રાજકોટ જિલ્લાના ગોંડલ, જેતપુર, ધોરાજી અને ઉપલેટામાં મૂશળધાર વરસાદથી જળબંબાકાર 

આજે વહેલી સવારથી જ રાજકોટ જિલ્લામાં મેઘરાજા મહેરબાન થયા છે. રાજકોટના ગોંડલમાં વરસાદે તોફાની બેટીંગ કરી છે.

ગોંડલમાં વરસાદ

રાજકોટ:  આજે વહેલી સવારથી જ રાજકોટ જિલ્લામાં મેઘરાજા મહેરબાન થયા છે. રાજકોટના ગોંડલમાં વરસાદે તોફાની બેટીંગ કરી છે. રાજકોટ જિલ્લાના ગોંડલ, જેતપુર, ધોરાજી અને ઉપલેટામાં ધોધમાર વરસાદ વરસ્યો છે. ભારે વરસાદથી નીચાણવાળા વિસ્તારો જળમગ્ન થયા છે. 

ગોંડલમાં 3 ઈંચ વરસાદ ખાબકતા રસ્તાઓ બન્યા નદી

રાજકોટ શહેરના અલગ અલગ વિસ્તારોમાં વરસાદ શરૂ થયો છે. સવારથી લઈને અત્યાર સુધીમાં એકથી દોઢ ઇંચ જેટલો વરસાદ પડ્યો છે. હજી પણ રાત સુધીમાં ભારે વરસાદ પડે તેવું વાતાવરણ જોવા મળી રહ્યું છે. તો બીજી તરફ જિલ્લામાં સૌથી વધુ ગોંડલ તાલુકામાં ત્રણ ઇંચ જેટલો વરસાદ પડ્યો છે. ગોંડલ તાલુકાના અનેક ગામડાઓમાં ધોધમાર વરસાદ પડ્યો છે. તો ગોંડલ શહેરના અલગ અલગ વિસ્તારોમાં પણ પાણી ભરાયા છે. લોકોને અવર જવર કરવામાં મુશ્કેલીનો સામનો કરવો પડી રહ્યો છે.

ગોંડલ તાલુકાના કોલીથડ, બિલિયાળા, ભુણાવા, ભરૂડી, શાપર વેરાવળ, સડકપીપળીયા સહિતના વિસ્તારમાં વરસાદી માહોલ જોવા મળી રહ્યો છે. પંથકમાં પવન સાથે ધોધમાર વરસાદ પડી રહ્યો છે. ગોંડલ રાજકોટ નેશનલ હાઇવે પર ભારે વરસાદના કારણે વિઝીબિલિટી ઘટી છે. 

જેતપુરમાં ધોધમાર વરસાદ

રાજકોટ જિલ્લાના જેતપુરમાં મેઘરાજાએ તોફાની બેટીંગ કરી છે. ભારે વરસાદના કારણે જેતપુર શહેરના નીચાણવાળા વિસ્તારોમાં પાણી ભારાયા છે. શહેરના નવાગઢ વિસ્તારમાં આવેલ ગઢની રાંગ વિસ્તારમાં હોકળાના પાણી શેરીમાં ઘુસી ગયા હતા.  ગઢની રાંગ વિસ્તારમાં પાણી ફરી વરતા બાળકોએ સ્વિમિંગ પુલની જેમ ન્હાયા  હતા. જેતપુર નવાગઢ વિસ્તારમાં ભારે વરસાદને કારણે અનેક વિસ્તારમાં પાણી ભરાયા છે. જેતપુરના વડલી ચોક, લાદી રોડ,  એમજી રોડ,  કણકિયા પ્લોટ,  હોસ્પિટલ વિસ્તારમાં પાણી ભરાયા હતા. 

ધોરાજી-ભાયાવદર વચ્ચે પુલની દિવાલ ધરાશાયી

રાજ્યમાં સાર્વત્રિક વરસાદની સ્થિતિ છે. નાની વાવડી ગામે પુલની દિવાલ ધરાશાયી થતાં વાહન ચાલકો જીવના જોખમે પુલ  પસાર કરી રહ્યા છે . કોઇ મોટી દુર્ઘટના સર્જાય તે પહેલા જ સમારકામ કરવાની માંગણી ગ્રામજનો કરી રહ્યાં છે.  

ગુજરાતમાં બે દિવસ ધોધમાર વરસાદની આગાહી

ગુજરાતમાં આજે વહેલી સવારથી જ મેઘરાજા મહેરબાજન છે. રાજ્યના અનેક જિલ્લાઓમાં જળબંબાકારની સ્થિતિ છે. હવામાન વિભાગની આગાહી વચ્ચે અનેક જિલ્લાઓમાં વરસાદ વરસ્યો છે. રાજ્યમાં હજુ પણ બે દિવસ વરસાદની આગાહી હવામાન વિભાગ દ્વારા કરવામાં આવી છે. ગુજરાતમાં આગામી 2 દિવસ મેઘરાજા તોફાની બેટીંગ કરશે.   ત્યારબાદ વરસાદ વિરામ લેશે. 

હવામાન વિભાગના જણાવ્યા અનુસાર મંગળવાર સુધી મેઘરાજા મન મૂકીને વરસશે.  બુધવારથી મેઘરાજા ખમૈયા કરશે.  આજે કચ્છ, સુરેન્દ્રનગર, મોરબી, રાજકોટ, જામનગર, પોરબંદર, જૂનાગઢ, અમરેલી, દ્વારકા, ગીર સોમનાથ, અમદાવાદ, બનાસકાંઠા, સાબરકાંઠા, અરવલ્લી, મહેસાણા, ગાંધીનગર, સુરત અને ભરૂચ જિલ્લામાં વરસાદની આગાહી હતી. આવતીકાલે સોમવારે અમદાવાદ, સુરેન્દ્રનગર, જૂનાગઢ, ભાવનગર, બોટાદ, પાટણ, સાબરકાંઠા, આણંદ, ભરૂચ અને વડોદરામાં મૂશળધાર વરસાદની આગાહી કરવામાં આવી છે.  હવામાન વિભાગની આગાહી અનુસાર  11 જુલાઈના અમરેલી, ભાવનગર, સુરત, ભરૂચ, નવસારી અને વલસાડ જિલ્લામાં  ધોધમાર વરસાદ વરસી શકે છે.  

આગાહીકાર અંબાલાલ પટેલનું કહેવું છે કે, ઉત્તર ગુજરાતમાં ભારેથી અતિભારે વરસાદ વરસશે. આ સાથે જ સૌરાષ્ટ્ર અને મધ્ય ગુજરાત પણ પાણી-પાણી થશે.