Vadodara Rain: વડોદરા જિલ્લામાં જામ્યો વરસાદી માહોલ, ડભોઈ અને શિનોરમાં વરસ્યો વરસાદ
વડોદરા જિલ્લામાં આજે વહેલી સવારથી જ વરસાદી માહોલ જામ્યો છે. વડોદરાના ડભોઇ અને શિનોર પંથકમાં લાંબા વિરામ બાદ ફરી વરસાદી ઝાપટાં પડતાં વાતાવરણમાં ઠંડક પ્રસરી ગઈ છે.
- વડોદરા જિલ્લામાં ડભોઈ, શિનોરમાં વરસાદી માહોલ જામ્યો હતો.
- લાંબા વિરામ બાદ વરસાદથી વાતાવરણમાં ઠંડક પ્રસરી.
- અગાઉ ઓછા વરસાદથી ખેડૂતોને પાક નુકસાન થયું હતું.
- હવે સારા વરસાદથી પાકને નવજીવન મળવાની ખેડૂતોને આશા.
Vadodara Rain: વડોદરા જિલ્લામાં આજે વહેલી સવારથી જ વરસાદી માહોલ જામ્યો છે. વડોદરાના ડભોઇ અને શિનોર પંથકમાં લાંબા વિરામ બાદ ફરી વરસાદી ઝાપટાં પડતાં વાતાવરણમાં ઠંડક પ્રસરી ગઈ છે. વહેલી સવારથી વાદળછાયું વાતાવરણ બાદ શહેર અને ગ્રામ્ય વિસ્તારોમાં હળવાથી મધ્યમ વરસાદ નોંધાયો હતો. બીજી તરફ, સમગ્ર ચોમાસા દરમિયાન ઓછા વરસાદને કારણે શિનોર અને કરજણ પંથકના ખેડૂતોને ત્રણથી ચાર વખત બિયારણ કરવું પડતાં ભારે આર્થિક નુકસાન વેઠવું પડ્યું છે. હવે ખેડૂતો સારા વરસાદની આશા સાથે આકાશ તરફ મીટ માંડીને બેઠા છે.
ડભોઇ શહેરમાં લાંબા વિરામ બાદ વરસાદી ઝાપટાં
ડભોઇ શહેરમાં લાંબા વિરામ બાદ વરસાદની એન્ટ્રી થતાં લોકોને ગરમી અને ઉકળાટમાંથી રાહત મળી હતી. ડભોઇ શહેર, ટાવર બજાર, ઝારોલા વાગા, જૈન વાગા, શિનોર રોડ અને લાઠી બજાર સહિતના વિસ્તારોમાં વરસાદી ઝાપટાં જોવા મળ્યા હતા. શહેર ઉપરાંત તાલુકાના અનેક વિસ્તારોમાં પણ છૂટોછવાયો વરસાદ નોંધાતા વાતાવરણ ખુશનુમા બન્યું હતું.
તાલુકાના ગામડાઓમાં પણ વરસાદનું આગમન
ડભોઇ તાલુકાના તિલકવાડા રોડ, સીતપુર, ધરમપુરી, વડજ સહિતના ગામોમાં પણ વરસાદી ઝાપટાં પડ્યા હતા. વહેલી સવારથી વાદળછાયું વાતાવરણ છવાયેલું હતું અને ત્યારબાદ વરસાદ શરૂ થતાં ખેડૂતો અને ગ્રામજનોમાં ખુશીનો માહોલ જોવા મળ્યો હતો.
શિનોર પંથકમાં વરસાદ
વડોદરાના શિનોર પંથકમાં પણ આકાશ કાળા ડીબાંગ વાદળોથી છવાઈ ગયું હતું. ત્યારબાદ સાધલી સહિતના અનેક ગામોમાં ધીમીધારે વરસાદ શરૂ થયો હતો. વરસાદને કારણે ખેતી માટે અનુકૂળ વાતાવરણ સર્જાયું છે અને ખેડૂતોમાં આશાનું નવું કિરણ જોવા મળ્યું છે.
સારા વરસાદની રાહમાં ખેડૂતો
ચોમાસાની સિઝન હજુ ચાલુ હોવાથી ખેડૂતોને આગામી દિવસોમાં સારા વરસાદની આશા છે. જો આગામી દિવસોમાં પૂરતો વરસાદ પડશે તો પાકને નવજીવન મળશે અને ખેડૂતોને થયેલા નુકસાનમાંથી રાહત મળી શકે છે.
ગુજરાતમાં વરસાદને લઈ હવામાન વિભાગની આગાહી
હવામાનના કેટલાક મોડલના અભ્યાસ જણાવે છે કે, બંગાળની ખાડીમાં 18 જુલાઇની આસપાસ એક સિસ્ટમ એક્ટિવ થઇ શકે છે. જેના કારણે ગુજરાત તરફ આવતા પવનને ભેજ મળતાં ગુજરાતમાં ફરી વરસાદનો રાઉન્ડ શરૂ થઇ શકે છે. હવામાન વિભાગની આગાહી મુજબ આ સિસ્ટમ જો ક્રિએટ થાય તો પૂર્વ ગુજરાત, સૌરાષ્ટ્ર અને દક્ષિણ ગુજરાતના કેટલાક જિલ્લામાં મધ્યમ વરસાદ વરસી શકે છે. આ ઉપરાંત જુલાઇના અંતમાં એટલે કે 27 જુલાઇથી પણ ફરી રાજ્યમાં વરસાદનું અનુમાન વ્યક્ત કરવામાં આવ્યું છે.
ટોપ સ્ટોરી
ટ્રેન્ડિંગ સમાચાર
