Gujarat Rain Forecast: અરબી સમુદ્રમાં સક્રિય સિસ્ટમ પડી નબળી: હવામાન વિભાગે વરસાદને લઈ શું કરી આગાહી

રાજ્યમાં 24 કલાક બાદ ઘટશે વરસાદનું જોર. અરબી સમુદ્રમાં સક્રિય સિસ્ટમ નબળી પડતા વરસાદનું જોર ઘટશે. જોકે ગુજરાતના દરિયાકાંઠાના વિસ્તારમાં હજુ પણ 40થી 50 કિમી પ્રતિ કલાકની ઝડપે પવન ફૂંકાવવાની આગાહી કરાઈ છે. તો રાજ્યના બંદરો પર ત્રણ નંબરનું સિગ્નલ હજુ યથાવત રખાયું છે. હવામાન વૈજ્ઞાનિકના મત મુજબ આગામી બે દિવસ સુધી કેટલાક જિલ્લાઓમાં છૂટો છવાયો વરસાદ થઈ શકે છે, પરંતુ એક અઠવાડિયા સુધી વાતાવરણમાં મોટો ફેરફાર નહીં થાય અને તાપમાનમાં પણ કોઈ બદલાવ નહીં આવે. દ્વારકા, પોરબંદર, ભાવનગર, કચ્છ અને જૂનાગઢમાં છૂટો છવાયો વરસાદ જોવા મળી શકે છે તો બીજી તરફ ઉત્તર ગુજરાતમાં સાબરકાંઠા, અરવલ્લી અને મહીસાગરના આસપાસના વિસ્તારોમાં પણ સામાન્ય વરસાદ થઈ શકે છે. એક અઠવાડિયા સુધી વાતાવરણમાં કોઈપણ વધારે બદલાવ જોવા નહીં મળે. હવામાન વિભાગના મતે અમદાવાદમાં આજથી બે દિવસમા વરસાદી ઝાપટાની આગાહી કરાઈ છે. આ તરફ રવિવારે દિવસભર વાદળછાયા વાતાવરણ વચ્ચે વરસાદ ન વરસતા ગરમીનો પારો એક જ દિવસમાં છ ડિગ્રી સુધી ઉંચકાયો. અમદાવાદમાં રવિવારે મહતમ તાપમાનમાં શનિવારની તુલનાએ છ ડિગ્રીનો વધારો નોંધાયો. રવિવારના મહતમ તાપમાન 32.8 ડિગ્રી નોંધાયું. તો લઘુતમ તાપમાન 4.1 ડિગ્રી વધીને 23.2 ડિગ્રી નોંધાયું.