Gujarat Rain: આગામી 3 કલાકમાં રાજ્યના આ જિલ્લાઓમાં વરસાદનું રેડ એલર્ટ, જાણો ક્યાં તૂટી પડશે
આગામી ત્રણ કલાક દરમિયાન દક્ષિણ ગુજરાતના પાંચ જિલ્લામાં અતિભારે વરસાદની શક્યતાને ધ્યાનમાં રાખીને રેડ એલર્ટ જાહેર કરવામાં આવ્યું છે.
- હવામાન વિભાગે દક્ષિણ ગુજરાતના પાંચ જિલ્લામાં રેડ એલર્ટ.
- 13 જિલ્લામાં ઓરેન્જ એલર્ટ, રાજ્યમાં ભારે વરસાદની શક્યતા.
- 15 જિલ્લામાં યલો એલર્ટ, લોકોને સાવચેત રહેવા અપીલ.
અમદાવાદ: હવામાન વિભાગ (IMD) દ્વારા બપોરે 1 વાગ્યાથી સાંજે 4 વાગ્યા સુધી માટે નાઉકાસ્ટ જાહેર કરવામાં આવ્યું છે. આગામી ત્રણ કલાક દરમિયાન દક્ષિણ ગુજરાતના પાંચ જિલ્લામાં અતિભારે વરસાદની શક્યતાને ધ્યાનમાં રાખીને રેડ એલર્ટ જાહેર કરવામાં આવ્યું છે. આ સાથે જ હવામાન વિભઆગે રાજ્યના 13 જિલ્લામાં ઓરેન્જ એલર્ટ અને 15 જિલ્લામાં યલો એલર્ટ જાહેર કરીને લોકોને સાવચેત રહેવાની અપીલ કરવામાં આવી છે.
ગુજરાતના 5 જિલ્લામાં રેડ એલર્ટ સાથે અતિભારે વરસાદની આગાહી
હવામાન વિભાગે સુરત, નવસારી, વલસાડ, તાપી અને ડાંગ જિલ્લામાં આગામી ત્રણ કલાક દરમિયાન ભારેથી અતિભારે વરસાદની શક્યતા વ્યક્ત કરી છે. આ ઉપરાંત દમણ અને દાદરા અને નગર હવેલીમાં પણ રેડ એલર્ટ જાહેર કરવામાં આવ્યું છે. નીચાણવાળા વિસ્તારોમાં પાણી ભરાવા, નદીઓ અને ખાડીઓના જળસ્તરમાં વધારો તેમજ સ્થાનિક પૂર જેવી સ્થિતિ સર્જાઈ શકે તેવી શક્યતા વ્યક્ત કરવામાં આવી છે.
રાજ્યના 13 જિલ્લાઓમાં ઓરેન્જ એલર્ટ
હવામાન વિભાગની આગાહી અનુસાર ભરૂચ, નર્મદા, છોટાઉદેપુર, દાહોદ, વડોદરા, પંચમહાલ, બનાસકાંઠા, સાબરકાંઠા, અરવલ્લી, મહિસાગર, ભાવનગર, અમરેલી, ગીર સોમનાથ અને દીવ માટે ઓરેન્જ એલર્ટ જાહેર કરવામાં આવ્યું છે. આ વિસ્તારોમાં ભારે વરસાદ, વીજળીના કડાકા અને તેજ પવન સાથે વરસાદ પડવાની શક્યતા છે.
15 જિલ્લામાં યલો એલર્ટ જાહેર
પાટણ, મહેસાણા, ગાંધીનગર, ખેડા, અમદાવાદ, આણંદ, સુરેન્દ્રનગર, બોટાદ, રાજકોટ, મોરબી, જામનગર, દેવભૂમિ દ્વારકા, પોરબંદર, જૂનાગઢ અને કચ્છ જિલ્લામાં યલો એલર્ટ જાહેર કરવામાં આવ્યું છે. આ જિલ્લાઓમાં હળવાથી મધ્યમ વરસાદ સાથે કેટલાક વિસ્તારોમાં ભારે વરસાદના ઝાપટાં પડી શકે છે.
આ પણ વાંચો- Surat Rain: સુરતમાં 5 ઈંચ વરસાદથી જળબંબાકાર, ખાડી ઓવરફ્લો થતાં અનેક વિસ્તારોમાં પૂર જેવી સ્થિતિ
પ્રશાસન અને લોકોને સાવચેત રહેવાની અપીલ
હવામાન વિભાગે લોકોને બિનજરૂરી મુસાફરી ટાળવા, નદી-ખાડીના કિનારાથી દૂર રહેવા અને પાણી ભરાયેલા રસ્તાઓ પરથી પસાર ન થવાની સલાહ આપી છે. જિલ્લા પ્રશાસન અને સ્થાનિક તંત્રને પણ સંવેદનશીલ વિસ્તારોમાં સતત નજર રાખવા તેમજ જરૂરી હોય ત્યાં તાત્કાલિક બચાવ કામગીરી માટે તૈયાર રહેવા સૂચના આપવામાં આવી છે. દક્ષિણ ગુજરાતમાં પહેલેથી જ ભારે વરસાદને કારણે અનેક વિસ્તારોમાં પાણી ભરાવાની સ્થિતિ છે. આવી સ્થિતિમાં આગામી ત્રણ કલાકનું નાઉકાસ્ટ મહત્વપૂર્ણ માનવામાં આવી રહ્યું છે. હવામાન વિભાગે લોકોને માત્ર સત્તાવાર સૂચનાઓ પર વિશ્વાસ રાખવા અને સમયાંતરે જાહેર થતા અપડેટ પર નજર રાખવાની અપીલ કરી છે.
ટોપ સ્ટોરી
ટ્રેન્ડિંગ સમાચાર
