બિહારના રાજકારણમાં મોટો ઉલટફેર: નીતિશ કુમારની વિદાય, ભાજપના આ નેતા બનશે મુખ્યમંત્રી, નામ થયું ફાઈનલ

ભાજપ વિધાનસભા પક્ષના નેતા તરીકે સમ્રાટ ચૌધરીની પસંદગી; 15 એપ્રિલે લોકભવનમાં લેશે શપથ. રાજીનામું આપ્યા બાદ નીતિશ કુમારે કહ્યું- 'નવી સરકારને મારો પૂરો ટેકો અને માર્ગદર્શન રહેશે.'

Samrat Choudhary to be Bihar CM, BJP Elected Leader Sworn in Tomorrow

Source : ANI

Show Quick Read

Key points generated by AI, verified by newsroom

• નીતિશ કુમારે મુખ્યમંત્રી પદેથી રાજીનામું આપ્યું, સમ્રાટ ચૌધરી બનશે મુખ્યમંત્રી.
• નીતિશ કુમારે નવી સરકારને સંપૂર્ણ ટેકો જાહેર કર્યો, વડાપ્રધાનનો આભાર માન્યો.
• નીતિશ કુમારે 2005 થી અત્યાર સુધીના વિકાસ કાર્યોની યાદ અપાવી.
• 2025-2030 માટે '7 નિશ્ચય-3' રોડમેપ સાથે પ્રગતિનો વિશ્વાસ વ્યક્ત કર્યો.

Samrat Choudhary Bihar CM: બિહારના રાજકારણમાં એક ઐતિહાસિક અને મોટો ફેરફાર જોવા મળ્યો છે. લાંબા સમય સુધી સત્તાનું સુકાન સંભાળ્યા બાદ નીતિશ કુમારે મુખ્યમંત્રી પદ પરથી રાજીનામું આપી દીધું છે અને હવે રાજ્યની કમાન સમ્રાટ ચૌધરીના હાથમાં જશે. સમ્રાટ ચૌધરીને સર્વાનુમતે ભાજપ વિધાનસભા પક્ષના નેતા તરીકે ચૂંટી કાઢવામાં આવ્યા છે અને તેઓ આવતીકાલે, 15 એપ્રિલે મુખ્યમંત્રી પદના શપથ લેશે. રાજીનામું આપ્યા બાદ નીતિશ કુમારે નવી સરકારને પોતાનો સંપૂર્ણ ટેકો જાહેર કર્યો છે અને વડાપ્રધાન નરેન્દ્ર મોદીનો આભાર માનતા બિહારના ઉજ્જવળ ભવિષ્યની આશા વ્યક્ત કરી છે.

એક જ કારમાં રાજભવન પહોંચ્યા નીતિશ અને સમ્રાટ

આજે બિહારના રાજકારણમાં ભારે હલચલ જોવા મળી હતી. નીતિશ કુમારે સત્તાવાર રીતે પોતાનું રાજીનામું રાજ્યપાલને સોંપી દીધું છે. આ ઘટનાક્રમમાં સૌથી ખાસ વાત એ રહી કે, તેઓ સમ્રાટ ચૌધરી અને વિજય ચૌધરી સાથે એક જ કારમાં બેસીને રાજભવન પહોંચ્યા હતા. આ પહેલા, રાષ્ટ્રીય અધ્યક્ષ નીતિન નવીને પણ નીતિશ કુમાર સાથે ખાસ મુલાકાત કરી હતી, જેમાં સમ્રાટ ચૌધરી સહિત ભાજપના અનેક દિગ્ગજ નેતાઓ હાજર રહ્યા હતા. NDA ની બેઠક બાદ આ અંગેની ઔપચારિક જાહેરાત કરવામાં આવશે અને 15 એપ્રિલે લોકભવન ખાતે શપથ ગ્રહણ સમારોહ યોજાશે.

"નવી સરકારને મારો પૂરો ટેકો રહેશે": નીતિશ કુમાર

આજે નીતિશ કુમારની અધ્યક્ષતામાં તેમની સરકારની મંત્રીમંડળની છેલ્લી બેઠક પણ યોજાઈ હતી. રાજીનામું આપ્યા પછી તરત જ તેમણે સોશિયલ મીડિયા પ્લેટફોર્મ 'X' પર પોસ્ટ કરીને કહ્યું હતું કે, "હવે અહીં નવી સરકાર કાર્યભાર સંભાળશે. આ નવી સરકારને મારો પૂરેપૂરો ટેકો રહેશે. આગળ બહુ સારા કામ થશે અને બિહાર ખૂબ પ્રગતિ કરશે." છેલ્લી બેઠકમાં પોતાની સફરને યાદ કરતા તેમણે કહ્યું કે, "હું 2005 માં સત્તામાં આવ્યો હતો, ત્યારથી મારાથી જેટલું બની શક્યું તેટલું મેં બિહાર માટે કર્યું છે. આવનારી નવી સરકારને પણ હંમેશા મારું માર્ગદર્શન મળતું રહેશે."

2005 થી અત્યાર સુધીની સફર અને ભવિષ્યનો રોડમેપ

મુખ્યમંત્રી પદેથી રાજીનામું આપ્યા બાદ મીડિયા સાથે વાત કરતા નીતિશ કુમારે 24 નવેમ્બર, 2005 નો એ દિવસ યાદ કર્યો જ્યારે રાજ્યમાં પહેલીવાર NDA ની સરકાર બની હતી. તેમણે કહ્યું કે, "ત્યારથી લઈને અત્યાર સુધી રાજ્યમાં કાયદાનું શાસન છે અને વિકાસના કામો સતત ચાલુ છે. અમારી સરકારે કોઈ ભેદભાવ વિના હિન્દુ, મુસ્લિમ, સવર્ણ, પછાત, દલિત કે મહાદલિત – દરેક વર્ગ માટે કામ કર્યું છે. શિક્ષણ, આરોગ્ય, રસ્તા, વીજળી અને ખેતીથી લઈને મહિલાઓ અને યુવાનો માટે મોટા પાયે કામ થયા છે."

ભવિષ્યના આયોજન વિશે વાત કરતા તેમણે જણાવ્યું કે, આગામી 5 વર્ષ એટલે કે 2025 થી 2030 માટે '7 નિશ્ચય-3' નો રોડમેપ તૈયાર કરવામાં આવ્યો છે, જેનાથી બિહારમાં નોંધપાત્ર પ્રગતિ થશે. અંતમાં તેમણે કેન્દ્ર સરકાર અને પીએમ મોદીનો આભાર માનતા કહ્યું કે, "અમે બિહારના લોકો માટે લાંબા સમય સુધી સેવા કરી છે. હવે મેં રાજીનામું આપવાનો નિર્ણય લીધો છે. મને પૂરો વિશ્વાસ છે કે કેન્દ્રના સહયોગથી બિહાર વધુ ઝડપથી વિકાસ કરશે અને દેશના ટોચના રાજ્યોમાં પોતાનું સ્થાન બનાવશે."

આ પણ વાંચો

ખતરાની ઘંટી! 2026 માં ચોમાસું રહેશે નબળું, અલ નીનોના કારણે વરસાદ ઘટવાની IMD ની આગાહી