ધોધમાર વરસાદથી નખત્રાણામાં જળબંબાકાર, બજારોમાં નદીઓ વહેતી હોય તેવા દ્રશ્યો સર્જાયા

ધોધમાર વરસાદથી નખત્રાણામાં જળબંબાકારની સ્થિતિ સર્જાઇ હતી. મૂશળધાર વરસાદથી હાઈવે પર વરસાદી પાણી ફરી વળ્યા હતા. ભૂજ-નખત્રાણા-લખપત હાઈવે જળમગ્ન થતા બંન્ને બાજુ લાંબો ટ્રાફિક જામ સર્જાયો હતો.

ધોધમાર વરસાદથી નખત્રાણામાં જળબંબાકાર

ધોધમાર વરસાદથી નખત્રાણામાં જળબંબાકારની સ્થિતિ સર્જાઇ હતી. મૂશળધાર વરસાદથી હાઈવે પર વરસાદી પાણી ફરી વળ્યા હતા. ભૂજ-નખત્રાણા-લખપત હાઈવે જળમગ્ન થતા બંન્ને બાજુ લાંબો ટ્રાફિક જામ સર્જાયો હતો. જ્યારે નખત્રાણા બસ સ્ટેશન વિસ્તારમાં પણ જળબંબાકારની સ્થિતિ જોવા મળી હતી.

નખત્રાણાના સુખપર રોહા ગામની બજારોમાં જ્યાં જુઓ ત્યાં વરસાદી પાણીનું સામ્રાજ્ય જોવા મળ્યુ હતું. બજારોમાં નદીઓ વહેતી હોય તેવા દ્રશ્યો સર્જાયા હતા. વરસાદી પાણીનો રસ્તો ગામમાંથી પસાર થતો હોવાથી બજારમાં જળબંબાકારની સ્થિતિ સર્જાઇ હતી તો અબડાસાના સાયધણજર અને રેલડીયા મંજર વચ્ચે કોઝ વેની કામગીરી ચાલતી હોવાથી રસ્તો બંધ થયો હતો. વરસાદી પાણી ફરી વળતા લોકો અટવાયા હતા.

રાયધણજરના યુવાનોએ જેસીબીની મદદથી લોકોને પાણીના ધસમસતા પ્રવાહમાંથી બહાર કાઢીને નદી પાર કરાવી હતી. આ તરફ નખત્રાણાના નાની ખોંભડીમાં પાણીના પ્રવાહમાં પશુ તણાયા હતા. મેકણ સરોવરના પાણીના પ્રવાહમાં 10થી 15 પશુ તણાયા હતા.

વાડી વિસ્તારમાંથી ગામ પરત આવતા પાણીના પ્રવાહમાં પશુઓ તણાયા હતા. અબડાસા તાલુકાની વેલડી નદીમાં ઘોડાપૂરની સ્થિતિ સર્જાઇ હતી. મંગવાણાથી નવી મંજલ પાસેથી પસાર થતી નદીમાં નવા નીરની ભરપૂર આવક થતા ઘોડાપૂરની સ્થિતિ સર્જાઇ હતી. ઉખેડાના ગામના ગોગા ડેમમાં પણ પાણીની ભરપૂર આવક થઇ છે.

સૌરાષ્ટ્રના દરિયાકાંઠાના વિસ્તારમાં વરસાદ પડવાની શક્યતા છે. દેવભૂમિ દ્વારકા પોરબંદર, જામનગર સહિતના વિસ્તારમાં વરસાદની શક્યતા મોરબી, રાજકોટ, બોટાદ, સુરેન્દ્રનગરમાં મધ્યમથી ભારે વરસાદનું અનુમાન છે. કચ્છમાં પણ વરસાદની શક્યતા છે.