રીલના કીડાઓ સાવધાન, રોલા પાડવા ભારે પડશે! વડોદરામાં તલવારથી કેક કાપતા થઈ જેલ
હેસાણામાં બંદૂક સાથે રોલા, કલોલમાં હથિયારો સાથે રીલ બનાવતા યુવાનો ભુલ્યા ભાન.
- વડોદરામાં રીલ બનાવવી યુવકને પડી ભારે
- મહેસાણાના અગોલમાં યુવકના રોલા
- કલોલમાં રીલના ચક્કરમાં યુવાનો ભુલ્યા ભાન
વડોદરા/મહેસાણા/કલોલ: સોશિયલ મીડિયા પર ફેમસ થવા માટે રીલ બનાવવાનો ક્રેઝ યુવાનોમાં ખૂબ જોવા મળી રહ્યો છે, પરંતુ કેટલીકવાર આ ક્રેઝ ભારે પડી જાય છે. વડોદરા, મહેસાણા અને કલોલમાં તાજેતરમાં બનેલી ઘટનાઓ આ વાતને સાબિત કરે છે, જ્યાં યુવાનોએ રીલ બનાવવાના ચક્કરમાં કાયદાનું ઉલ્લંઘન કર્યું અને પોલીસની કાર્યવાહીનો સામનો કરવો પડ્યો.
વડોદરામાં ક્રિશ મુલાણી નામના એક યુવકને રીલ બનાવવી ભારે પડી ગઈ. ક્રિશે વ્રજ આઈકોન ફ્લેટમાં જાહેરમાં તલવારથી કેક કાપીને પોતાના જન્મદિવસની ઉજવણી કરી હતી. એટલું જ નહીં, તેણે આ ઉજવણીનો વીડિયો સોશિયલ મીડિયા પર અપલોડ પણ કર્યો હતો. આ વીડિયો વાયરલ થતા જ વારસીયા પોલીસે તાત્કાલિક કાર્યવાહી કરી ક્રિશ મુલાણીની ધરપકડ કરી લીધી અને તેની સામે કાયદેસરની કાર્યવાહી હાથ ધરી છે.
તો બીજી તરફ, મહેસાણા જિલ્લાના અગોલ ગામના એક યુવકે બંદૂક સાથે રીલ બનાવીને સોશિયલ મીડિયામાં પોસ્ટ કરી હતી. આ યુવકે ખેતરમાં બંદૂક સાથે ફરીને વીડિયો બનાવ્યો હતો અને પોલીસને જાણે ખુલ્લો પડકાર ફેંક્યો હતો. આ ઘટનાને લઈને સ્થાનિક લોકોમાં પણ રોષ જોવા મળ્યો હતો અને આવા તત્વો વિરુદ્ધ તાત્કાલિક કાર્યવાહી કરવાની માંગ ઉઠી હતી.
આ ઉપરાંત, ગાંધીનગર જિલ્લાના કલોલમાં પણ રીલ બનાવવાના ચક્કરમાં કેટલાક યુવાનો કાયદાનું ભાન ભૂલી ગયા હતા. આ યુવાનોએ હથિયારો સાથે રીલ્સ બનાવીને તેને સોશિયલ મીડિયા પર વાયરલ કરી દીધી હતી. જ્યારે આ રીલ્સ પોલીસના ધ્યાનમાં આવી તો કલોલ પોલીસે તાત્કાલિક કાર્યવાહી કરી હતી અને તમામ યુવાનોને પોલીસ સ્ટેશન બોલાવીને તેમની પાસે માફી મગાવી હતી. પોલીસે આ યુવાનોને કાયદાનું ભાન કરાવ્યું હતું અને ભવિષ્યમાં આવી પ્રવૃત્તિઓથી દૂર રહેવાની ચેતવણી આપી હતી.
આ ઘટનાઓ દર્શાવે છે કે સોશિયલ મીડિયા પર લાઈક્સ અને ફોલોઅર્સ મેળવવાના ચક્કરમાં યુવાનો ઘણીવાર ગેરકાયદેસર કૃત્યો કરી બેસે છે, જે તેમને મુશ્કેલીમાં મૂકી શકે છે. પોલીસે આવા તત્વો સામે કડક કાર્યવાહી કરવાની જરૂર છે, જેથી અન્ય યુવાનોને પણ આમાંથી બોધપાઠ મળે. સાથે જ યુવાનોએ પણ સોશિયલ મીડિયાનો ઉપયોગ સમજદારીપૂર્વક અને કાયદાના નિયમોનું પાલન કરીને કરવો જોઈએ.
ટ્રેન્ડિંગ સમાચાર
ટોપ સ્ટોરી
