Karnataka High Court: રખડતા કૂતરાના હુમલામાં બાળકનું મોત, કર્ણાટક હાઇકોર્ટે 10 લાખ વળતર આપવાનો આપ્યો આદેશ

કોર્ટે કહ્યું કે આવા રખડતા કૂતરાઓના હુમલાથી નાગરિકોને બચાવવા સ્થાનિક સંસ્થાઓની ફરજ છે.

ફાઇલ તસવીર

Karnataka High Court: કર્ણાટક હાઈકોર્ટે ચાર વર્ષ પહેલા રખડતા કૂતરાઓના હુમલામાં માર્યા ગયેલા 22 મહિનાના બાળકના કેસમાં 10 લાખ રૂપિયાનું વળતર ચૂકવવાનો આદેશ આપ્યો હતો. હાઈકોર્ટે બેલગાવી જિલ્લા પંચાયતને બાળકના પિતાને આ વળતર ચૂકવવાનો નિર્દેશ આપ્યો છે. કોર્ટે કહ્યું કે આવા રખડતા કૂતરાઓના હુમલાથી નાગરિકોને બચાવવા સ્થાનિક સંસ્થાઓની ફરજ છે.

બાળકના પિતાને ન્યાય મળ્યો

કર્ણાટક હાઈકોર્ટના જસ્ટિસ સૂરજ ગોવિંદરાજના આ નિર્ણયથી 22 મહિનાના બાળકના પિતા યુસુબને રાહત મળી છે.બેલગાવી જિલ્લાના બાલેકુંદ્રી ગામના 32 વર્ષીય યુસુબની અરજી પર હાઈકોર્ટે આ નિર્ણય આપ્યો હતો. અરજદારે તેના નાના પુત્ર અબ્બાસ અલી યુસુબના મૃત્યુ માટે રાજ્ય સરકાર પાસેથી 25 લાખ રૂપિયાના વળતરની માંગ કરી હતી. કોર્ટે બેલગાવી જિલ્લા પંચાયત અને બાલેકુંડરી ગ્રામ પંચાયતની દલીલોને ફગાવી દીધી હતી કે તેમને મૃત્યુ માટે જવાબદાર ઠેરવી શકાય નહીં. કોર્ટે તેના ચુકાદામાં સ્પષ્ટ કર્યું છે કે શેરી કૂતરાઓ દ્વારા હુમલો કરવામાં આવે ત્યારે તેમના અધિકારક્ષેત્રમાં કોઈપણ નાગરિકને ઈજા/મૃત્યુ થવા માટે જાહેર કાયદાના ઉપાય હેઠળ સ્થાનિક સત્તાવાળાઓ જવાબદાર છે. નોંધપાત્ર વાત એ છે કે, 11 નવેમ્બર, 2018ના રોજ યુસુબનો પુત્ર અબ્બાસ અલી તેના ઘર પાસે રમી રહ્યો હતો ત્યારે રખડતા કૂતરાઓએ તેના પર હુમલો કર્યો જેના કારણે બાળકનું મોત થયું હતું.

છ ટકા વ્યાજ સાથે વળતર આપવા આદેશ

કર્ણાટક હાઈકોર્ટે બેલગાવી જિલ્લા પંચાયતને મૃત્યુની તારીખથી છ ટકા વ્યાજ સાથે રૂ. 10 લાખની વળતરની રકમ ચૂકવવાનો નિર્દેશ આપ્યો હતો. આ સાથે કોર્ટે એમ પણ કહ્યું કે અરજદાર બિલ બતાવવા પર મેડિકલ ખર્ચની ભરપાઈ કરવાનો પણ હકદાર છે. કોર્ટે કહ્યું કે જિલ્લા પંચાયતે પણ અરજીકર્તાને મુકદ્દમાના ખર્ચ તરીકે 20,000 રૂપિયા ચૂકવવા પડશે.

આ આદેશમાં કોર્ટે જાહેર કર્યું કે રખડતા કૂતરાઓના જોખમની તપાસ કરવા માટે માસ્ટર જિષ્ણુ કેસમાં બ્રુહત બેંગલુરુ મહાનગર પાલિકા(BBMP) ને 2012 માં આપવામાં આવેલા નિર્દેશો તમામ સ્થાનિક સંસ્થાઓને લાગુ પડે છે. કોર્ટે સ્પષ્ટ કર્યું કે BBMP નિર્દેશો બેંગલુરુ શહેર સહિત કર્ણાટકમાં જિલ્લા, તાલુકા અને ગ્રામ પંચાયત અથવા અન્ય મ્યુનિસિપલ ઓથોરિટી સહિત તમામ સ્થાનિક સંસ્થાઓને લાગુ પડે છે. કોર્ટે પોતાના આદેશમાં કહ્યું કે BBMP વિસ્તારમાં રખડતા કૂતરાઓનો હુમલો અન્ય સ્થાનિક સંસ્થાઓ દ્વારા સંચાલિત વિસ્તારમાં રખડતા કૂતરાઓના હુમલાથી અલગ ન હોઈ શકે, તેથી BBMP પર લાદવામાં આવેલી જવાબદારી અન્ય સ્થાનિક સંસ્થાઓને સમાન રીતે લાગુ પડે છે.