Delhi Red Fort પાસે બ્લાસ્ટનું સત્ય શું છે? પોલીસ કમિશનર સતીશ ગોલચાએ વિસ્ફોટ અંગે કર્યો મોટો ખુલાસો
Red Fort blast: લાલ કિલ્લા મેટ્રો સ્ટેશન નજીક બનેલી ઘટનામાં 8ના મોત; FSL અને NIA સહિત તમામ સુરક્ષા એજન્સીઓ તપાસમાં સક્રિય.
Delhi blast news: દિલ્હીના ઐતિહાસિક લાલ કિલ્લા મેટ્રો સ્ટેશનના ગેટ નંબર 1 પાસે થયેલા શક્તિશાળી વિસ્ફોટ બાદ દિલ્હી પોલીસ કમિશનર સતીશ ગોલ્ચાએ ઘટનાસ્થળનું નિરીક્ષણ કરી મહત્ત્વની માહિતી આપી હતી. કમિશનરે જણાવ્યું કે, સાંજે લગભગ 6:52 વાગ્યે, એક ધીમી ગતિએ ચાલતું વાહન લાલ લાઇટ પર અટક્યું, અને તે જ ક્ષણે વાહનમાં વિસ્ફોટ થયો. આ વિસ્ફોટ એટલો જોરદાર હતો કે તેનાથી નજીકના વાહનોને મોટું નુકસાન થયું હતું. LNJP હોસ્પિટલના જણાવ્યા મુજબ, સારવાર માટે લાવવામાં આવેલા 15 લોકોમાંથી 8ના મોત થયા છે. આ ઘટના બાદ દિલ્હીમાં હાઇ એલર્ટ જારી કરવામાં આવ્યું છે, અને FSL તથા NIA સહિત તમામ સુરક્ષા એજન્સીઓ દ્વારા પરિસ્થિતિ પર નજર રાખવામાં આવી રહી છે. ગૃહમંત્રીને પણ સમયાંતરે માહિતી શેર કરવામાં આવી રહી છે.
દિલ્હી પોલીસ કમિશનરની વિસ્ફોટ પર સત્તાવાર માહિતી
દિલ્હીના લાલ કિલ્લા પાસે થયેલા ભયાનક કાર વિસ્ફોટ બાદ સમગ્ર વિસ્તારમાં ગભરાટ અને અરાજકતાનો માહોલ છે. આ ઘટનાની ગંભીરતાને જોતા, દિલ્હી પોલીસ કમિશનર સતીશ ગોલ્ચાએ તાત્કાલિક ઘટનાસ્થળે પહોંચીને પરિસ્થિતિનો તાગ મેળવ્યો હતો. પત્રકારો સાથે વાત કરતા તેમણે વિસ્ફોટની ચોક્કસ ઘટનાક્રમની માહિતી આપી હતી.
કમિશનરે જણાવ્યું કે, "આજે સાંજે લગભગ 6:52 વાગ્યે, લાલ કિલ્લા મેટ્રો સ્ટેશન નજીક એક વાહન ધીમી ગતિએ ચાલી રહ્યું હતું અને લાલ લાઇટ પર તે અટક્યું. વાહન અટકતાની સાથે જ તેમાં વિસ્ફોટ થયો, જેના કારણે નજીકમાં પાર્ક કરેલા અન્ય વાહનોને પણ નુકસાન થયું હતું." આ વિસ્ફોટમાં કેટલાક લોકોના મોત થયા છે અને અન્ય ઘાયલ થયા છે. LNJP હોસ્પિટલના જણાવ્યા મુજબ, સારવાર માટે લાવવામાં આવેલા 15 લોકોમાંથી 8નું મૃત્યુ થયું છે.
તમામ એજન્સીઓ સક્રિય અને હાઇ એલર્ટ
વિસ્ફોટની ગંભીરતાને ધ્યાનમાં રાખીને, FSL (ફોરેન્સિક સાયન્સ લેબોરેટરી) અને NIA (નેશનલ ઇન્વેસ્ટિગેશન એજન્સી) સહિત તમામ સુરક્ષા એજન્સીઓ ઘટનાસ્થળે હાજર છે. પોલીસ કમિશનરે ખાતરી આપી કે પરિસ્થિતિ પર સતત નજર રાખવામાં આવી રહી છે અને ગૃહમંત્રીને પણ સમયાંતરે માહિતી શેર કરવામાં આવી રહી છે.
વિસ્ફોટ બાદ, દિલ્હી પોલીસે સમગ્ર શહેરમાં હાઇ એલર્ટ જારી કર્યું છે. દિલ્હી ફાયર સર્વિસના જણાવ્યા અનુસાર, ઘટનાસ્થળે સાત ફાયર એન્જિન મોકલવામાં આવ્યા હતા અને પોલીસે સમગ્ર વિસ્તારને ઘેરી લીધો છે.
પ્રત્યક્ષદર્શીઓનું વર્ણન અને નુકસાનની તીવ્રતા
લાલ કિલ્લા મેટ્રો સ્ટેશનના ગેટ નંબર 1 પાસે થયેલો આ વિસ્ફોટ અત્યંત તીવ્ર હતો. પ્રત્યક્ષદર્શીઓએ જણાવ્યું હતું કે વિસ્ફોટનો અવાજ એટલો જોરદાર હતો કે તે ઘણા મીટર દૂરની ઇમારતોમાં સંભળાયો હતો, અને વિસ્ફોટના કારણે દૂર પાર્ક કરેલા અનેક વાહનોની બારીઓ પણ તૂટી ગઈ હતી. એક પ્રત્યક્ષદર્શીએ કહ્યું, "હું ગુરુદ્વારામાં હતો ત્યારે મેં જોરદાર અવાજ સાંભળ્યો. વિસ્ફોટને કારણે, નજીકમાં પાર્ક કરેલા ઘણા વાહનોના ટુકડા થઈ ગયા હતા." વિસ્ફોટના ફૂટેજમાં સળગતી કારમાંથી ભીષણ જ્વાળાઓ અને ધુમાડો નીકળતો સ્પષ્ટપણે જોવા મળ્યો હતો.
આ ઘટનાએ દિલ્હીની સુરક્ષા વ્યવસ્થા પર ગંભીર સવાલ ઉભા કર્યા છે અને સુરક્ષા એજન્સીઓ વિસ્ફોટના ચોક્કસ કારણ અને ષડયંત્રની તપાસમાં સક્રિય છે.
ટોપ સ્ટોરી
ટ્રેન્ડિંગ સમાચાર
