Gujarat Rain: ત્રણ સિસ્ટમ ગુજરાતમાં ભુક્કા બોલાવશે, 5 દિવસ ભારેથી અતિભારે વરસાદની હવામાન વિભાગની આગાહી
Gujarat Rain Alert: ગુજરાતમાં આગામી 5 દિવસ ભારે વરસાદની આગાહીની વચ્ચે માછીમારોને દરિયો ન ખેડવાની સૂચના આપવામાં આવી છે.
Gujarat Weather Alert: ગુજરાતમાં આગામી પાંચ દિવસ સુધી ગાજવીજ સાથે ભારે વરસાદની આગાહી હવામાન વિભાગ દ્વારા કરવામાં આવી છે. હવામાન વિભાગની આગાહી અનુસાર, હાલમાં ત્રણ સિસ્ટમ સક્રિય થવાને કારણે રાજ્યભરમાં ભારે વરસાદની સંભાવના છે. આ પરિસ્થિતિને ધ્યાનમાં રાખીને, માછીમારોને આગામી પાંચ દિવસ સુધી દરિયો ન ખેડવાની સૂચના આપવામાં આવી છે, કારણ કે 45 થી 55 કિલોમીટર પ્રતિ કલાકની ઝડપે પવન ફૂંકાવાની શક્યતા છે.
વરસાદનું વિતરણ અને આગાહી
આજે, ઉત્તર, મધ્ય અને દક્ષિણ ગુજરાતના ઘણા વિસ્તારોમાં ગાજવીજ સાથે વરસાદ વરસી શકે છે. જ્યારે સૌરાષ્ટ્ર અને કચ્છના વિસ્તારોમાં આગામી 48 કલાક દરમિયાન અતિ ભારે વરસાદની સંભાવના વ્યક્ત કરવામાં આવી છે. આ ઉપરાંત, અમદાવાદ અને ગાંધીનગરમાં પણ ગાજવીજ સાથે હળવાથી મધ્યમ વરસાદની શક્યતા છે, જેના કારણે શહેરીજનોને સાવચેતી રાખવા જણાવાયું છે.
હવામાન વિભાગે ભારે વરસાદને પગલે નીચાણવાળા વિસ્તારોમાં પાણી ભરાવાની અને જનજીવન પ્રભાવિત થવાની શક્યતા વ્યક્ત કરી છે. નાગરિકોને જરૂર વગર બહાર ન નીકળવા, વીજળીના થાંભલાઓ અને વૃક્ષોથી દૂર રહેવા તથા વાહન ચલાવતી વખતે સાવચેતી રાખવા અપીલ કરવામાં આવી છે. સ્થાનિક તંત્ર દ્વારા પણ વરસાદને પહોંચી વળવા માટે જરૂરી વ્યવસ્થા ગોઠવવામાં આવી રહી છે.
ગુજરાતમાં ભારે વરસાદની આગાહી
ગુજરાતમાં અત્યારે ચોમાસાનો માહોલ બરાબર જામ્યો છે. હવામાન વિભાગે આજે અને આવતીકાલે રાજ્યના વિવિધ જિલ્લાઓમાં ભારેથી અતિભારે વરસાદ પડવાની શક્યતા વ્યક્ત કરી છે, જેના કારણે ઘણા જિલ્લાઓમાં ઓરેન્જ અને યલો એલર્ટ જાહેર કરવામાં આવ્યું છે.
આજે (૬ જુલાઈ) ક્યાં કેટલો વરસાદ?
આજે અતિભારે વરસાદ પડવાની શક્યતાને લીધે બનાસકાંઠા, પાટણ, કચ્છ, અમરેલી, ભાવનગર, ભરૂચ, સુરત, તાપી, નવસારી, ડાંગ, વલસાડ, દમણ અને દાદરા નગરહવેલી જેવા જિલ્લાઓ માટે ઓરેન્જ એલર્ટ આપવામાં આવ્યું છે. આ જિલ્લાઓમાં ભારે વરસાદની સંભાવના છે, તેથી લોકોને સાવચેત રહેવાની સૂચના અપાઈ છે. આ ઉપરાંત, મહેસાણા, સાબરકાંઠા, અરવલ્લી, મોરબી, સુરેન્દ્રનગર, જામનગર, રાજકોટ, બોટાદ, દેવભૂમિ દ્વારકા, પોરબંદર, જૂનાગઢ, ગીર સોમનાથ, દીવ, આણંદ, વડોદરા અને નર્મદા જેવા જિલ્લાઓમાં ભારે વરસાદની શક્યતા છે, જેના માટે યલો એલર્ટ જાહેર કરાયું છે.
આવતીકાલે (૭ જુલાઈ) ક્યાં વરસાદ પડશે?
આવતીકાલે પણ વરસાદનું જોર યથાવત્ રહેશે. નવસારી, વલસાડ, દમણ અને દાદરા નગરહવેલીમાં ભારેથી અતિભારે વરસાદ પડવાની શક્યતા છે, જેના માટે ઓરેન્જ એલર્ટ જારી કરાયું છે. આ સિવાય, અમરેલી, ભાવનગર, સુરત, તાપી અને ડાંગ જિલ્લાઓમાં ભારે વરસાદ પડી શકે છે, જેના કારણે તેમને યલો એલર્ટ હેઠળ મુકાયા છે. હવામાન વિભાગની આ આગાહીને પગલે સ્થાનિક તંત્ર દ્વારા જરૂરી પગલાં લેવાઈ રહ્યા છે અને લોકોને પણ સુરક્ષિત રહેવા અને સાવચેતી રાખવા અપીલ કરવામાં આવી છે.
ટોપ સ્ટોરી
ટ્રેન્ડિંગ સમાચાર
