કાશ્મીરમાં ક્રિકેટ એકેડમી ખોલી યુવા ક્રિકેટરોને તૈયાર કરશે આ દિગ્ગજ ક્રિકેટર

મળતી માહિતી મુજબ કાશ્મીરમાં ક્રિકેટ એકેડમી ખોલવા માટે ધોનીએ રમત મંત્રાલયને ઔપચારિક રીતે જાણકારી આપી છે.

નવી દિલ્હીઃ ભારતીય ક્રિકેટ ટીમના કેપ્ટન અને ભારતીય સેનામાં લેફ્ટનન્ટ કર્નલની ઉપાધિ મેળવી ચૂકેલ મહેન્દ્ર સિંહ ધોની હવે કાશ્મીરના વિકાસ માટે એક મોટું પગલું લેવા જઈ રહ્યા છે. ટીમના આ દિગ્ગજ કેપ્ટન જમ્મુ કાશ્મીર વિસ્તારમાં એક ક્રિકેટ એકેડમી ખોલવા માગે છે. તમને જણાવીએ કે, ધોની હાલમાં ભારતીય સેનામાં કાશ્મીરમાં છે. તેના માટે ધોનીએ વર્લ્ડકપ 2019 બાદ બે મહિના ક્રિકેટથી દૂર રહેવાનો નિર્ણય કર્યો હતો. મળતી માહિતી મુજબ કાશ્મીરમાં ક્રિકેટ એકેડમી ખોલવા માટે ધોનીએ રમત મંત્રાલયને ઔપચારિક રીતે જાણકારી આપી છે. તેણે મંત્રાલયને એ પણ જણાવ્યું કે, જ્યારે ખીણમાં સ્થિતિ સામાન્ય થઈ જાશે ત્યાર બાદ તે આ મામલે આગળ નિર્ણય કરશે. તમને એ પણ જણાવીએ કે ધોની ત્યાં ટેલેન્ટેડ યુવાઓને ફ્રીમાં કોચિંગની વ્યવસ્થા આપશે. ધોનીના આ નિર્ણયથી ખીણમાં યુવા ખેલાડીઓનું ભવિષ્ય ઉજ્જવ થશે. આ પહેલા પણ પરવેઝ રસૂલ જેવા ક્રિકેટર ભારત માટે ક્રિકેટ રમી ચૂક્યા છે. બીજી બાજુ અહેવાલ મળી રહ્યા છે કે, કાશ્મીરમાં સેના સાથે સમય વિતાવી રહેલ ધોની કેન્દ્ર શાસિત પ્રદેશ લદ્દાખના લેહમાં તિરંગો ફરકાવી શકે છે.