UNGA: ભારતમાં ડિજિટલ વિકાસની UNમાં થઇ પ્રશંસા, UNGA અધ્યક્ષે કહ્યુ- તેનાથી લાખો લોકોને થયો ફાયદો

UNGA: સંયુક્ત રાષ્ટ્ર મહાસભાના પ્રમુખ ડેનિસ ફ્રાન્સિસે ભારતના ડિજિટલ પબ્લિક ઈન્ફ્રાસ્ટ્રક્ચરની પ્રશંસા કરી છે

ફોટોઃ ટ્વિટર

UNGA:સંયુક્ત રાષ્ટ્ર મહાસભાના પ્રમુખ ડેનિસ ફ્રાન્સિસે ભારતના ડિજિટલ પબ્લિક ઈન્ફ્રાસ્ટ્રક્ચરની પ્રશંસા કરી છે. ભારતની પ્રગતિનું ઉદાહરણ આપતા ડેનિસ ફ્રાન્સિસે જણાવ્યું હતું કે ભારતનો વિકાસ એ એક ઉદાહરણ છે કે કેવી રીતે ડિજિટલ પબ્લિક ઇન્ફ્રાસ્ટ્રક્ચર સામાજિક પરિવર્તન અને પ્રગતિ માટેનું એક માધ્યમ છે અને જો તેનો સમાવેશી રીતે ઉપયોગ કરવામાં આવે તો તે બધા માટે સમાન તકો પૂરી પાડી શકે છે.

ડિજિટલ ઈન્ફ્રાસ્ટ્રક્ચર ભારતમાં વિકાસને વેગ આપે છે

સંયુક્ત રાષ્ટ્ર મહાસભાના પ્રમુખે જનરલ એસેમ્બલીના 78મા સત્ર દરમિયાન પોતાના સંબોધનમાં કહ્યું કે 'તેઓ આ વર્ષે જાન્યુઆરીમાં ભારતની મુલાકાતે આવ્યા હતા. આ સમય દરમિયાન તેમણે ભારતમાં ડિજિટલ ઈન્ફ્રાસ્ટ્રક્ચરના મોટા પાયે વિસ્તરણના સાક્ષી બન્યા હતા. જેઓ અગાઉ આર્થિક વ્યવસ્થામાંથી બહાર રહી ગયા હતા તે લાખો લોકોને ડિજિટલ ઈન્ફ્રાસ્ટ્રક્ચરના વિકાસ દ્વારા નાણાકીય સ્વતંત્રતા અને સમૃદ્ધિ પ્રાપ્ત કરવા માટે સક્ષમ બનાવ્યા,. તેમણે કહ્યું, 'જેમ આર્થિક વિકાસ માટે ઈન્ફ્રાસ્ટ્રક્ચરની જરૂર છે, તેવી જ રીતે ડિજિટલ પબ્લિક ઈન્ફ્રાસ્ટ્રક્ચર સામાજિક પરિવર્તન અને પ્રગતિના વાહક તરીકે ઉભરી આવ્યું છે. સમાવેશી રીતે તેનો અમલ કરીને બધાને સમાન તકો પૂરી પાડી શકાય.

વિશ્વના 60 ટકા ડિજિટલ વ્યવહારો ભારતમાં થાય છે

ફ્રાન્સિસે કહ્યું હતું કે માત્ર સાત વર્ષોમાં ભારતે તેના ડિજિટલ ઈન્ફ્રાસ્ટ્રક્ચરનો વિકાસ કરીને તેના નાગરિકો માટે 80 ટકાથી વધુ નાણાકીય સમાવેશ હાંસલ કર્યો છે, જે વિશ્વભરના તમામ ડિજિટલ વ્યવહારોમાં 60 ટકાથી વધુ હિસ્સો ધરાવે છે. ડિજિટલ ટ્રાન્ઝેક્શનની સિસ્ટમે ઘણી સમસ્યાઓ દૂર કરી છે. આનાથી નાણાકીય ક્ષેત્રમાં પહોંચ અને પોષણક્ષમતા વધી છે. સિટિઝન સ્ટેક જેવા મોડલ દક્ષિણ એશિયાના તમામ દેશોમાં લાગુ કરવા જોઈએ. આનાથી લોકોને ખાસ કરીને નબળા વર્ગોના સશક્તિકરણમાં મદદ મળે છે.

ટેક્નોલોજીના ઉપયોગમાં ભારત વૈશ્વિક લીડર બન્યું છે

ડેનિસ ફ્રાન્સિસે કહ્યું કે વિશ્વની ત્રણ અબજ વસ્તીએ ક્યારેય ઈન્ટરનેટનો ઉપયોગ કર્યો નથી. આવી સ્થિતિમાં, પ્રાથમિકતા આંતર-સરકારી સ્તરે આ ડિજિટલ વિભાજનને દૂર કરવાની અને એક તૃતીયાંશ વસ્તીને ડિજિટલ ઇન્ફ્રાસ્ટ્રક્ચર પ્રદાન કરવાની હોવી જોઈએ. યુનાઈટેડ નેશન્સ ડેવલપમેન્ટ પ્રોગ્રામ એડમિનિસ્ટ્રેટર અચિમ સ્ટેઈનરે જણાવ્યું હતું કે ભારત ટેકનોલોજીનો ઉપયોગ કરવામાં વૈશ્વિક નેતા બની ગયું છે.