Ahmedabad East Lok Sabha Seat: અમદાવાદ પૂર્વમાં 18 ઉમેદવારો મેદાનમાં, જાણો કેટલા બેલેટ યુનિટની પડશે જરૂર
18 ઉમેદવાર થતા હવે તમામ મતદાન મથકો પર બે બેલેટ યુનિટ ઉપયોગ કરવાની ફરજ પડશે. કારણકે ઉમેદવારોની સંખ્યા વધારે છે, EVM મશીનના બેલેટ યુનિટ ડિસ્પ્લે પર 16 જેટલા ઉમેદવારોની મર્યાદા હોય છે.
Ahmedabad East Lok Sabha Seat: લોકસભાની ચૂંટણી માટે ઉમેદવારી પત્રક પરત લેવાના અંતિમ દિવસે અમદાવા ની પૂર્વ લોકસભા બેઠક પર કુલ 18 ઉમેદવારોનું ચિત્ર સ્પષ્ટ થયું છે. અમદાવાદ પૂર્વ લોકસભા બેઠક પર કુલ 44 જેટલા ઉમેદવારી પત્રક ભરવામાં આવ્યા હતા. જે પૈકી ઉમેદવારી પત્રકોની ચકાસણી કરતા 23 જેટલા ઉમેદવારી પત્રકો માન્ય રાખવામાં આવ્યા હતા. 20 એપ્રિલે ઉમેદવારી પત્રકોની ચકાસણી બાદ ઉમેદવારી પરત લેવાનો આજે અંતિમ દિવસ હતો. જેમાં કુલ પાંચ ઉમેદવારોએ પોતાની દાવેદારી પરત લીધી. જેથી હવે કુલ 18 જેટલા ઉમેદવારો વચ્ચે અમદાવાદ પૂર્વ લોકસભા ચૂંટણીનો જંગ જમવાનો છે.
ભાજપના હસમુખ પટેલ અને કોંગ્રેસના હિંમતસિંહ પટેલ વચ્ચે સીધો જંગ
18 ઉમેદવાર થતા હવે તમામ મતદાન મથકો પર બે બેલેટ યુનિટ ઉપયોગ કરવાની ફરજ પડશે. કારણકે ઉમેદવારોની સંખ્યા વધારે છે, EVM મશીનના બેલેટ યુનિટ ડિસ્પ્લે પર 16 જેટલા ઉમેદવારોની મર્યાદા હોય છે, સાથે એક વિકલ્પ નોટાનો હોય છે. જેથી પૂર્વ લોકસભા બેઠક પર હવે 18 ઉમેદવાર થતાં બે બેલેટ યુનિટ ઉપયોગ કરવાની ફરજ પડશે. અમદાવાદ પૂર્વ લોકસભા બેઠક પર ભાજપ તરફથી હસમુખ પટેલ અને કોંગ્રેસ તરફથી હિંમતસિંહ પટેલ ચૂંટણી લડી રહ્યા છે. જેથી આ બંને નેતાઓ વચ્ચે સીધી ટક્કર રહેવાની છે.
આ 5 ઉમેદવારોએ અંતિમ દિવસે પરત ખેંચી ઉમેદવારી
ઉમેદવારી પત્રક પરત લેવાના દિવસે રામબરનસિંહ રાજપુત, મંથન જોશી, ગુલવાણી રામકુમાર બલરામ, પટેલ ધ્રુવીન નરસિંહભાઈ, અને અશોકભાઈ નટુભાઈ રાઠોડે ઉમેદવારી પરત ખેંચી હતી. ઉમેદવારી પત્રક પરત લેતા સમયે પોતાની દાવેદારી પરત લેતા ઉમેદવારોએ લેખિતમાં ચૂંટણી અધિકારી સમક્ષ ડિકલેરેશન પણ આપ્યું. જેમાં કોઈ ધાક ધમકી અને સ્વ ઈચ્છાએ ઉમેદવારી પરત ખેંચવાની લેખિતમાં જાણકારી આપી. વર્ષ 2019 લોકસભાની ચૂંટણીમાં પણ કુલ 26 જેટલા ઉમેદવારો ચૂંટણી લડ્યા હતા.
ગુજરાતમાં ક્યારે મતદાન
લોકસભા ચૂંટણીના ત્રીજા તબક્કાના મતદાન અંતર્ગત ગુજરાતમાં 7 મેના રોજ મતદાન યોજાશે અને 4 જૂને પરિણામ જાહેર થશે.
સુરતમાં મતદાન પહેલા જ ખીલ્યું કમળ
સુરત બેઠક પરથી ભાજપના ઉમેદવાર મુકેશ દલાલ બિનહરીફ ચૂંટાયા છે. તેમની સામે કોઈ ઉમેદવાર બાકી ન હોવાથી આવું થયું. એક તરફ કોંગ્રેસના ઉમેદવારનું નામાંકન રદ્દ થયું તો બીજી તરફ બસપાના ઉમેદવારે પોતાનું નામ પાછું ખેંચી લીધું. ગુજરાત ભાજપના પ્રદેશ પ્રમુખ સી.આર.પાટીલે તેમની જીત બદલ અભિનંદન પાઠવ્યા હતા. મુકેશ દલાલને પણ વિજયનું પ્રમાણપત્ર પણ આપવામાં આવ્યું હતું.
ટ્રેન્ડિંગ સમાચાર
ટોપ સ્ટોરી
