Bihar Floor Test: બિહારમાં આજે ફ્લોર ટેસ્ટ, CM નીતિશ કુમારે કહ્યુ- 'બધુ કંન્ટ્રોલમાં છે'
Bihar Floor Test: જેડીયુએ શનિવારે નવી રચાયેલી સરકારના વિશ્વાસ મત દરમિયાન પક્ષના તમામ ધારાસભ્યોની હાજરી સુનિશ્ચિત કરવા માટે વ્હીપ જાહેર કર્યો હતો
Bihar Floor Test: બિહારમાં સોમવારે (12 ફેબ્રુઆરી) યોજાનાર ફ્લોર ટેસ્ટ પહેલા જનતા દળ યુનાઇટેડ (JDU) અને રાષ્ટ્રીય જનતા દળ (RJD) બંને તેમના ધારાસભ્યોને એક કરવાનો દાવો કરી રહ્યા છે. ફ્લોર ટેસ્ટ પહેલા JDUએ રવિવારે (11 ફેબ્રુઆરી) ધારાસભ્ય દળની બેઠક બોલાવી હતી. તેમના માટે ચિંતાનો વિષય છે કે પાર્ટીના ત્રણ ધારાસભ્યો બેઠકમાં હાજર રહ્યા ન હતા.
બેઠકમાં હાજર ન રહેનારા જેડીયુના ધારાસભ્યોમાં રૂપૌલીના ધારાસભ્ય અને પૂર્વ મંત્રી બીમા ભારતી, સુરસંડના ધારાસભ્ય દિલીપ રે અને બરબીઘાના ધારાસભ્ય સુદર્શન કુમારનો સમાવેશ થાય છે. આ પહેલા શનિવારે (10 ફેબ્રુઆરી) નેશનલ ડેમોક્રેટિક એલાયન્સ (NDA) ના છ ધારાસભ્યો મંત્રી શ્રવણ કુમારના ઘરે આયોજિત બેઠકમાં હાજર રહ્યા ન હતા.
'અમારી પાસે 128 ધારાસભ્યો છે'
જો કે, જેડીયુના મંત્રી વિજય કુમાર ચૌધરીએ ત્રણેય ધારાસભ્યોની ગેરહાજરીને બહુ મહત્વ આપ્યું ન હતું અને કહ્યું હતું કે આ બેઠકમાં તેમની ગેરહાજરી અંગે તેમણે પાર્ટીને જાણ કરી હતી. તેમણે કહ્યું, “બે-ત્રણ ધારાસભ્યો બેઠકમાં આવ્યા ન હતા, પરંતુ તેઓએ પાર્ટીને જાણ કરી હતી. તે બધા સવાર સુધીમાં અહીં આવી જશે. અમારી (NDA)ની સંખ્યા 128 છે અને અમે તેને સાબિત કરીશું.
'ચિંતા કરશો નહીં'
બેઠક બાદ સીએમ નીતિશ કુમારે કહ્યું કે ચિંતા કરવાની કોઈ વાત નથી. અમારી પાસે બહુમતીના આંકડા છે. જેડીયુના ધારાસભ્યોએ આવતીકાલે ગૃહમાં નમ્ર રહેવું જોઈએ. બીજી તરફ આરજેડીના તમામ 79 ધારાસભ્યો તેજસ્વી યાદવના સત્તાવાર નિવાસસ્થાને રોકાયા છે. કોંગ્રેસના ધારાસભ્યોને પણ સીધા હૈદરાબાદથી તેજસ્વી યાદવના ઘરે પહોંચવાનો આદેશ આપવામાં આવ્યો હતો.
જેડીયુએ શનિવારે નવી રચાયેલી સરકારના વિશ્વાસ મત દરમિયાન પક્ષના તમામ ધારાસભ્યોની હાજરી સુનિશ્ચિત કરવા માટે વ્હીપ જાહેર કર્યો હતો. જેડીયુના ચીફ વ્હીપ શ્રવણ કુમારે કહ્યું કે વ્હીપનું ઉલ્લંઘન કરનારાઓ તેમનું સભ્યપદ ગુમાવશે.
અંગત કામ માટે દિલ્હી આવેલા JDU ધારાસભ્ય શાલિની મિશ્રાએ કહ્યું કે તેમણે પાર્ટી નેતૃત્વને જાણ કરી હતી કે તેઓ દિલ્હીમાં રહેશે અને હવે તે બિહાર પરત આવી ગયા છે. તેમણે કહ્યું કે જેડીયુનો કોઈ ધારાસભ્ય નજરકેદ નથી અને તે પાર્ટી સાથે છે.
ભાજપના ધારાસભ્ય રિસોર્ટમાં શિફ્ટ થયા
નિતિશ કુમાર રવિવારે પાર્ટી ધારાસભ્યોની બેઠક માટે રાજ્ય મંત્રી વિજય કુમાર ચૌધરીના ઘરે પહોંચ્યા હતા. ફ્લોર ટેસ્ટ પહેલા બે દિવસ માટે બોધગયાના એક રિસોર્ટમાં શિફ્ટ કરાયેલા ભાજપના ધારાસભ્યો પણ રવિવારે સાંજે પટના પહોંચ્યા હતા.
પટના એસપી ચંદ્ર પ્રકાશ એસડીએમ સાથે રવિવારે મોડી રાત્રે તેજસ્વી યાદવના ઘરે પહોંચ્યા હતા. આરજેડી ધારાસભ્ય ચેતન આનંદના ભાઈએ ફરિયાદ નોંધાવી છે કે તેમના ભાઈનું આરજેડી નેતાઓ દ્વારા અપહરણ કરવામાં આવ્યું છે. જો કે, ચેતન આનંદે પોલીસને કહ્યું કે તે પોતાની મરજીથી ત્યાં ગયા હતા. જેના પછી પોલીસ પરત આવી પરંતુ તેના કારણે મોડી રાત સુધી તેજસ્વીના ઘરની સામે ડ્રામા ચાલ્યો હતો.
શું છે બિહાર વિધાનસભાનું ગણિત?
બિહાર વિધાનસભામાં કુલ 243 સીટો છે. અહીં બહુમતીનો આંકડો 122 છે. હાલમાં NDA પાસે 128 ધારાસભ્યો છે. તેમાંથી ભાજપ પાસે 78 બેઠકો છે, જેડીયુ પાસે 45 બેઠકો છે, હિન્દુસ્તાની અવામ મોરચા (એચએએમ) પાસે 4 બેઠકો છે અને એક અપક્ષ ધારાસભ્ય સુમિત સિંહ પણ છે. જ્યારે વિપક્ષની વાત કરીએ તો આરજેડીના 79, કોંગ્રેસના 19, સીપીઆઈ (એમએલ)ના 12, સીપીઆઈ (એમ)ના 2, સીપીઆઈના 2 ધારાસભ્યો છે. આ રીતે વિપક્ષ પાસે કુલ 114 ધારાસભ્યો છે.
ટ્રેન્ડિંગ સમાચાર
ટોપ સ્ટોરી
