Gujarat Rain: આજે વીજળીના કડાકા સાથે આ જિલ્લાઓમાં ખાબકશે વરસાદ, જાણો લેટેસ્ટ અપડેટ

રાજ્યમાં ફરી એક વખત વરસાદી માહોલ જામ્યો છે. દક્ષિણ ગુજરાતમાં વરસાદે ભૂક્કા બોલાવ્યા છે. ડાંગમાં ભારે વરસાદ વરસી રહ્યો છે.

પ્રતિકાત્મક તસવીર

Source : તસવીર સોશિયલ મીડિયા

ગુજરાત: રાજ્યમાં ફરી એક વખત વરસાદી માહોલ જામ્યો છે. દક્ષિણ ગુજરાતમાં વરસાદે ભૂક્કા બોલાવ્યા છે. ડાંગમાં ભારે વરસાદ વરસી રહ્યો છે. બંગાળની ખાડીમાં હાલ એક સિસ્ટમ સર્જાઇ છે. બીજી તરફ વધુ એક સિસ્ટમ પણ આકાર લેવા જઇ રહી છે. આ બીજી સિસ્ટમ વધુ મજબૂત બનશે અને ગુજરાતમાં વરસાદનું પ્રમાણ વધારે તેવી પ્રબળ શક્યતા છે. હાલ ગુજરાતના કેટલાક વિસ્તારમાં છૂટછવાયો વરસાદ વરસી રહ્યો છે. ખાસ કરીને દક્ષિણ ગુજરાતમાં વરસાદનું પ્રમાણ વધ્યું છે. છેલ્લા 24 કલાકમાં આહવામાં 4  ઈંચથી વધુ  વરસાદ વરસ્યો છે. હવામાન વિભાગ દ્વારા આજે પણ અનેક જિલ્લાઓમાં ભારે વરસાદની આગાહી કરવામાં આવી છે. 

બંગાળની ખાડીમાં એક મજબૂત સિસ્ટમ આકાર લઇ રહી છે

હવામાન વિભાગની આગાહી મુજબ 24 કલાક બાદ રાજ્યના કેટલાક વિસ્તારોમાંથી  ચોમાસું પરત ફરવાની શરુઆત થશે. ઉત્તર ગુજરાત,કચ્છ અને સૌરાષ્ટ્રના કેટલાક વિસ્તારમાંથી ચોમાસુ વિદાય લઇ તેવી શકયતા જોવાઇ રહી છે.  બીજી તરફ બંગાળની ખાડીમાં એક મજબૂત સિસ્ટમ આકાર લઇ રહી છે. જેની અસરથી રાજ્યમાં ફરી વરસાદ આવશે. આ સિસ્ટમ બંગાળની ખાડીમાં 25 સપ્ટેમ્બરની આસપાસ બનશે. ત્યારબાદ આ સિસ્ટમ ડિપ્રેશન બનશે અને  આંધ્રપ્રદેશ તરફ ફંટાઇ જશે. હવામાન વિભાગના અનુમાન મુજબ ગુજરાતમાં આ સિસ્ટમના કારણે 27સપ્ટેમ્બરથી વધુ એક ભારે વરસાદનો રાઉન્ડ આવશે. જો આ સિસ્ટમ મજબૂત જ રહેશે તો 27થી 2 ઓક્ટોબર સુધી વરસાદ વરસશે.

હવામાન વિભાગની આગાહી મુજબ આજે રાજ્યના કેટલાક જિલ્લામાં ભારે વરસાદ વરસી શકે છે. ખાસ કરીને વલસાડ, નવસારી, ડાંગ, તાપી,સુરત, ભરૂચ, વડોદરા, છોટાઉદેપુરમાં વરસાદની શક્યતા છે.  અમદાવાદ, ગાંધીનગર,સાબરકાંઠા,  ખેડા, આણંદ  આ તમામ વિસ્તારમાં ગાજવીજ સાથે વરસાદ વરસી શકે છે.  

સૌરાષ્ટ્રની વાત કરીએ તો દેવભૂમિ દ્વારકા, પોરબંદર, ગીર સોમનાથ,અમરેલી, જામનગર, જૂનાગઢ, રાજકોટ, ભાવનગર, બોટાદ, મોરબી,સુરેન્દ્રનગરમાં ગાજવીજ સાથે વરસાદ વરસી શકે છે. છેલ્લા 24 કલાકમાં દક્ષિણ ગુજરાતના કેટલાક જિલ્લાાં સારો વરસાદ વરસ્યો છે. ડાંગ જિલ્લામાં મોડીરાત્રિથી ધોધમાર વરસાદ વરસ્યો.

ડાંગ જિલ્લામાં ભારે વરસાદ

ડાંગ જિલ્લામાં નવરાત્રિના પ્રથમ દિવસે ભારે વરસાદે તબાહી મચાવી હતી. ભારે વરસાદને પગલે અંબિકા નદીમાં ઘોડાપૂરની સ્થિતિ સર્જાઈ હતી. અંબિકા નદીના પાણી બાર ખાંધીયા ગામમાં લોકોના ઘર સુધી પાણી પહોંચ્યા હતા. અંબિકા નદીના પાણીમાં અનેક લો-લેવલ બ્રિજ પાણીમાં ગરકાવ થયા હતા. ડાંગ જિલ્લામાં મોડી રાત્રે ધોધમાર વરસાદ વરસ્યો હતો. ભારે વરસાદથી જિલ્લામાંથી પસાર થતી નદીઓમાં પૂર આવ્યું હતું. અંબિકા, ગીરા, પૂર્ણા નદીના પાણી ગામોમાં ઘૂસ્યા હતા. બાર ખાંધીયા ગામમાં ઘરોમાં અંબિકા નદીના પાણી ઘૂસ્યા હતા. ભારે વરસાદથી વઘઈ- આહવા જતા રોડ પર પાણી ફરી વળ્યા હતા. માછલી ખાતર ગામ નજીક પૂર્ણા નદીના પાણી ફરી વળતા વાહન વ્યવહાર ખોરવાયો હતો.