IND v ENG: ભારતને મેચ જીતવા એક વિકેટની જરૂર, બુમરાહની પાંચ વિકેટ

ત્રીજા દિવસે ભારતે 7 વિકેટના નુકસાન પર 352 રન બનાવી બીજી ઈનિંગ ડિકલેર કરી હતી. પ્રથમ ઈનિંગની મળેલી 168 રનની લીડ ઉમેરતા ભારતે ઈંગ્લેન્ડને જીતવા 521 રનનો ટાર્ગેટ આપ્યો હતો. ભારત તરફથી કોહલીએ 103 અને પૂજારાએ 72 રનનું યોગદાન આપ્યું હતું. હાર્દિક પંડ્યા 52 રન બનાવી અણનમ રહ્યો હતો.

મેચમાં ઇંગ્લેન્ડ લંચ પહેલા જ ચાર વિકેટ ગુમાવી ચૂક્યું હતું. શમીએ ભારતને ચોથી સફળતા અપાવતા ઓલી પોપને 16 રન (39 બૉલ)ના અંગત સ્કૉરે વિરાટ કોહલીના હાથમાં ઝીલાવી દીધો હતો. જ્યારે ફાસ્ટ બૉલર બૂમરાહે ભારતને ત્રીજી સફળતા અપાવી હતી, બૂમરાહે રૂટને 13 રન (40 બૉલ)ના અંગત સ્કૉરે પેવેલિયન ભેગો કર્યો હતો. આ અગાઉ ભારતના ઇશાંત શર્માએ ઇંગ્લેન્ડના બન્ને ઓપનર જેનિંગ્સને 13 રને (31 બૉલ) અને કૂક 17 રને (39 બૉલ) પેવેલિયન ભેગા કર્યા હતા.

ઈંગ્લેન્ડે 64 રનમાં 4 વિકેટ ગુમાવી દીધી હતી. તે સમયે ઈંગ્લેન્ડ સહેલાઇથી હાર માની લેશે તેમ લાગતું હતું, પરંતુ તે બાદ બટલર અને સ્ટોક્સે ભારતીય બોલરોનો મક્કમતાથી સામનો કર્યો હતો. બટલરે કારકિર્દીની પ્રથમ સદી ફટકારી હતી. પાંચમી વિકેટ માટે બટલર અને સ્ટોક્સે 57.2 ઓવરમાં 169 રનની ભાગીદારી કરી હતી. બટલર 106 રન બનાવી પાંચમી વિકેટના રૂપમાં બુમરાહનો શિકાર બન્યો હતો. જે પછીના બોલ પર બુમરાહે બેરીસ્ટોને બોલ્ડ કર્યો હતો. આ પછી બુમરાહે તેની બીજી ઓવરમાં ક્રિસ વોક્સને 4 રનના સ્કોરે પંતના હાથમાં કેચ આઉટ કરાવી ભારતને સાતમી સફળતા અપાવી હતી. સ્ટોક્સ 62 રન બનાવી પંડ્યાનો શિકાર બન્યો હતો.

નોટિંઘમઃ અત્રેના ટ્રેન્ટ બ્રિજ મેદાન પર રમાયેલી ત્રીજી ટેસ્ટમાં ભારતના ચોથા દિવસના અંતે ઈંગ્લેન્ડે 9 વિકેટના નુકસાન પર 311 રન બનાવી લીધા છે. મેચ જીતવા અને શ્રેણીમાં ટકી રહેવા ભારતે 1 વિકેટની જરૂર છે. બુમરાહે બીજી ઈનિંગમાં 5 વિકેટ ઝડપી હતી. ઈશાંત શર્માને 2 તથા શમી-પંડ્યાને 1-1 સફળતા મળી હતી. ઈંગ્લેન્ડ તરફથી જોસ બટલરે સર્વાધિક 106 રન બનાવ્યા હતા.બટલરે સ્ટોક્સ સાથે પાંચમી વિકેટ માટે 57.2 ઓવરમાં 169 રનની ભાગીદારી કરી હતી. દિવસના અંતે રાશિદ 30 અને એન્ડરસન 8 રને રમતમાં છે.