લાલચ બુરી બલા! Facebook Ad પર ક્લિક કરવું ભારે પડ્યું! ઠગોએ વૃદ્ધ સરકારી અધિકારીને 5 કરોડનો ચૂનો લગાવ્યો

નવી મુંબઈમાં નિવૃત્ત અધિકારી નકલી સ્ટોક ઇન્વેસ્ટમેન્ટ જાહેરાતનો બન્યા ભોગ, સાયબર ફ્રોડની વિગત.

આજના ડિજિટલ યુગમાં ઓનલાઈન છેતરપિંડીના કિસ્સાઓ સતત વધી રહ્યા છે અને સ્કેમર્સ લોકોને ફસાવવા માટે અવનવી તરકીબો અપનાવી રહ્યા છે. તાજેતરમાં જ નવી મુંબઈમાં એક ચોંકાવનારો કિસ્સો સામે આવ્યો છે, જ્યાં એક 70 વર્ષીય નિવૃત્ત સરકારી અધિકારી ફેસબુક પર દેખાયેલી નકલી સ્ટોક ઇન્વેસ્ટમેન્ટની જાહેરાતનો ભોગ બન્યા અને ગણતરીના સમયમાં જ તેમણે 5 કરોડ રૂપિયાથી વધુ ગુમાવી દીધા.

આ ઘટનાની શરૂઆત ત્યારે થઈ જ્યારે પીડિત ફેસબુક પર સ્ક્રોલ કરી રહ્યા હતા અને તેમને સ્ટોક ઇન્વેસ્ટમેન્ટ સંબંધિત એક આકર્ષક જાહેરાત જોવા મળી. આ જાહેરાત એટલી વાસ્તવિક લાગી રહી હતી કે જેમાં ઊંચા નફાની લાલચ આપવામાં આવી હતી. પીડિતે વધુ વિચાર્યા વિના પોતાની માહિતી ભરી અને એક નકલી ટ્રેડિંગ એપમાં પૈસાનું રોકાણ કરવાનું શરૂ કર્યું.

શરૂઆતમાં ઠગોએ તેમને નાની રકમ ઉપાડવાની મંજૂરી આપી, જેના કારણે તેમનો વિશ્વાસ બેઠો અને તેમણે ધીમે ધીમે પોતાની પત્નીના ડીમેટ ખાતામાંથી લગભગ 4.7 કરોડ રૂપિયાનું રોકાણ કરી દીધું. શરૂઆતમાં તેમને એપમાં 12.2 કરોડ રૂપિયાનો નફો દેખાયો, પરંતુ જ્યારે તેમણે પૈસા ઉપાડવાનો પ્રયાસ કર્યો ત્યારે તેમનું એકાઉન્ટ ફ્રીઝ કરી દેવામાં આવ્યું.

વારંવાર પ્રયત્નો કરવા છતાં પણ જ્યારે તેઓ કોઈ પણ ટ્રાન્ઝેક્શન પૂર્ણ ન કરી શક્યા, ત્યારે તેમને ખ્યાલ આવ્યો કે તેઓ એક મોટી છેતરપિંડીનો ભોગ બન્યા છે. આ પછી તેમણે તાત્કાલિક પોલીસમાં ફરિયાદ નોંધાવી.

આ ઘટનાને ધ્યાનમાં રાખીને સાયબર નિષ્ણાતોએ કેટલીક મહત્વની સલાહો આપી છે. જો કોઈ ઓફર અસાધારણ રીતે આકર્ષક લાગે તો તરત જ સાવધાન થઈ જવું જોઈએ. આવા કોઈપણ રોકાણ કરતા પહેલા સંપૂર્ણ સંશોધન કરવું જરૂરી છે. કોઈપણ વ્યક્તિ સરળતાથી નકલી જાહેરાતો ચલાવી શકે છે, તેથી કોઈપણ લિંક અથવા જાહેરાત પર ક્લિક કરતા પહેલા સાવચેત રહેવું જોઈએ. રોકાણ કરતા પહેલા કંપનીની વેબસાઇટ, સમીક્ષાઓ અને અન્ય સ્ત્રોતોમાંથી માહિતી મેળવવી જોઈએ.

આ ઉપરાંત, પોતાની બેંક વિગતો, OTP, પાસવર્ડ અથવા અન્ય કોઈ પણ ખાનગી માહિતી કોઈ અજાણી વેબસાઇટ, એપ અથવા વ્યક્તિ સાથે શેર કરવી જોઈએ નહીં. જો કોઈ પણ રોકાણ અથવા વ્યવહારમાં કોઈ ગેરરીતિ જણાય તો તરત જ બેંક અને સાયબર સેલમાં ફરિયાદ કરવી જોઈએ.

ઓનલાઈન છેતરપિંડીના કેસ ઝડપથી વધી રહ્યા છે, તેથી ડિજિટલ ટ્રાન્ઝેક્શન કરતી વખતે સાવચેતી અને સતર્કતા ખૂબ જ જરૂરી છે. કોઈપણ નિર્ણય લેતા પહેલા યોગ્ય તપાસ કરવી અને કોઈપણ શંકાસ્પદ લિંક્સ, જાહેરાતો અથવા કોલ્સને ટાળવા જોઈએ.