Jamnagar: ફલ્લાની સૌરાષ્ટ્ર ગ્રામીણ બેંક બહાર સરા જાહેર હત્યાથી ચકચાર

ફલ્લા ગામમાં આવેલી સૌરાષ્ટ્ર ગ્રામીણ બેંકના કર્મચારી દ્વારા બેંક પરિસરમાં કોઈ કારણોસર પિતા-પુત્ર પર જીવલેણ હુમલો કર્યો હતો.

બેંક બહાર સરા જાહેર હત્યાથી ચકચાર

જામનગર: જામનગર જિલ્લામાં ફલ્લા ગામમાં  હત્યાની ઘટનાથી ચકચાર મચી ગઈ છે.  ફલ્લા ગામમાં આવેલી સૌરાષ્ટ્ર ગ્રામીણ બેંકના કર્મચારી દ્વારા બેંક પરિસરમાં કોઈ કારણોસર પિતા-પુત્ર પર જીવલેણ હુમલો કર્યો હતો. આ હુમલામાં પિતાનું ઘટનાસ્થળે જ મોત થયું છે. આ જીવલેણ હુમલામાં  પુત્રને ગંભીર ઈજાઓ પહોંચી છે. પુત્રને સારવાર જામનગર ખસેડવામાં આવ્યો છે.

જામનગર રાજકોટ હાઈવે પર આવેલા ફલ્લા ગામની સૌરાષ્ટ્ર ગ્રામીણ બેંકની શાખા પર ગોવિંદભાઈ ઘેટિયા અને તેમના પુત્ર મિલન ઘેટિયા આજે આવ્યા હતા. ત્યારે બેંકમાં ફરજ બજાવતા ધવલ પટેલે કોઈ કારણોસર છરી વડે પિતા-પુત્ર પર હુમલો કર્યો હતો. આ હુમલામાં ગંભીર રીતે ઘવાયેલા ગોવિંદભાઈનું ઘટનાસ્થળે જ મોત નિપજ્યું હતું. તેમના પુત્રને ગંભીર ઈજાઓ થતા સારવાર માટે જામનગર હોસ્પિટલમાં ખસેડવામાં આવ્યો છે.

આ ઘટના અંગે જાણ થતા પોલીસ કાફલો  ઘટનાસ્થળ પર પહોંચ્યો હતો. પોલીસે આરોપીની શોધખોળ હાથ ધરી વધુ તપાસ શરૂ કરી છે. આ ઘટનાના પગલે બેંક પર લોકોના ટોળા એકઠા થયા હતા. પોલીસની પ્રાથમિક તપાસમાં જાણવા મળતી વિગત મુજબ મૃતક ગોવિંદભાઈના પુત્રવધૂ સૌરાષ્ટ્ર ગ્રામીણ બેંકમાં નોકરી કરે છે. તેની સાથે જ આરોપી ધવલ પટેલ પણ નોકરી કરે છે. આરોપી સાથે મૃતકના પુત્રવધૂને કોઈ માથાકૂટ થઈ હોય ગોવિંદભાઈ અને તેમના પુત્ર બેંક પર આવ્યા હતા. આ સમયે કોઈ બાબતે બોલાચાલી થયા બાદ મામલો હત્યા સુધી પહોંચ્યો હોવાનું પ્રાથમિક તપાસમાં સામે આવ્યું છે. 

Navsari: યુવકની હત્યાથી ચકચાર, પરિવારે મૃતદેહ સ્વીકાર ન કરતા પોલીસ દોડતી થઈ, બે આરોપી ઝડપાયા

નવસારી જિલ્લાના ચીખલી તાલુકામાં વિનય પટેલ નામના યુવકની હત્યાના પ્રકરણે સમગ્ર પંથકમાં ચકચાર મચાવી દીધી છે. આ કારણે જિલ્લાની પોલીસ દોડતી થઈ છે.  પરિવાર દ્વારા મૃતદેહ સ્વીકારવાની ના પડાતા જિલ્લા પોલીસ દ્વારા ગણતરીના કલાકોમાં બે આરોપીને રાઉન્ડ કરવામાં આવ્યા છે. 

નવસારી જિલ્લાના ચીખલી તાલુકામાં ગતરાત્રિ  દરમિયાન વિનય પટેલ નામના યુવકની 3 ઈસમો દ્વારા હત્યા કરી દેવામાં આવી હતી.  હત્યા બાદ ગામમાં ભારે રોષ જોવા મળ્યો હતો.  રાત્રિ સમયે પોલીસે પરિસ્થિતિને કાબુમાં લેવા માટે ચુસ્ત પોલીસ બંદોબસ્ત ગોઠવી દેવામાં આવ્યો હતો અને મૃતદેહને ચીખલી રેફરલ હોસ્પિટલમાં ખસેડવામાં આવ્યો હતો. 

આજે સવારે પોસ્ટમોર્ટમ કર્યા બાદ પરિવારજનો દ્વારા મૃતદેહનો સ્વીકાર ન કરાતા પોલીસ દોડતી થઈ હતી. સમગ્ર પ્રકરણમાં જ્યાં સુધી આરોપી ન પકડાય ત્યાં સુધી પરિવારના લોકો મૃતદેહ સ્વીકારવાની ના પાડી હતી.  સમગ્ર ઘટનાને લઈને પોલીસ દ્વારા વિવિધ ટીમોની રચના કરવામાં આવી હતી.  જેમાં નવસારી એલસીબી પોલીસ અને હ્યુમન ઇન્ટેલિજન્સની મદદથી આરોપીઓને પકડવાની તજવીજ હાથ ધરવામાં આવી હતી.  જેમાં પોલીસે હત્યામાં સંડોવાયેલા બે આરોપીઓને રાઉન્ડ અપ કરવામાં આવ્યા છે. 

સમગ્ર ઘટનાને લઈને ત્રીજા આરોપીને પણ પોલીસ ગણતરીની કલાકોમાં દબોચી લેવામાં આવશે.  હાલ પરિવારે આ મૃતદેહ સ્વીકાર્યો નથી પરંતુ સાંજ સુધી તમામ આરોપીઓને રાઉન્ડ અપ કરવાની કાર્યવાહી પૂર્ણ કરાશે. આ ઘટનાને લઈને ગણદેવી અને ચીખલીના ધારાસભ્ય દ્વારા પણ પરિવારની મુલાકાત લઇ અને સાંત્વના આપવામાં આવી છે. આરોપીઓ પર કડક કાર્યવાહી કરવાની એમણે ખાતરી અપાવી છે.