Google I/O 2023: ગૂગલની મોટી ઇવેન્ટમાં લૉન્ચ થશે આ બધુ, એન્ડ્રોઇડ 14 પર છે બધાની નજર

આ ઇવેન્ટમાં કંપની નવી ટેક્નોલોજી અને ગેજેટ્સ લોકોની વચ્ચે મુકશે. ગૂગલ 2008થી આ ઇવેન્ટનું આયોજન કરી રહ્યું છે.

પ્રતિકાત્મક તસવીર

Google I/O 2023: આગામી 10મી મે 2023ના દિવસ પર તમામ લોકોની નજર ઠરી છે, 10 મેના રોજ ગૂગલ પોતાની એક મોટી ઇવેન્ટ કેલિફૉર્નિયામાં યોજી રહ્યું છે. આ ઇવેન્ટમાં કંપની નવી ટેક્નોલોજી અને ગેજેટ્સ લોકોની વચ્ચે મુકશે. ગૂગલ 2008થી આ ઇવેન્ટનું આયોજન કરી રહ્યું છે.

ગૂગલની વાર્ષિક ડેવલપર્સ કૉન્ફરન્સ 10 મેના રોજ યોજાશે. આમાં કંપની બે નવા સ્માર્ટફોન, એક OS અને તેનું AI ટૂલ બાર્ડ રિલીઝ કરશે. તમે કંપનીની આ ઇવેન્ટને ગૂગલની યુટ્યુબ ચેનલ અથવા વેબસાઇટ પરથી લાઇવ જોઈ શકશો.

Android 14: એન્ડ્રૉઇડ 14નું ડેવલપર્સ પ્રિવ્યૂ કંપની દ્વારા ફેબ્રુઆરીમાં રિલીઝ કરવામાં આવ્યું હતું. હાલમાં તે બીટા ટેસ્ટર્સ માટે રિલીઝ કરવામાં આવ્યું છે. કંપની ઓગસ્ટ સુધીમાં દરેકને Android 14 રૉલઆઉટ કરી શકે છે. ખાસ વાત છે કે, Android 14માં પહેલા કરતાં વધુ પ્રાઇવસી, બેસ્ટ નેવિગેશન અને એક નવું UI મળશે.

Pixel 7a: ઉલ્લેખનીય છે કે, કંપનીના આ અપકમિંગ સ્માર્ટફોનની કેટલીય ડિટેલ્સ પહેલાથી જ ઈન્ટરનેટ પર લીક થઈ ચૂકી છે. આ મોબાઇલ ફોનમાં 6.1-ઇંચ ડિસ્પ્લે, 4400 mAh બેટરી, 64+12MPના બે કેમેરા અને ઇન-ડિસ્પ્લે ફિંગરપ્રિન્ટ સેન્સર મળશે. કંપની આ ઈવેન્ટમાં મોબાઈલ ફોનને ગ્લૉબલી લૉન્ચ કરશે અને તે ઓગસ્ટ મહિનાથી ભારતમાં વેચાણ માટે અવેલેબલ થઈ શકે છે. તેની કિંમત 45 થી 50 હજાર રૂપિયાની વચ્ચેની હોઈ શકે છે.

Pixel Fold: ટેક જાયન્ટ્સ Google આ ઇવેન્ટમાં તેનો પહેલો Pixel Fold સ્માર્ટફોન પણ લૉન્ચ કરશે. મોબાઇલ ફોનમાં 7.6 ઇંચની પ્રાથમિક અને 5.8 ઇંચની કવર ડિસ્પ્લે મળી શકે છે. આ સ્માર્ટફોનને 5 કેમેરા સાથે લૉન્ચ કરવામાં આવશે, એટલે કે પાછળની પેનલ પર ત્રિપલ કેમેરા સેટઅપ હશે. આમાં 4700 mAh બેટરી અને પિક્સેલ 7a જેવી Google Tensor G2 ચીપસેટનો સપોર્ટ પણ મળશે.

AI Bard: ગૂગલ પોતાની આ ઈવેન્ટમાં પોતાનું લેટેસ્ટ આર્ટિફિશિયલ ઈન્ટેલિજન્સ ટૂલ બાર્ડ પણ લોકોની વચ્ચે ખુલ્લુ મુકશે, અને આમાં કરવામાં આવેલા મુખ્ય અપડેટ્સ વિશે માહિતી આપશે. હાલમાં કંપનીએ જણાવ્યું હતું કે યૂઝર્સ એઆઇ બાર્ડની મદદથી સૉફ્ટવેર ડેવલપમેન્ટ અને કૉડિંગ શીખી શકે છે.