આ રીતે ખેડૂતોને સહાય કેમની મળશે? જૂનાગઢમાં 2 દિવસથી ખેડૂતો લાઇનમાં, ઓનલાઈન ફોર્મ ન ભરાતા આક્રોશ
Gujarat farmers assistance: એક તરફ કમોસમી વરસાદે ખેડૂતોનો મોઢે આવેલો કોળિયો છીનવી લીધો, ખેતરોના ખેતર ધોવાઈ ગયા, અને પાક નાશ પામ્યો.
Gujarat farmers assistance: ગુજરાત સરકારે કમોસમી વરસાદથી થયેલા પાક નુકસાન માટે સહાય પેકેજ ની જાહેરાત તો કરી દીધી છે, પરંતુ અન્નદાતા માટે આ સહાય સુધી પહોંચવાનો રસ્તો મુશ્કેલીભર્યો સાબિત થઈ રહ્યો છે. જૂનાગઢ જિલ્લાના મેંદરડા તાલુકાના ખડપીપળી ગામના ખેડૂતો છેલ્લા બે દિવસથી ગ્રામપંચાયત કચેરી બહાર લાઈનોમાં ઊભા રહેવા છતાં સરકારી ઓનલાઈન સિસ્ટમ વારંવાર બંધ થવાને કારણે ફોર્મ ભરી શક્યા નથી. ગામના VCE (વિલેજ કોમ્પ્યુટર એન્ટરપ્રેન્યોર) ના મતે, સર્વર ચાલે તો પાંચ મિનિટનું કામ છે, પરંતુ હાલ પાંચ કલાક લાગી જાય છે. ખેડૂતો રાત સુધી રાહ જોવા છતાં ફોર્મ ન ભરાતા આક્રોશિત છે અને આ પ્રક્રિયાને "લોલીપોપ જેવી સહાય" ગણાવી રહ્યા છે.
પાક ધોવાયો, હવે સિસ્ટમનો માર
એક તરફ કમોસમી વરસાદે ખેડૂતોનો મોઢે આવેલો કોળિયો છીનવી લીધો, ખેતરોના ખેતર ધોવાઈ ગયા, અને પાક નાશ પામ્યો. હવે જ્યારે સરકારે સહાયની જાહેરાત કરી છે, ત્યારે આશા માત્ર એ જ સહાય પર ટકેલી છે. પરંતુ સરકારની ઓનલાઈન સહાય મેળવવાની પ્રક્રિયા હવે ખેડૂતો માટે માથાનો દુખાવો બની ગઈ છે. જૂનાગઢ જિલ્લાના મેંદરડા તાલુકાના ખડપીપળી ગામમાં, ગ્રામપંચાયત કચેરીની બહાર ખેડૂતોની લાંબી કતારો જોવા મળી રહી છે. ખેડૂતોનો આક્રોશ છે કે મદદ કરતાં વધારે તકલીફ નસીબમાં આવી રહી છે.
સર્વર ડાઉન: કલાકોની રાહત છતાં ફોર્મ ન ભરાયા
ખડપીપળી ગામના ખેડૂતો છેલ્લા બે દિવસથી લાઈનમાં ઊભા છે, પરંતુ સરકારી વેબસાઈટ અને સર્વર સતત બંધ રહેવાને કારણે તેમના ફોર્મ ભરાઈ શક્યા નથી. ગામના VCE (વિલેજ કોમ્પ્યુટર એન્ટરપ્રેન્યોર) એ જણાવ્યું કે આખી સિસ્ટમ રાજ્યભરમાં અત્યંત ધીમી ચાલી રહી છે. સર્વર ચાલે તો એક અરજી કરવામાં માત્ર પાંચ મિનિટ લાગે છે, પરંતુ હાલની સ્થિતિમાં એક અરજી કરતાં પાંચ કલાક નીકળી જાય છે. ખેડૂતો રાત સુધી બેસી રહે છે, છતાં ફોર્મ ભરી શકાતા નથી. ગામના સરપંચે પણ આ સ્થિતિ પર ચિંતા વ્યક્ત કરી છે. જો દિવસભરમાં માત્ર પાંચ-છ અરજીઓ જ અપલોડ થશે, તો આ રીતે મોટાભાગના ખેડૂતો સહાયથી વંચિત રહી જશે તેવો ભય સેવાઈ રહ્યો છે.
સર્વેમાં ભેદભાવ અને અપૂરતી સહાયનો આક્ષેપ
ઓનલાઈન સિસ્ટમની ખામીઓ ઉપરાંત, ખેડૂતો સર્વેની પ્રક્રિયામાં પણ ભેદભાવ થતો હોવાની ફરિયાદ કરી રહ્યા છે. એક ખેડૂતે જણાવ્યું કે તેમનું ખેતર નદી કિનારે હોવાથી સંપૂર્ણપણે ધોવાઈ ગયું હોવા છતાં, તેમનું નામ સહાય સૂચીમાં સામેલ નથી. સર્વે થયો હોવા છતાં નામ ન હોવાને લઈને સવાલો ઉઠી રહ્યા છે. ખેડૂતોનું કહેવું છે કે સરકાર પાસે ડેટા હોવા છતાં ખેડૂતોને વારંવાર દોડધામ કરાવવામાં આવી રહી છે. આ ઉપરાંત, જે સહાય જાહેર કરાઈ છે તે પણ પૂરતી નથી, ખેડૂતો તેને "લોલીપોપ જેવી સહાય" ગણાવી રહ્યા છે.
ખેડૂતોની માંગ: સહાય નહીં, સહજ વ્યવસ્થા આપો
ખડપીપળીના ખેડૂતોનો આક્રોશ માત્ર સહાયની રકમ સામે નથી, પરંતુ આ જટિલ અને ટેક્નિકલ ખામીઓથી ભરેલી સિસ્ટમ સામે છે. ખેડૂતો સહાય નહીં, પરંતુ એક સહજ વ્યવસ્થા ની માંગ કરી રહ્યા છે, જેથી તેઓ આ ફોર્મ ભરવાની ઝંઝટમાંથી મુક્ત થઈને આગામી રવિ પાક માટે ખેતરમાં ધ્યાન કેન્દ્રિત કરી શકે. ખેડૂતોનું કહેવું છે કે આ નુકસાનીમાંથી બહાર નીકળતા તેમને આગામી ત્રણ વર્ષ લાગી જશે, ત્યારે સરકારે તાત્કાલિક ધોરણે આ ટેક્નિકલ સિસ્ટમમાં સુધારો કરવો જોઈએ.
ટોપ સ્ટોરી
ટ્રેન્ડિંગ સમાચાર
