Aadhaar update: આધારમાં મોબાઈલ નંબર કઈ રીતે કરશો અપડેટ, જાણો ઓનલાઈન પ્રોસેસ 

આધાર સંબંધિત તમામ અપડેટ્સ રજિસ્ટર્ડ મોબાઇલ નંબર પર મોકલવામાં આવે છે. તેથી મોબાઇલ નંબર હંમેશા અપડેટ રાખવો મહત્વપૂર્ણ છે.

પ્રતિકાત્મક તસવીર

Source : તસવીર સોશિયલ મીડિયા

આધાર એ યુનિક આઇડેન્ટિફિકેશન ઓથોરિટી ઓફ ઇન્ડિયા (UIDAI) દ્વારા જારી કરાયેલ 12-અંકનો નંબર છે. આ સરકારી દસ્તાવેજનો ઉપયોગ ઓળખના પુરાવા અને સરનામાના પુરાવા તરીકે તેમજ સરકારી યોજનાઓ માટે થાય છે. તેનો ઉપયોગ બેંકિંગ, શાળા/કોલેજ પ્રવેશ, ડ્રાઇવિંગ લાઇસન્સ, પાસપોર્ટ અને અન્ય ઘણી અરજીઓ માટે પણ થાય છે. આધાર સંબંધિત તમામ અપડેટ્સ રજિસ્ટર્ડ મોબાઇલ નંબર પર મોકલવામાં આવે છે. તેથી મોબાઇલ નંબર હંમેશા અપડેટ રાખવો મહત્વપૂર્ણ છે. જો તમારો મોબાઇલ નંબર બદલાઈ ગયો હોય અને તમે તેને આધાર સાથે લિંક કરવાની યોજના બનાવી રહ્યા છો, તો તમે ઓનલાઇન અરજી કરી શકો છો. ચાલો આધાર અપડેટ વિશે વિગતવાર જાણીએ.

આધાર અપડેટ માટે ઓનલાઇન એપોઇન્ટમેન્ટ કેવી રીતે બુક કરવી:

1. પ્રથમ, UIDAI ની સત્તાવાર વેબસાઇટની મુલાકાત લો અને તમારી પસંદગીની ભાષા પસંદ કરો.

2. આગળ, "માય Aadhaar " પર જાઓ, "ગેટ આધાર" પર ક્લિક કરો અને "બુક એપોઇન્ટમેન્ટ" પસંદ કરો.

3. પછી, ડ્રોપડાઉન સૂચિમાંથી તમારું શહેર/સ્થાન પસંદ કરો અને એપોઇન્ટમેન્ટ બુક કરવા માટે "પ્રોસેસ" પર ક્લિક કરો.

4. હવે તમારે તમારો રજિસ્ટર્ડ મોબાઇલ નંબર દાખલ કરવો પડશે, ચકાસણી માટે કેપ્ચા દાખલ કરવો પડશે, અને OTP જનરેટ કરો પસંદ કરવું પડશે.

5. પછી તમને મળેલ OTP દાખલ કરો અને OTP Verify પસંદ કરો.

6. હવે નિવાસી પ્રકાર પસંદ કરો અને નીચેની માહિતી દાખલ કરો: આધાર નંબર, આધાર પરનું નામ, જન્મ તારીખ, અરજી ચકાસણી પ્રકાર, રાજ્ય, શહેર અને આધાર સેવા કેન્દ્ર.

7. એકવાર આ પૂર્ણ થઈ જાય પછી અપડેટ કરવા માટેની માહિતી પસંદ કરો. ઉદાહરણ તરીકે, જો તમે UIDAI ડેટાબેઝમાં તમારો મોબાઇલ નંબર અપડેટ કરવા માંગતા હોય તો નવો મોબાઇલ નંબર પસંદ કરો.

8. "નેક્સ્ટ" પર  ક્લિક કરો અને એપોઇન્ટમેન્ટ તારીખ અને સમય પસંદ કરો. બાદમાં "નેક્સ્ટ"  પર ક્લિક કરો. 

9. હવે એપોઇન્ટમેન્ટ વિગતો વેરિફાઈ કરો અને "સબમિટ "  પર ક્લિક કરો.

10. તમારી એપોઇન્ટમેન્ટ પુષ્ટિ સાથે આધાર સેવા કેન્દ્રની મુલાકાત લો અને તમારી માહિતી અપડેટ કરો.

કોઈપણ આધાર અપડેટ માટે તમને ₹50 ખર્ચ થશે. એકવાર અપડેટ પૂર્ણ થઈ જાય, પછી તમને URN (અપડેટ વિનંતી નંબર) સાથે એક સ્વીકૃતિ સ્લિપ પ્રાપ્ત થશે, જેનો ઉપયોગ તમારી વિનંતીની સ્થિતિને ટ્રેક કરવા માટે થઈ શકે છે.