ગાંધીનગરમાં 4 વર્ષની બાળકી પર દુષ્કર્મ કરનાર નરાધમને છેલ્લા શ્વાસ સુધી આજીવન કેદ

Gandhinagar POCSO court verdict: માત્ર 5 મહિનામાં પોક્સો કોર્ટનો ઐતિહાસિક ચુકાદો, આરોપીનું જેલમાં મોત થયા બાદ જ લાશ પરિવારને સોંપવા હુકમ, પીડિતાને 10 લાખનું વળતર.

gandhinagar pocso court verdict ramneet yadav life imprisonment rape case

Source : ai

Show Quick Read

Key points generated by AI, verified by newsroom

• 4 વર્ષની બાળકી પર દુષ્કર્મ, આરોપીને આજીવન કેદની સજા.
• નરાધમ આરોપી રામનીત યાદવને જેલમાં જ મોત સુધી સજા.
• પીડિત બાળકીને 10 લાખ રૂપિયાનું વળતર ચૂકવવાનો આદેશ.
• પોલીસે 13 દિવસમાં ચાર્જશીટ ફાઈલ કરી, 5 મહિનામાં ચુકાદો.

Gandhinagar POCSO court verdict: ગાંધીનગરમાં એક 4 વર્ષની માસૂમ બાળકીને પીંખી નાખવાના કેસમાં સ્પેશિયલ પોક્સો કોર્ટે એક મોટો અને ઐતિહાસિક ચુકાદો આપ્યો છે. કોર્ટે નરાધમ આરોપી રામનીત યાદવને તેના છેલ્લા શ્વાસ સુધી આજીવન કેદની સજા ફટકારી છે. ગુનાની ગંભીરતા જોતા કોર્ટે કડક આદેશ કર્યો છે કે આરોપીનું જેલમાં જ મોત થાય તે પછી જ તેનો મૃતદેહ પરિવારને સોંપવામાં આવે. આ સાથે પીડિત બાળકીને 10 લાખ રૂપિયાનું વળતર ચૂકવવાનો પણ હુકમ કરાયો છે. પોલીસે આ કેસમાં ગણતરીના દિવસોમાં જ ચાર્જશીટ ફાઈલ કરી હતી અને માત્ર 5 મહિનામાં જ કોર્ટે ન્યાય આપીને સમાજમાં કડક દાખલો બેસાડ્યો છે.

10 દિવસની રેકી બાદ આચર્યું હતું પાપ

બનાવની વિગતવાર વાત કરીએ તો, 15 ડિસેમ્બર 2025 ના રોજ ગાંધીનગરના સેક્ટર 24 ના ઈન્દિરા નગર છાપરા વિસ્તારમાં આ હચમચાવી દેતી ઘટના બની હતી. આરોપી રામનીત યાદવ કરિયાણાની દુકાને આવતો ત્યારે તેની નજર આ બાળકી પર પડી હતી. તેણે આ દુષ્કૃત્ય કરવા માટે 10 દિવસ અગાઉથી જ પ્લાન બનાવ્યો હતો અને સતત ઘરની રેકી કરતો હતો. રાત્રે ઘરમાં ઘૂસીને સૂતેલી બાળકીનું અપહરણ કરી તે નજીકની ઝાડીઓમાં લઈ ગયો હતો. ત્યાં દુષ્કર્મ આચર્યા પછી તે બાળકીને મરેલી સમજીને ત્યાં જ મૂકીને ભાગી ગયો હતો. થોડીવાર પછી બાળકી જીવતી છે કે મરી ગઈ તે જોવા તે પાછો પણ આવ્યો હતો. જોકે, બાળકીની હિંમતને દાદ આપવી પડે કે તે હોશમાં આવતા જ લથડતા પગે ઘરે પહોંચી ગઈ અને પરિવારને આપવીતી જણાવી દીધી, જેનાથી આખા પાપનો ભાંડો ફૂટ્યો.

પોલીસ પર હુમલો અને 13 દિવસમાં ચાર્જશીટ

બનાવની જાણ થતાં જ પોલીસ તરત એક્શનમાં આવી ગઈ હતી. ગુનો કર્યા પછી આરોપી પોતાનું પાપ છુપાવીને વતન બિહાર ભાગી જવાની ફિરાકમાં હતો, પણ પોલીસે ટેકનિકલ સર્વેલન્સ અને બાતમીદારોની મદદથી તેને 5 દિવસમાં જ ઝડપી લીધો હતો. આ કેસમાં તપાસ દરમિયાન જ્યારે પોલીસ આરોપીને લઈને ઘટનાસ્થળે 'રિ-કન્સ્ટ્રક્શન' (બનાવનું પુનરાવર્તન) કરવા ગઈ, ત્યારે તેણે પોલીસ પર જ હુમલો કરીને ભાગવાનો પ્રયાસ કર્યો હતો. આ સમયે પોતાનો બચાવ કરવા અને આરોપીને રોકવા માટે પોલીસે 3 રાઉન્ડ ફાયરિંગ કરવું પડ્યું હતું, જેમાં આરોપીને પગમાં ગોળી વાગતા તેને સિવિલ હોસ્પિટલમાં ખસેડાયો હતો.

આ પણ વાંચોઃ અમદાવાદમાં ફિલ્મી દ્રશ્યો: 26 ગુનામાં વોન્ટેડ ધમા બારડનો PI પર પિસ્તોલથી હુમલો, પગમાં ગોળી વાગતા ઝડપાયો

ગાંધીનગર એસપી રવિ તેજા વાસમ શેટ્ટીના જણાવ્યા મુજબ, પોલીસે અલગ-અલગ એજન્સીઓ અને FSL ની મદદથી મજબૂત વૈજ્ઞાનિક પુરાવા ભેગા કરી રાત-દિવસ એક કરીને માત્ર 13 દિવસમાં જ કોર્ટમાં ચાર્જશીટ રજૂ કરી દીધી હતી.

5 મહિના અને 10 દિવસમાં મળ્યો ન્યાય

ગાંધીનગરના જિલ્લા સરકારી વકીલ સુનિલ પંડ્યાએ જણાવ્યું કે, સ્પેશિયલ કોર્ટના જોઈન્ટ ડિસ્ટ્રિક્ટ અને સ્પેશિયલ પોક્સો જજ એસ.વી. શર્માની કોર્ટમાં આ કેસ માત્ર 5 મહિના અને 10 દિવસમાં જ પૂરો કરવામાં આવ્યો. પોલીસની જડબેસલાક કામગીરી અને મજબૂત પુરાવાઓને આધારે કોર્ટે આરોપીને આકરી સજા ફટકારી સ્પષ્ટ કરી દીધું છે કે આવા ગંભીર ગુનાઓમાં આરોપીને જીવતેજીવ જેલની બહાર આવવાની કોઈ જ તક મળશે નહીં.

આ પણ વાંચોઃ 7 વર્ષથી ગુજરાત અને મુંબઈમાં વેપારીઓને નિશાન બનાવતા બે મહાઠગ ભુજથી ઝડપાયા, આંગડિયાના નામે કરતા છેતરપિંડી