ગુજરાત પર મેઘો મહેરબાન: શરૂઆતી દિવસોમાં જ સિઝનનો 62 ટકા વરસાદ નોંધાયો, કયા ઝૉનમાં કેટલો પડ્યો ?
Gujarat Rain: હવામાન નિષ્ણાંત અંબાલાલ પટેલની આગાહી ગુજરાતના વરસાદમાં અપડાઉન લાવે તેવી છે. તેમણે કહ્યું કે, ગુજરાતમાં વરસાદનું પ્રમાણ ધીરે ધીરે ઘટશે
Gujarat Rain: રાજ્યમાં ફરી એકવાર વિરામ બાદ મેઘરાજાએ ધમાલ મચાવવાનું શરૂ કરી દીધુ છે, હવામાન વિભાગ અનુસાર, આગામી સાત દિવસ ભારેથી અતિ ભારે વરસાદ વરસી શકે છે. રાજ્યમાં ઉત્તર ગુજરાતથી લઇને મધ્ય, દક્ષિણ અને સૌરાષ્ટ્રમાં પ્રથમ બે રાઉન્ડમાં મેઘરાજાએ જોર બતાવ્યુ છે. જેના કારણે રાજ્યમાં મોટાભાગના ડેમ, નદી-તળાવ છલકાયા છે. આ બધાની વચ્ચે રિપોર્ટ છે કે, આ વખતે શરૂઆતી વરસાદમાં જ રાજ્યમાં સિઝનનો 62 ટકાથી વધુ વરસાદ પડી ગયો છે. અહીં તેના આંકડા આપવામાં આવ્યા છે.
ગુજરાતમાં વરસાદ લાવે તેવી હાલ ત્રણ સિસ્ટમ સક્રિય છે. ત્યારે હવામાન વિભાગની આગાહી પ્રમાણે, ગુજરાતમાં આગામી સાત દિવસ વરસાદની આગાહી આપી છે. આ સાથે બે દિવસ ભારેથી અતિભારે વરસાદની શક્યતા પણ દર્શાવવામાં આવી છે. પરંતુ ખાસ વાત છે કે આ વખતે વહેલા વરસાદના કારણે સિઝનનો 62 ટકાથી વધુ વરસાદ રાજ્યમાં ખાબકી ચૂક્યો છે. તાજેતરમાં સામે આવેલા આંકડા પ્રમાણે, અત્યારે રાજ્યમાં સિઝનનો સરેરાશ 62.44 ટકા વરસાદ વરસી ચૂક્યો છે. જેમાં સૌરાષ્ટ્રમાં આ સિઝનનો 55 ટકા વરસાદ વરસ્યો છે, જ્યારે કચ્છ ઝૉનમાં સિઝનનો 64.17 ટકા વરસાદ, દક્ષિણ ગુજરાતમાં સરેરાશ 65.70 ટકા વરસાદ અને ઉત્તર ગુજરાતમાં સરેરાશ 65.17 ટકા વરસાદ વરસી ચૂક્યો છે. આ વહેલા વરસાદના કારણે ખેડૂતોમાં કહી ખુશી કહી ગમ જેવો માહોલ છે.
અંબાલાલ પટેલની આગાહી
હવામાન નિષ્ણાંત અંબાલાલ પટેલની આગાહી ગુજરાતના વરસાદમાં અપડાઉન લાવે તેવી છે. તેમણે કહ્યું કે, ગુજરાતમાં વરસાદનું પ્રમાણ ધીરે ધીરે ઘટશે. 30 જૂલાઈ સુધી વરસાદ યથાવત રહેશે. બંગાળના ઉપસાગરમાંથી આવેલો ભેજ ગુજરાતમાં ફરી વરસાદ લાવશે. 3 ઓગસ્ટથી મોટા ફોરાનો વરસાદ પડશે. તો 6 થી 10 ઓગસ્ટ દક્ષિણ ગુજરાતમાં ભારે વરસાદ પડશે. આ કારણે તાપી નદીનું જળસ્તર વધવાની શક્યતા છે. તેમણે કહ્યું કે, વરસાદી સિસ્ટમ ઉત્તર ભારત તરફ જશે. 18 થી 20 ઓગસ્ટ દરમિયાન ગુજરાતમાં વરસાદનો ફરી મોટો રાઉન્ડ આવશે. 23 ઓગસ્ટથી પર્વતાકાર વરસાદ પડશે. જ્યાં ચઢે ત્યાં વરસાદ પડે તેવી સ્થિતિ સર્જાશે. ગણેશ ચતુર્થીના તહેવાર દરમિયાન પણ વરસાદી માહોલ રહેશે. ફરી 27 થી 30 ઓગસ્ટ દરમિયાન સારો વરસાદ રહેશે. 3 સપ્ટેમ્બરથી 14 સપ્ટેમ્બર દરમિયાન વિવિધ વિસ્તારમાં વરસાદ પડશે. અંબાલાલ પટેલે જન્માષ્ટમી દરમિયાન સામાન્ય વરસાદની આગાહી કરી છે. તેમણે કહ્યું કે, સૌરાષ્ટ્રમાં જન્માષ્ટમી દરમિયાન લોકો મેળાની મજા માણી શકશે. જન્માષ્ટમી દરમિયાન વરસાદી ઝાપટા પડી શકે છે. ઓગસ્ટના અંતમાં ગણેશ ચતુર્થી દરમિયાન વરસાદ રહેશે.
ટોપ સ્ટોરી
ટ્રેન્ડિંગ સમાચાર
