કોંગ્રેસ શાસિત રાજ્યમાં મોટો ડખો, હાઈકમાન્ડે મુખ્યમંત્રીને રાજીનામું આપવા કહ્યું, જાણો શું છે કારણ?

karnataka cm leadership change: દિલ્હીમાં ચાલી રહેલી હાઈવોલ્ટેજ બેઠકો વચ્ચે કર્ણાટકના મુખ્યમંત્રી બદલાવવાની અટકળો તેજ બની છે. જોકે, કોંગ્રેસ હાઈકમાન્ડે આ વાતોને માત્ર અફવા ગણાવી છે.

karnataka congress crisis siddaramaiah resignation dk shivakumar cm

Source : ANI

Show Quick Read

Key points generated by AI, verified by newsroom

• સિદ્ધારમૈયાના સ્થાને ડીકે શિવકુમાર CM બનશે એવી ચર્ચા.
• ડીકે શિવકુમારના સમર્થકો કહે છે, હાઈકમાન્ડે રાજીનામું માંગ્યું.
• કોંગ્રેસ હાઈકમાન્ડે CM બદલવાની વાતને અફવા ગણાવી.
• રાજ્યસભા ચૂંટણી માટે ઉમેદવારો નક્કી કરવા બેઠક યોજાઈ.

karnataka cm leadership change: કર્ણાટકના રાજકારણમાં હાલમાં ભારે ગરમાવો આવી ગયો છે. એવી જોરદાર ચર્ચાઓ ચાલી રહી છે કે કોંગ્રેસ હાઈકમાન્ડે મુખ્યમંત્રી સિદ્ધારમૈયાને પોતાનું પદ છોડવા માટે કહી દીધું છે અને તેમની જગ્યાએ ડેપ્યુટી CM ડીકે શિવકુમારને રાજ્યની કમાન સોંપવામાં આવી શકે છે. આ મુદ્દે દિલ્હીમાં મોટા નેતાઓની બેઠકોનો દોર ચાલુ છે. જોકે, બીજી તરફ કોંગ્રેસ પાર્ટી સત્તાવાર રીતે આ વાતને નકારી રહી છે અને તેને માત્ર પાયાવિહોણી અફવા ગણાવી રહી છે. તો ચાલો સાદી ભાષામાં સમજીએ કે આખરે અંદરખાને શું રંધાઈ રહ્યું છે અને આ અટકળો પાછળનું સત્ય શું છે.

શું સિદ્ધારમૈયા રાજીનામું આપશે?

સૂત્રોનું માનીએ તો, ડીકે શિવકુમારની નજીકના લોકો એવો દાવો કરી રહ્યા છે કે હાઈકમાન્ડે સિદ્ધારમૈયાને સીએમ પદ પરથી રાજીનામું આપવાનો આદેશ આપી દીધો છે. એવું પણ કહેવાઈ રહ્યું છે કે સિદ્ધારમૈયાએ ખુરશી છોડવા માટે હાઈકમાન્ડ પાસે થોડો સમય માંગ્યો છે, પરંતુ તેઓ સમય પહેલાં પણ રાજીનામું આપી શકે છે. આ મામલાની ગંભીરતા ત્યારે વધી ગઈ જ્યારે રાહુલ ગાંધીએ સિદ્ધારમૈયા સાથે અલગથી એક ખાનગી મુલાકાત કરી. જોકે, અત્યારે સ્થિતિ થોડી અસ્પષ્ટ છે, પણ રાજકીય હિલચાલ એટલી તેજ છે કે આવનારા થોડા જ દિવસોમાં કોઈ મોટો નિર્ણય આવી શકે છે.

કોંગ્રેસે કહ્યું: "આ બધી માત્ર અટકળો છે"

આ બધી ચર્ચાઓ વચ્ચે મંગળવારે કોંગ્રેસ હાઈકમાન્ડે નેતૃત્વ પરિવર્તનની વાતોને સાવ પાયાવિહોણી ગણાવી દીધી હતી. નવી દિલ્હીમાં કોંગ્રેસ મુખ્યાલય (ઇન્દિરા ભવન) ખાતે પાર્ટી અધ્યક્ષ મલ્લિકાર્જુન ખડગે, રાહુલ ગાંધી, કેસી વેણુગોપાલ અને રણદીપ સુરજેવાલા વચ્ચે એક લાંબી બેઠક ચાલી હતી, જેમાં સિદ્ધારમૈયા અને ડીકે શિવકુમાર પણ હાજર હતા.

આ મહત્વની બેઠક બાદ કેસી વેણુગોપાલે મીડિયાને સ્પષ્ટ કહ્યું કે, સીએમ બદલવાના અહેવાલો માત્ર અફવા છે અને તેમાં કોઈ સત્ય નથી. તેમણે ખુલાસો કર્યો કે આ બેઠક ખાસ કરીને આગામી રાજ્યસભા અને વિધાન પરિષદની ચૂંટણીઓ માટે ઉમેદવારો નક્કી કરવા માટે બોલાવવામાં આવી હતી.

આ પણ વાંચોઃ ભાજપ પાસે 33 બેઠકો છતાં પ્રમુખ 7 બેઠકો વાળી કોંગ્રેસના! આણંદ જીલ્લા પંચાયતમાં સર્જાયો મોટો ઉલટફેર

રાજ્યસભાની ચૂંટણી અને CM બદલવાની ફોર્મ્યુલા

તમને જણાવી દઈએ કે, કર્ણાટકમાં રાજ્યસભાની 4 સીટો ખાલી થઈ રહી છે, જેમાંથી 3 સીટો કોંગ્રેસ અને 1 સીટ ભાજપ જીતે તેવી પૂરી શક્યતા છે. મલ્લિકાર્જુન ખડગેનો કાર્યકાળ પૂરો થઈ રહ્યો હોવાથી તેઓ ફરીથી ચૂંટણી લડશે. સમાચાર એજન્સીઓના સૂત્રોનું કહેવું છે કે પાર્ટીમાં કેટલાક નેતાઓએ એવું સૂચન કર્યું છે કે સિદ્ધારમૈયાને રાજ્યસભામાં મોકલી દેવામાં આવે અને કર્ણાટકની ખુરશી ડીકે શિવકુમારને સોંપવામાં આવે.

જોકે, સિદ્ધારમૈયા વારંવાર એવું કહી ચૂક્યા છે કે તેઓ પોતાના 5 વર્ષનો કાર્યકાળ પૂરો કરશે. જ્યારે ડીકે શિવકુમારનું કહેવું છે કે પાર્ટી નેતૃત્વ જે પણ નિર્ણય લેશે તે તેમને મંજૂર રહેશે. ભલે હાલ પૂરતું પાર્ટીએ આ અટકળો પર પૂર્ણવિરામ મૂકવાનો પ્રયાસ કર્યો હોય, પરંતુ કર્ણાટક કોંગ્રેસમાં કોઈ મોટો ફેરફાર થવાની ચર્ચાઓ હજુ પણ બજારમાં ગરમ છે.

આ પણ વાંચોઃ મોરબીમાં મોટો ખેલ: 17 બેઠકો સાથે બહુમતી છતાં ભાજપ પ્રમુખ પદથી વંચિત, કોંગ્રેસને મળ્યો તાજ!