રાજ્યમાં હજુ બે દિવસ ભારે વરસાદ પડશે, જાણો હવામાન વિભાગે શું કહ્યું ?

રાજ્યમાં હજુ બે દિવસ ભારે વરસાદની હવામાન વિભાગે આગાહી વ્યક્ત કરી છે. જો કે મંગળવારથી વરસાદનું જોર ઘટવાની હવામાન વિભાગે આગાહી કરી છે.

પ્રતિકાત્મક તસવીર ( Image Source :Getty Images )

રાજ્યમાં હજુ બે દિવસ ભારે વરસાદની હવામાન વિભાગે આગાહી વ્યક્ત કરી છે. જો કે મંગળવારથી વરસાદનું જોર ઘટવાની હવામાન વિભાગે આગાહી કરી છે. કચ્છ અને ઉત્તર ગુજરાતના બનાસકાંઠા, સાબરકાંઠામાં ભારેથી અતિભારે વરસાદ વરસી શકે છે.  જ્યારે આણંદ, ખેડા, પંચમહાલ, ભરૂચ, સુરત, વલસાડ, દમણ, દાદરાનગર હવેલી, જામનગર, રાજકોટ, દ્વારકા અને મોરબી સહિતના વિસ્તારોમાં ભારે વરસાદ વરસવાની હવામાન વિભાગે આગાહી કરી છે. 

કચ્છમાં રેડ એલર્ટ જાહેર કરવામાં આવ્યું છે. તો બનાસકાંઠા અને સાબરકાંઠામાં વરસાદનું ઓરેંજ એલર્ટ જાહેર કરવામાં આવ્યું છે. આ સિવાય મોરબી, સુરેંદ્રનગર, પાટણ, મહેસાણા, અમદાવાદ, ખેડા, આણંદ, વડોદરા, પંચમહાલ,અરવલ્લી, ભરૂચ, સુરત, નવસારી, વલસાડ અને ડાંગમાં વરસાદનું યલો એલર્ટ આપવામાં આવ્યું છે.  શનિવારથી ત્રણ દિવસ સુધી અમદાવાદ સહિત રાજ્યના વિવિધ વિસ્તારોમાં ધોધમાર વરસાદ પડવાની હવામાન વિભાગે આગાહી કરી છે. 

શનિવારે અમદાવાદ સહિત વલસાડ, અરવલ્લી, પાટણ, તાપી, સાબરકાંઠા, કચ્છ અને નર્મદા સહિતના જિલ્લાઓમાં સારો વરસાદ વરસ્યો હતો.  દક્ષિણ ગુજરાત અને સૌરાષ્ટ્ર અને કચ્છમાં અત્યાર સુધીમાં સારો વરસાદ વરસ્યો છે.  જો કે ઉત્તર ગુજરાતના બનાસકાંઠા, પાટણ અને સાબરકાંઠામાં અન્ય જિલ્લાઓની સરખામણીએ ઓછો વરસાદ થયો છે.  

બનાસકાંઠા જિલ્લામાં ધોધમાર વરસાદ

બનાસકાંઠામાં મેઘરાજા સવારથી જ ધમાકાદેર બેટિંગ કરી રહ્યા છે. સવારથી અત્યારસુધી થરાદમાં પોણા છ ઈંચ વરસાદ ખાબક્યો છે. જેના કારણે જળબંબાકારની સ્થિતિ સર્જાઈ છે.  બનાસકાંઠાના સુઈગામમાં પણ સાડા ત્રણ ઈંચ વરસાદ નોંધાયો છે. લાખણીમાં પણ સાડા ત્રણ ઈંચ, પાલનપુરમાં અઢી ઈંચ, વાવમાં અઢી ઈંચ અને વડગામમાં સવા બે ઈંચ વરસાદ નોંધાયો.  ભારે વરસાદની આગાહીને પગલે NDRFની એક ટીમ પાલનપુરમાં તૈનાત કરાઈ છે. ધોધમાર વરસાદથી થરાદથી ઢીમા જતા રસ્તો પર પાણી ભરાયા છે.  થરાદના ભાપી, દોલતપુરા સહિત 25 ગામોનો જોડતો રોડ પાણીમાં ગરકાવ થયો છે. રોડ ઉપર ઘૂંટણ સમાં પાણી  ભરાયા છે. જેથી વાહન વ્યવહાર ખોરવાયો છે. થરાદ એપીએમસી માર્કેટયાર્ડ પાછળના ભાગે વરસાદી પાણી ભરાતા રોડ ઉપર પાણી ભરાયા છે.