલાલ પટેલે શું કરી છે આગાહી
ગુજરાતમાં વરસાદી આગાહીને લઇને આગાહીકાર અંબાલાલ પટેલે જણાવ્યુ છે કે, હમણાં ગુજરાતને વરસાદથી રાહત નહીં મળી શકે, ગુજરાતમાં હજુ પણ વરસાદ વરસવાનું ચાલુ રહેશે. અંબાલાલ પટેલના જણાવ્યા અનુસાર, ઓકટોબરમાં બંગાળના ઉપસાગરમાં ચક્રવાત ઉભા થઇ રહ્યા છે, આ ચક્રવાતના કારણે ગુજરાતનું વાતાવરણ તોફાની બની રહેશે. આગામી 19 અને 20 તારીખે ગુજરાતના કેટલાક ભાગોમાં ભારેથી અતિભારે વરસાદની પડવાની શક્યતા છે. હવામાન નિષ્ણાંત અંબાલાલ પટેલના જણાવ્યા અનુસાર, રાજ્યમાં બનાસકાંઠા, દક્ષિણ રાજસ્થાનના સંલગ્ન ભાગોમાં ભારે વરસાદ પડશે. થરાદ, વાવ, કાંકરેજ, અમીરગઢ, તખતગઢ, ડીસા, દાંતીવાડા અને પાલનપુરમાં પણ ભારે વરસાદની શક્યતા છે. રાધનપુર, સાંતલપુર અને ધાનેરામાં અતિભારે વરસાદની શક્યતા રહેલી છે. આની સાથે સાથે બનાસ નદીમાં પુર આવવાની પુરી શક્યતા છે. સાબરમતી નદીમાં પાણીનો આવરો વધવાની શક્યતા પણ દર્શાવવામાં આવી છે. ધરોઈ ડેમમાં પાણીની સપાટીમાં વધારો થવાની શક્યતા છે. એટલુ જ નહીં જામનગરમાં 18, 19 અને 20માં ભારેથી અતિભારે વરસાદની શક્યતા છે. રાજકોટ, સુરેન્દ્રનગર, હળવદ, ધ્રાંગધ્રામાં પણ ભારે વરસાદની શક્યતા છે. કચ્છમાં પણ 18, 19 અને 20 તારીખે ભારેથી અતિભારે વરસાદ થશે. રાપર, ભચાઉ, ગાંધીધામ, અંજાર, મુન્દ્રા અને જખૌમાં ભારે વરસાદની પડવાની શક્યતા છે. ભુજ, નખત્રાણા અને માંડવીમાં ભારે વરસાદની શક્યતા છે.
ટોપ સ્ટોરી
ટ્રેન્ડિંગ સમાચાર
