નસીબનું તાળું ખુલી ગયું!' બિહારના નવાદાના મજૂર મિથુન કુમારે ડ્રીમ-૧૧માં જીત્યા ૪ કરોડ રૂપિયા

ઈંટના ભઠ્ઠામાં કામ કરતા અને ટ્રક ચલાવતા યુવકનું નસીબ રાતોરાત ચમક્યું, રવિવારે રાજસ્થાન અને પંજાબની મેચમાં ટીમ બનાવી જીત્યા, ૧૫ વર્ષ પહેલા પતિ ગુમાવનાર માતાએ એકલા સંતાનો ઉછેર્યા હતા.

મજૂરીકામ કરતો યુવક ડ્રીમ11માં જીત્યો 4 કરોડ રૂપિયા

Source : ABP Live

Mithun Kumar Dream11 winner: નસીબ અને પ્રયત્નનો અનોખો સંગમ જોવા મળ્યો છે બિહારના નવાદા જિલ્લામાં, જ્યાં એક સામાન્ય મજૂરી કરતા યુવકે ઓનલાઈન ગેમિંગ પ્લેટફોર્મ ડ્રીમ-૧૧ (Dream11) પર કરોડો રૂપિયા જીતીને પોતાના અને પોતાના પરિવારનું નસીબ રાતોરાત બદલી નાખ્યું છે. નવાદાના અમીપુર ગામના રહેવાસી મિથુન કુમાર નામના આ યુવકે રવિવારે ડ્રીમ-૧૧માં ટીમ બનાવીને ૪ કરોડ રૂપિયાનું જેકપોટ જીત્યો છે. આ સમાચાર આસપાસના વિસ્તારોમાં વાયુવેગે પ્રસરતા, સોમવારે ગામના લોકો મિથુનને મળવા માટે તેના ઘરે ઉમટી પડ્યા હતા, જેના કારણે પરિવારને મિથુનને સલામતી અને ગોપનીયતા જાળવવા માટે ઘરમાંથી બીજે ક્યાંક મોકલી દેવાની ફરજ પડી હતી.

ઈંટના ભઠ્ઠામાં મજૂરી કરી, ટ્રક પણ ચલાવી

મિથુન કુમારનો પરિવાર અત્યંત સાધારણ આર્થિક પરિસ્થિતિ ધરાવે છે. મિથુન પોતે પણ ભૂતકાળમાં ઈંટના ભઠ્ઠામાં મજૂરી કરતો હતો. બાદમાં તેણે ટ્રક ચલાવવાનું પણ શરૂ કર્યું હતું. તેની માતા જરિયા દેવીએ સોમવારે એક ન્યૂઝ ચેનલ સાથેની વાતચીતમાં જણાવ્યું કે, તેમનો દીકરો છેલ્લા સાત વર્ષથી ડ્રીમ-૧૧ રમી રહ્યો છે. તેમણે ઘણી વાર મિથુનને આ રમત રમવાની મનાઈ પણ કરી હતી, જોકે મિથુન શાંતિથી પોતાની રમત રમવાનું ચાલુ રાખ્યું હતું.

માતાનો સંઘર્ષ અને ભાવુકતા

ચાર કરોડ રૂપિયા જીતવાની ખુશી વચ્ચે, મિથુનની માતા જરિયા દેવી ભાવુક પણ દેખાતા હતા. તેમણે પોતાની સંઘર્ષગાથા વર્ણવતા જણાવ્યું કે, તેમના પતિનું આશરે ૧૫ વર્ષ પહેલા અવસાન થયું હતું. પતિના અવસાન પછી, તેમણે એકલા હાથે ઘણી મુશ્કેલીઓ વેઠીને પોતાના ચાર બાળકો (ત્રણ દીકરા અને એક દીકરી) ને ઉછેર્યા હતા. પરિવારની આર્થિક સ્થિતિ ખૂબ જ નબળી હતી અને તેઓ ઈંટના ભઠ્ઠામાં કામ કરીને ઘરનું ગુજરાન ચલાવતા હતા. તેમણે આશા વ્યક્ત કરી કે, હવે દીકરાની આ જીતથી પરિવારની બધી સમસ્યાઓનો અંત આવી જશે. મિથુન ત્રણ દીકરાઓમાં સૌથી નાનો છે.

રાજસ્થાન અને પંજાબની મેચમાં ચમક્યું નસીબ

મળતી માહિતી મુજબ, મિથુને રવિવારે (૧૮ મે, ૨૦૨૫) ઇન્ડિયન પ્રીમિયર લીગ (IPL) માં રાજસ્થાન રોયલ્સ અને પંજાબ કિંગ્સ વચ્ચે રમાયેલી મેચ માટે ડ્રીમ-૧૧ પર પોતાની ટીમ બનાવી હતી. આ ટીમે મિથુનનું નસીબ બદલી નાખ્યું. નવાદાના રહેવાસી મિથુને આ કોન્ટેસ્ટમાં ટીમ ફોર્મેશનમાં ત્રીજો રેન્ક મેળવ્યો અને ૧૧૮૩.૫ પોઈન્ટ હાંસલ કર્યા. મેચ સમાપ્ત થયા પછી, જ્યારે પરિણામ જાહેર થયું ત્યારે જાણવા મળ્યું કે મિથુને ૪ કરોડ રૂપિયાની મોટી રકમ જીતી લીધી છે.

ગામલોકો ઉમટી પડ્યા, મિથુનને બીજે મોકલવો પડ્યો

મિથુને ૪ કરોડ રૂપિયા જીત્યા હોવાના સમાચાર ગામ અને આસપાસના વિસ્તારોમાં ફેલાતાની સાથે જ સોમવારે ગામના લોકો અને અન્ય જિજ્ઞાસુ લોકો મિથુનને મળવા માટે તેના ઘરે મોટી સંખ્યામાં પહોંચવા લાગ્યા. અચાનક ઉમટી પડેલી ભીડ અને પરિસ્થિતિને જોતા, પરિવારે સલામતી અને ગોપનીયતા જાળવવા માટે મિથુનને બીજે ક્યાંક સુરક્ષિત સ્થળે મોકલી દેવાનો નિર્ણય લીધો હતો.