Gujarat Rain: સૌરાષ્ટ્ર અને દક્ષિણ ગુજરાતમાં ભુક્કા બોલાવશે વરસાદ, જાણો લેટેસ્ટ આગાહી

Gujarat Rain: સૌરાષ્ટ્ર અને દક્ષિણ ગુજરાતમાં ભુક્કા બોલાવશે વરસાદ, જાણો લેટેસ્ટ આગાહી

પ્રતિકાત્મક તસવીર

અમદાવાદ: સૌરાષ્ટ્ર અને દક્ષિણ ગુજરાતને આજે મેઘરાજા ઘમરોળશે તેવી હવામાન વિભાગે આગાહી વ્યક્ત કરી છે. સૌરાષ્ટ્ર અને દક્ષિણ ગુજરાતના છ જિલ્લામાં રેડ એલર્ટ જાહેર કરવામાં આવ્યું છે.

જેમાં સૌરાષ્ટ્રના ગીર સોમનાથ, અમરેલી અને ભાવનનગર જ્યારે દક્ષિણ ગુજરાતના ભરૂચ, સુરત, નર્મદામાં વરસાદનું રેડ એલર્ટ જાહેર કરવામાં આવ્યું છે. રેડ એલર્ટ એ વિસ્તાર માટે જાહેર કરવામાં આવે છે જ્યાં 8 ઈંચથી વધુ વરસાદ વરસવાની શક્યતા હોય છે.

બીજી તરફ જૂનાગઢ, રાજકોટ, બોટાદની સાથે દક્ષિણ ગુજરાતના તાપી, નવસારી, વલસાડ, ડાંગ અને મધ્ય ગુજરાતના આણંદ, વડોદરા, છોટા ઉદેપુરમાં પણ વરસાદનું ઓરેન્જ એલર્ટ જાહેર કરવામાં આવ્યું છે.

આ સિવાય સંઘ પ્રદેશ દીવ, દમણ અને દાદરાનગર હવેલીમાં પણ વરસાદનું ઓરેન્જ એલર્ટ જાહેર કરવામાં આવ્યું છે. ઓરેન્જ એલર્ટ એ વિસ્તાર માટે જાહેર કરવામાં આવે છે જ્યાં સાડા ચાર ઈંચથી આઠ ઈંચ સુધીનો વરસાદ વરસી શકે છે.

આ સિવાય કચ્છ, પોરબંદર, દ્વારકા, મોરબી, સુરેન્દ્રનગરમાં વરસાદનું યલો એલર્ટ જાહેર કરવામાં આવ્યું છે.

બીજી તરફ ખેડા, પંચમહાલ, દાહોદ, મહીસાગર, અરવલ્લી,અમદાવાદ અને ગાંધીનગર માટે પણ યલો એલર્ટ જાહેર કરવામાં આવ્યું છે. યલો એલર્ટ એ વિસ્તાર માટે જાહેર કરવામાં આવે છે. જ્યાં અઢીથી ચાર ઈંચ સુધીનો વરસાદ વરસી શકે છે.