'મારો પતિ પ્રેમિકા સાથે ભાગી ગયો છે, જે તેની જાણકારી આપશે તેને ઇનામ આપીશ', પત્નીની પોસ્ટ વાયરલ

મધ્યપ્રદેશના રતલામ કે આલોટમાં અજબ પ્રેમ કહાનીની ખૂબ ચર્ચા ચાલી રહી છે

મધ્યપ્રદેશમાં આ ઘટનાની ખૂબ ચર્ચા થઇ રહી છે

ભોપાલઃ મધ્યપ્રદેશના રતલામ કે આલોટમાં અજબ પ્રેમ કહાનીની ખૂબ ચર્ચા ચાલી રહી છે. અહીં પરિણીત પતિ પત્ની અને બાળકોને છોડી પ્રેમિકા સાથે ભાગી ગયો છે.  પરેશાન પત્નીએ સોશિયલ મીડિયા પર એક મેસેજ લખીને તેના પતિની જાણકારી આપનારને યોગ્ય ઈનામ આપવાની જાહેરાત કરી હતી. પતિ-પત્ની વચ્ચેનો આ વિવાદ ચર્ચામાં આવ્યો છે. પીડિત પત્ની ગ્રામ પંચાયતમાં આસિસ્ટન્ટ સેક્રેટરી છે જ્યારે પતિ બેરોજગાર છે. મામલો અલોટ તાલુકાનો છે.

મળતી માહિતી મુજબ, પત્ની ગ્રામ પંચાયત અવલિયામાં આસિસ્ટન્ટ સેક્રેટરીના પદ પર છે. પીડિતાના લગ્ન 2012માં વિક્રમ નૌટિયા સાથે થયા હતા. બંનેને બે બાળકો છે. પત્નીનો આરોપ છે કે વિક્રમગઢની મહિલાના અફેરમાં પતિ વિક્રમ રોજ તેને મારતો હતો અને દહેજ લાવવા માટે દબાણ કરતો હતો. પોતાની ફરિયાદમાં પત્નીએ કહ્યુ કે 17 ઓગસ્ટના રોજ મારો પતિ અને તે મહિલા સાથે મારા ઘરેથી બે લાખ રૂપિયા રોકડા, ઘરેણાં અને એક મોટરસાઇકલ લઈને ભાગી ગયો હતો. તેણે મને મારી નાખવાની ધમકી પણ આપી હતી.

પત્નીએ સોશિયલ મીડિયા પર એક મેસેજ લખીને તેના પતિને એક  બદમાશ ગણાવ્યો છે. તેણે સોશિયલ મીડિયા પર લખ્યું, 'મારો પતિ એક બદમાશ છે. દરરોજ તે નિર્દોષ છોકરીઓને પોતાની જાળમાં ફસાવે છે. તેમનું શોષણ કરે છે અને તેમને છોડી દે છે. તે આલોટની કોઈ છોકરી સાથે ભાગી ગયો છે. તેણે તેની પત્ની અને બે બાળકોને પણ છોડી દીધા છે. જો તમને આ બદમાશ ક્યાંય દેખાય તો આ નંબરો પર સંપર્ક કરો. યોગ્ય પુરસ્કાર આપવામાં આવશે. સાથે એવું પણ લખવામાં આવ્યું છે કે, 'કૃપા કરીને મારી મદદ કરો અને આ દુષ્કર્મ કરનારને સજા અપાવો જેથી કરીને નિર્દોષ છોકરીઓની જિંદગી બગાડે નહીં.'

આલોટ પોલીસે ગુનો નોંધી તપાસ શરૂ કરી છે. અલોટ એસડીઓપી સવેરા અંસારીએ કહ્યું, 'થોડા દિવસો પહેલા એક મહિલાએ તેના પતિ તેની ગર્લફ્રેન્ડ સાથે ભાગી જવાની ફરિયાદ નોંધાવી હતી. શારીરિક અને માનસિક ત્રાસની પણ વાત થઈ હતી. મહિલાની ફરિયાદના આધારે આઈપીસીની કલમ 498A, 294 અને 323 હેઠળ કેસ નોંધવામાં આવ્યો છે. કેસની તપાસ ચાલી રહી છે. ટૂંક સમયમાં આરોપીઓની ધરપકડ કરવામાં આવશે.