રાજકોટ બન્યું અગનભઠ્ઠી! ૪૬.૨ ડિગ્રી તાપમાન નોંધાતા લોકો ત્રાહિમામ, લૂ થી બચજો! ૪ જિલ્લામાં આજે અને આવતીકાલે હીટવેવનું યલો એલર્ટ

એપ્રિલ મહિનામાં રાજકોટ સતત ૪૦ ડિગ્રીથી ઉપર રહ્યું, અમદાવાદ-અમરેલીમાં પણ ૪૪ ડિગ્રી ગરમી, આગામી ૭ દિવસ તાપમાન ૪૦-૪૪ ડિગ્રી રહેવાની સંભાવના.

Rajkot heatwave update: ગુજરાતમાં ઉનાળાનો આકરો મિજાજ જોવા મળી રહ્યો છે, ત્યારે આજે રાજકોટ શહેર આકરી ગરમીની ઝપેટમાં આવ્યું હતું. રાજકોટમાં આજે સિઝનનું સૌથી વધુ ૪૬.૨ ડિગ્રી સેલ્સિયસ તાપમાન નોંધાતા લોકો રીતસરના ત્રાહિમામ પોકારી ઉઠ્યા હતા. કાળઝાળ ગરમી અને લૂના કારણે બપોરના સમયે રસ્તાઓ સૂમસામ જોવા મળ્યા હતા.

રાજકોટ માટે એપ્રિલ મહિનો અગનભઠ્ઠી જેવો સાબિત થયો છે. ૧લી એપ્રિલથી ૨૮મી એપ્રિલ સુધીના ૨૮ દિવસ દરમિયાન રાજકોટમાં ક્યારેય પણ ગરમીનો પારો ૪૦ ડિગ્રીથી નીચે ગયો નથી. આજે ૪૬.૨ ડિગ્રીના તાપમાન સાથે રાજકોટે ૯ એપ્રિલે નોંધાયેલા ૪૫.૨ ડિગ્રીના અગાઉના રેકોર્ડને પણ તોડી નાખ્યો છે.

રાજકોટ ઉપરાંત, આજે રાજ્યના અન્ય શહેરોમાં પણ ભારે ગરમીનો અનુભવ થયો હતો. અમદાવાદ અને અમરેલીમાં ૪૪ ડિગ્રી તાપમાન નોંધાયું હતું.

ગુજરાતમાં થોડા દિવસના વિરામ બાદ હવામાન વિભાગે ફરી હીટવેવની આગાહી કરી છે. આજથી બે દિવસ એટલે કે ૨૮ અને ૨૯ એપ્રિલ દરમિયાન કચ્છ, રાજકોટ, સુરેન્દ્રનગર અને મોરબી જિલ્લામાં ગરમીના યલો એલર્ટ સાથે હીટવેવની આગાહી કરવામાં આવી છે.

આગામી ૭ દિવસ સુધી ગુજરાત પ્રદેશના કેટલાક ભાગો અને સૌરાષ્ટ્ર-કચ્છમાં મહત્તમ તાપમાન ૪૦ થી ૪૪ ડિગ્રીની રેન્જમાં રહેવાની સંભાવના છે.

આજે સૌરાષ્ટ્ર-કચ્છના કેટલાક ભાગોમાં દિવસના તાપમાનમાં નોંધપાત્ર વધારો જોવા મળ્યો છે. કચ્છના કેટલાક ભાગોમાં તાપમાન સામાન્યથી નોંધપાત્ર રીતે ઉપર, સૌરાષ્ટ્ર અને ગુજરાત પ્રદેશના કેટલાક ભાગોમાં સામાન્યથી ઉપર અને બાકીના પ્રદેશમાં સામાન્ય રહ્યું હતું.

આજથી ૧ મે દરમિયાન દક્ષિણ ગુજરાત પ્રદેશ અને સૌરાષ્ટ્ર-કચ્છના દરિયાકાંઠાના વિસ્તારોમાં ગરમ અને ભેજવાળી હવાને કારણે અસહજ સ્થિતિ રહેવાની સંભાવના છે. પવનની દિશા પશ્ચિમથી ઉત્તર પશ્ચિમ રહેશે.