‘ચાર ચાર બંગડીવાળી’ કારના CEOની કેમ થઈ ધરપકડ ? જાણો વિગત

મ્યૂનિખઃ ‘ડીઝલગેટ’ એમિશન છેતરપિંડી મામલે જર્મનીમાં ફોક્સવેગનની લક્ઝરી બ્રાન્ડ ઓડીના ચીફ એક્ઝિક્યૂટિવ રૂપર્ટ સ્ટેડલરની ધરપકડ કરવામાં આવી છે. કંપની દ્વારા પણ આ અંગેની પુષ્ટિ કરવામાં આવી છે. આ સિવાય કંપનીએ અન્ય કોઈ જાણકારી આપી નથી.

આ સ્કેન્ડલ સામે આવ્યા બાદે અનેક શેરહોલ્ડર્સ તથા એનાલિસ્ટ્સે કોલ કરીને સ્ટેડલરનું રાજીનામું માંગ્યું હતું. પરંતુ ફોક્સવેગન દ્વારા ન માત્ર તેમનો બચાવ કરવામાં આવ્યો પરંતુ કોન્ટ્રાક્ટ પણ પાંચ વર્ષ માટે વધારી દેવામાં આવ્યો.

2015માં અમેરિકન એજન્સીએ ફોક્સવેગનની કારમાં ગરબડ પકડી હતી. જે બાદ કંપનીએ એક કરોડથી વધુ કારના સોફ્ટવેરમાં છેડછાડ કરી હોવાનું સ્વીકાર્યું હતું. પ્રદૂષણ તપાસમાં કાર ન પકડાય તે હેતુથી આમ કરવામાં આવ્યું હતું.

ગત સપ્તાહે રૂપર્ટના પ્રાઇવેટ અપાર્ટમેન્ટમાં રેડ કરવામાં આવી હતી. રૂપર્ટ પુરાવા સાથે છેડછાડ કરી શકે છે તેવી સંભાવનાને લઈ આ કાર્યવાહી હાથ ધરવામાં આવી હતી. રૂપર્ટ સ્ટેડલર 2007થી ઓડીના સીઈઓ છે અને 2010થી વોક્સવેગન ગ્રુપના બોર્ડ મેમ્બર છે.

જર્મન ઓથોરિટીએ ફોક્સવેગન પર ડીઝલ એમિશન સ્કેન્ડલ મામલે 1 અબજ યૂરોનો દંડ લગાવ્યો હતો. જે કોઈપણ કંપનીને કરવામાં આવેલો સૌથી વધારે દંડ હતો.