INDvAUS: ત્રીજી ટેસ્ટ પહેલા ટીમ ઈન્ડિયા માટે પરેશાની બન્યો આ ગુજરાતી ખેલાડી, શાસ્ત્રીએ આપ્યું મોટું નિવેદન, જાણો વિગત

શાસ્ત્રીએ પ્રેસ કોન્ફરન્સ દરમિયાન કહ્યું હતું કે જાડેજા સાથે સમસ્યા એ હતી કે તેના ખભા જકડી ગયા હતા જેથી ઓસ્ટ્રેલિયાના આવ્યાના ચાર દિવસ પછી તેને ઇંજેક્શન આપવામાં આવ્યા હતા. અસર થવામાં થોડો સમય લાગ્યો હતો. જ્યારે તે ભારતમાં હતો ત્યારે જ તેના ખભામાં દુખાવો હતો આમ છતા તે ઘરેલું ક્રિકેટ રમ્યો હતો. ઓસ્ટ્રેલિયા આવ્યા પછી ફરી પરેશાની થઈ હતી.

સિડનીઃ ભારત-ઓસ્ટ્રેલિયા વચ્ચે ચાર મેચની સીરિઝની ત્રીજી ટેસ્ટ 26 ડિસેમ્બરથી મેલબોર્નમાં રમાશે. આ પહેલા ભારતીય ટીમ માટે ખરાબ સમાચાર આવી રહ્યા છે. ઈજાના કારણે ભારતના બે દિગ્ગજ ખેલાડીઓ મેચ અને સીરિઝ ગુમાવી શકે છે. પૃથ્વી શૉ ઈજાના કારણે સીરિઝમાંથી બહાર થઈ ગયા બાદ સ્ટાર ઓફ સ્પિનર રવિચંદ્રન અશ્વિન અને રવિન્દ્ર જાડેજા પણ ઈજાગ્રસ્ત થયા છે. ભારતીય ક્રિકેટ ટીમના કોચ રવિ શાસ્ત્રીએ રવિવારે ખુલાસો કર્યો છે કે સીનિયર સ્પિનર રવિન્દ્ર જાડેજા જ્યારે રણજી ટ્રોફીમાં રમી રહ્યો હતો ત્યારે જ તેના ખભામાં દુખાવો હતો અને ઓસ્ટ્રેલિયા પહોંચ્યાના ચાર દિવસ પછી તેને ઇંજેક્શન આપવામાં આવ્યા હતા.

જાડેજાની ફિટનેસનો મુદ્દો આશ્ચર્યકારક છે કારણ કે પર્થમાં રમાયેલી બીજી ટેસ્ટમાં તેનો 13 સભ્યોની ટીમમાં સમાવેશ કરાયો હતો. આટલું જ નહીં તે ઓસ્ટ્રેલિયાની બંને ઇનિંગ્સમાં મોટાભાગનો સમય ફિલ્ડિંગ કરતો પણ જોવા મળ્યો હતો. જેના કારણે તેની ઇજા પર સવાલ ઉભા થઈ રહ્યા છે.

શાસ્ત્રીના નિવેદન પછી સવાલ ઉભા થઈ રહ્યા છે કે શું સંપૂર્ણ રીતે ફિટ ન હોવા છતા રવિન્દ્ર જાડેજાને ઓસ્ટ્રેલિયા પ્રવાસે લાવવામાં આવ્યો હતો. કોચે સ્વિકાર કર્યો હતો કે જાડેજાને સ્વસ્થ થવામાં આશા કરતા વધારે સમય લાગ્યો છે. અમે સાવધાની રાખવા માંગીએ છીએ. તમે એમ ન ઇચ્છો કે 5 કે 10 ઓવર ફેક્યા પછી કોઈ બોલર બહાર થઈ જાય. જેથી પર્થની વાત કરવામાં આવે તો તે 70 થી 80 ટકા ફિટ હતો અને અમે બીજી ટેસ્ટમાં તેને લઈને જોખમ ઉઠાવવા માંગતા ન હતા. જો મેલબોર્નમાં 80 ટકા ફિટ હશે તો તે રમશે.