Ahmedabad Rain: અમદાવાદમાં વીજળીના કડાકા સાથે વરસાદ, ધોધમાર વરસાદથી અનેક જગ્યાએ ગરબા કેન્સલ થવાની શક્યતા!

અમદાવાદ શહેરમાં આજે (28 સપ્ટેમ્બર)ના રોજ બપોરે 3 વાગ્યા બાદ પવન અને વીજળીના કડાકા-ભડાકા સાથે ધોધમાર વરસાદની શરૂઆત થઈ હતી.

Ahmedabad Rain: સરેરાશ અડધો ઇંચ વરસાદ નોંધાયો છે, જેમાં નરોડા રિંગ રોડ અને હંસપુરા વિસ્તારમાં સૌથી વધુ 1 ઇંચ જેટલો વરસાદ પડ્યો છે. સાતમા નોરતે વરસાદ પડતાં ખેલૈયાઓની નવરાત્રિની મજા બગડી છે. એસજી હાઇવે પર આવેલા કેટલાક પાર્ટી પ્લોટોમાં વરસાદી પાણીના કારણે કાદવ-કિચડ થઈ ગયો હોવાથી ગરબા રમાય તેવી સ્થિતિ નથી. સાંજે 7 વાગ્યા સુધી ઓરેન્જ એલર્ટ હોવાથી વધુ વરસાદની સંભાવના છે, જેના પગલે નિરાશ થયેલા ખેલૈયાઓ હવે AC ડોમના પાસ મેળવવા માટે દોડધામ કરે તેવી શક્યતા છે.

અમદાવાદ શહેરમાં દિવસભરની ગરમી બાદ પવન અને ગાજવીજ સાથે વરસાદ શરૂ થયો હતો, જેના કારણે અનેક વિસ્તારોમાં પાણી ભરાયા હતા. શહેરમાં સરેરાશ અડધો ઇંચ જેટલો વરસાદ નોંધાયો છે, પરંતુ કેટલાક વિસ્તારોમાં તીવ્રતા વધુ હતી,નરોડા રિંગ રોડ અને હંસપુરા વિસ્તારમાં 1 ઇંચ જેટલો વરસાદ પડ્યો. એસજી હાઇવે, મકરબા, બાકરોલ, કર્ણાવતી ક્લબ રોડ, VIP રોડ, વાસણા, સરખેજ, સેટેલાઈટ, પાલડી, ઉસ્માનપુરા, મોટેરા અને સાબરમતી સહિતના વિસ્તારોમાં અડધો ઇંચ વરસાદ નોંધાયો.

નિકોલ, વસ્ત્રાલ, વિરાટનગર, ઓઢવ, રખિયાલ, ગોમતીપુર, જમાલપુર, મેમકો, સૈજપુર, સરદારનગર, લાંભા અને વટવા સહિતના વિસ્તારોમાં અડધો ઇંચ વરસાદ ખાબક્યો. નવા નિકોલ, એસપી રીંગ રોડ, જગતપૂર, ચાંદખેડા અને ઓગણજ રોડ સહિતના વિસ્તારોમાં પણ ધોધમાર વરસાદ પડ્યો હતો.

આજે સાતમા નોરતે અમદાવાદના આકાશમાં કાળા ડિબાંગ વાદળો છવાયેલા રહેવાથી અને મુશળધાર વરસાદ પડવાના કારણે નવલી નવરાત્રિમાં વરસાદ વિલન બન્યો હોય તેવા દ્રશ્યો સર્જાયા છે. વરસાદના કારણે એસજી હાઇવે સહિતના વિસ્તારોમાં આવેલા ઘણા ખુલ્લા પાર્ટી પ્લોટોમાં પાણી ભરાઈ ગયા છે અને ગરબા ગ્રાઉન્ડમાં કાદવ-કિચડ થઈ ગયો છે. જેના કારણે સાંજે 7 વાગ્યા બાદ પણ ગરબા શરૂ થાય તેવી સ્થિતિ લાગતી નથી.

ગરબાના રંગમાં ભંગ પડતાં નિરાશ થયેલા અમદાવાદી ખેલૈયાઓ હવે શહેરના પશ્ચિમ વિસ્તારમાં બનાવવામાં આવેલા AC ડોમના ગરબા તરફ વળ્યા છે. જોકે, AC ડોમમાં પ્રવેશની સંખ્યા ચોક્કસ અને મર્યાદિત હોવાથી, પાસ મેળવવા માટે ખેલૈયાઓ વચ્ચે ભારે પડાપડી થાય તેવી શક્યતા છે.

હવામાન વિભાગે સાંજે 7 વાગ્યા સુધી અમદાવાદ શહેરમાં ઓરેન્જ એલર્ટ જાહેર કર્યું છે. આનો અર્થ એ છે કે ગરબા શરૂ થવાના નિર્ધારિત સમયની આસપાસ પણ હજી વધુ ધોધમાર વરસાદ પડવાની સંભાવના છે, જે ખેલૈયાઓના ઉત્સાહમાં વધુ ભંગ પાડી શકે છે.