શું તમે પણ તમારા નાના બાળકની આંખમાં લગાવો છો કાજલ, તો જાણો તેનાથી થતા નુકસાન

નવજાત શિશુઓ ખૂબ નાજુક હોય છે. આવી સ્થિતિમાં તેમની આંખોમાં કાજલ લગાવવી બિલકુલ સલામત નથી. કાજલ લગાવવાથી આ સમસ્યાઓ થઈ શકે છે.

પ્રતિકાત્મક તસવીર

Is It Safe To Put Kajal On Baby Eyes: ભારતીય ઘરોમાં નવજાત બાળકને કાજલ લગાવવી એ એક ધાર્મિક વિધિ માનવામાં આવે છે. વૃદ્ધ લોકોનું માનવું છે કે કાજલ લગાવવાથી બાળકોને કોઇની નજર લાગતી નથી. સાથે જ તેમની આંખો મોટી થાય છે તેવી પણ માન્યતાઓ છે. પરંતુ તબીબી અને વૈજ્ઞાનિક દ્રષ્ટિકોણથી જોઈએ તો નવજાત બાળકની આંખોમાં કાજલ લગાવવાથી ઘણા નુકસાન થઈ શકે છે. આવો જાણીએ નવજાત શિશુની આંખમાં કાજલ લગાવવાથી શું નુકસાન થઈ શકે છે.

બાળકોની આંખોમાં કાજલ લગાવવાના ગેરફાયદા

આજકાલ કેમિકલયુક્ત કાજલ બજારમાં મળે છે. જે નવજાત શિશુની આંખોમાં લગાવવામાં આવે તો નુકસાનકારક બની શકે છે. કારણ કે નાના બાળકની આંખો ખૂબ જ નાજુક હોય છે. આવી સ્થિતિમાં કોઈપણ કેમિકલનો ઉપયોગ કરવાથી બાળકને નુકસાન થઈ શકે છે. નિષ્ણાતો કહે છે કે કાજલ બાળકો માટે બિલકુલ સલામત નથી. કાજલમાં મોટી માત્રામાં સીસું જોવા મળે છે, જે આંખોમાંથી જઈને શરીરના અન્ય ભાગોને અસર કરી શકે છે અને મગજ, અસ્થિ મજ્જાને લગતી સમસ્યાઓનું કારણ બની શકે છે.

આ સમસ્યાઓ થઈ શકે છે

આંખમાં કાજલ નાખવાથી કેમિકલ કન્જેક્ટિવાઇટિસની સમસ્યા થઈ શકે છે. આનાથી આંખમાં ઈન્ફેક્શન,આંખો લાલ થઈ જવી,આંખોમાં સતત પાણી આવવું, આંખો ચોંટી જવી જેવી સમસ્યાઓ થઈ શકે છે. આ સિવાય કોર્નિયલ અલ્સરની સમસ્યા પણ થઈ શકે છે. આમાં પણ આંખો લાલ થવાની સાથે આંખોમાં દુખાવાની સમસ્યા થઈ શકે છે. તે જ સમયે ત્વચા પર ચેપનું વધુ જોખમ રહેલું છે. ત્વચા પર કાજલનું તિલક કરવાથી બાળકોને પિમ્પલ્સ, ફોલ્લીઓ અને બળતરા થઈ શકે છે.

શું ઘરે બનાવેલી કાજલ લગાવવી સલામત છે?

કેટલાક લોકો માને છે કે ઘરે કુદરતી વસ્તુઓમાંથી બનેલી કાજલ સલામત છે. પરંતુ આ કાજલ પણ સલામત નથી. કારણ કે આનાથી ચેપનો ખતરો પણ હોઈ શકે છે. બાળકની ત્વચા ખૂબ જ સંવેદનશીલ હોય છે. થોડી બેદરકારી પણ ચેપનું કારણ બની શકે છે. આવી સ્થિતિમાં જ્યારે તમે આંગળીની મદદથી આંખોમાં કાજલ લગાવો છો તો ચેપનું જોખમ વધી જાય છે. ક્યારેક આંગળી વડે કાજલ લગાવતી વખતે આંખમાં ઈજા થઈ શકે છે. તેનાથી આંખોની રોશની પર અસર થઈ શકે છે.

Disclaimer: અહીં, આપેલી માહિતી માત્ર ધારણાઓ અને માહિતી પર આધારિત છે. અત્રે એ ઉલ્લેખ કરવો જરૂરી છે કે abp અસ્મિતા કોઈપણ પ્રકારની માન્યતા, માહિતીને સમર્થન આપતું નથી. કોઈપણ માહિતી અથવા ધારણા લાગુ કરતાં પહેલાં સંબંધિત નિષ્ણાતની સલાહ લો